މައިމުޅަވާ މީހުންނަށް ބިމުން ގޯތި ނުލިބޭ މައްސަލައަށް ގާނޫނީ ހައްލެއް ގެނައުމަށް ބިލެއް

މައިމުޅަވާ، ކުދިންނަށް ބިމުން ނުލިބޭ މައްސަލައަށް ޤާނޫނީ ޙައްލެއް ހޯދައިދިނުމަށް ބިމާބެހޭ ޤާނޫނަށް އިޞްލާޙު ހުށަހަޅައިފިއެވެ.

މި ބިލު ހުށަހެޅުއްވީ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމްއެވެ.

އެ ބިލު ހުށަހެއްވި ސަބަބެއް ކަމުގައި ބުނެފައިވަނީ، ދިވެހިރާއްޖޭގެ "ބިމާބެހޭ ޤާނޫނުގެ 15 ވަނަ މާއްދާއާއި، 17 ވަނަ މާއްދާ ބައްޓަންކޮށްފައިވާ ގޮތުން މައިމުޅަވުމުގެ ސަބަބުން ބިމުން ނުލިބޭ ޙާލަތުތަކެއް، ކުރިމަތިވަމުންދާތީއެވެ.

އަދި އޭގެ ސަބަބުން މުޖުތަމަޢުގެ ތެރޭގައި، އަދި ޢާއިލާގެ މެދުގައި އަރާރުން އުފެދި، މައްސަލަތައް ކުރިމަތިވާ އަދި ބޭއިންސާފު ޙާލަތުތަކެއް ކުރިމަތިވަމުންދާތީއެވެ.

އެ މައްސަލަ ހައްލު ކުރުމަށް ގާނޫނަށް ހުށަހަޅާފައިވާ އިސްލާހު ތަކަކީލުގެ ތެރޭގައި ހިމެނެނީ؛

ބަންޑާރަ ގޯއްޗެއް ދޫކުރެވިފައިވާ މީހަކު މަރުވެއްޖެނަމަ، އެ ގޯއްޗެއްގައިވާ ޢިމާރާތާއި ނުއުފުލޭ މުދާ، ތަރިކައިގެ އުސޫލުން ލިބޭ މީހުންނާއި އަދި ބިމުގެ ތަނަވަސްކަން ލިބިފައިނުވާ މައިމުޅަވާ ދަރިންގެ މެދުގައި، ބަންޑާރަ ބިމުން ލިބިދީ، އެ ގޯތީގެ ބިން ލިބޭ އެންމެންގެ ނަމުގައި، އެބަޔަކު އެދޭނަމަ، އެ ގޯއްޗެއް ރަޖިސްޓަރީކޮށް ވަކިވަކި ރަޖިސްޓަރީ ހަދައިދިނުން

މައިމުޅަވާ ދަރިންނަށް ބިމުން ލިބިދޭ ޙާލަތުގައި އެ ގޯތީގައިވާ ޢިމާރާތާއި ނުއުފުލޭ މުދަލުން އޭނާއަށް ލިބޭ ބިމަށް އަރާ މިންވަރުގެ އަގު ބަދަލެއްގެ ގޮތުގައި ތަރިކައިން ލިބޭ މީހުންނަށް ދިނުން

އިސްލާހުގައިވާ ގޮތުން، ބިމުގެ ތަނަވަސްކަން ހުރިކަމަށް ބަލާނީ، ގަތުމަކުން، ވިއްކުމަކުން، ހިބައަކުން ނުވަތަ ވަޞިއްޔަތަކުން، ނުވަތަ ތަރިކައަކުން ބިމެއް ނުވަތަ ފްލެޓެއް ރަޖިސްޓަރީ ކުރެވިފައިވުން ނުވަތަ ޝަރީޢަތުން ލިބިދީފައި އޮތުމެވެ. އަދި ސަރުކާރުގެ ބޯހިޔާވަހިކަމުގެ މަޝްރޫޢަކުން ބިމެއް ނުވަތަ ފްލެޓެއް ޙަވާލުކުރެވިފައިވުމެވެ.

މައިމުޅަވާ ދަރިންނަކީ އެދަރީގެ ބައްޕަ ނުވަތަ މަންމަ ހުރިނަމަ، އެ ބައްޕަޔަށް ނުވަތަ މަންމަޔަށް ލިބޭ އެކަމަކު ތަރިކައިގެ މައްޔިތާގެ ކުރިން މި މީހުން ނިޔާވެފައިވުމުން މި މީހުންނަށް އަދި މި މީހުންގެ ދަރީންނަށް ނުލިބޭ މިފަދަ މީހުންގެ ދަރިންނެވެ.