ޑިމޮކްރެޓްސްގެ ނައިބު ރައީސް ކަމުން އިސްތިއުފާ ދިނުމަށްފަހު، އަލައިކާ އެ ޕާޓީން ވަކިވެއްޖެ

ދަ ޑިމޮކްރެޓްސްގެ ނާއިބު ރައީސް ކަމުގެ މަގާމުގައި ހުންނެވި، އާސިޔަތު އަލައިކާ އަދުނާން އެ މަޤާމުން އިސްތިއުފާ ދެއްވައި، ޕާޓީން ވަކިވެވަޑައިގެންފިއެވެ.

އިސްތިއުފާ ދެއްވިކަން ހާމަކުރައްވައި އަލައިކާ އެކްސްގައި ކުރެއްވި ޕޯސްޓެއްގައިވަނީ އޭނާއަށް ‏އިތުބާރުކުރައްވައި، ވޯޓުދެއްވައި، އަދި މަގާމުގައި ހުންނެވިއިރު އެހީތެރިވެދެއްވި އެންމެހައި ފަރާތްތަކަށް ޝުކުރު އަދާކުރައްވާފައެވެ.

‏”މި ޕާޓީއަށް އަޅުގަނޑު ޚިދުމަތް ކުރި މުއްދަތުގައި، އަޅުގަނޑަށް ލިބިފައިވާ ޢިލްމާއި ތަޖުރިބާގެ އަލީގައި އަޅުގަނޑަށް ކުރެވުނު އެންމެ މަތީ ދަރަޖައަކަށް، ތެދުވެރިކަމާއި އިޚްލާސްތެރިކަމާއެކު ޚިދުމަތްކުރުމަށް މަސައްކަތްކުރީމެވެ. އަޅުގަނޑާ ހަވާލުކުރެވުނު ކޮންމެ މަސްއޫލިއްޔަތަކާއި ވާޖިބެއް، އަދާކުރީ ހިތާއި ރޫހުންނެވެ“ އަލައިކާގެ ޕޯސްޓުގައި ވިދާޅުވިއެވެ.

‏”…އަޅުގަނޑާއެކު މި ދަތުރުގައި ބައިވެރިވި އެންމެހާ ޑިމޮރެޓުންނަށް ހިތުގެ ފުންމިނުން ޝުކުުރުވެރިވާ ހާލު ރަސްމީކޮށް ⁦‪ދަ ޑިމޮކްރެޓްސް އިން‬⁩ ވަކިވަމެވެ.“

އަލައިކާ ވިދާޅުވިއެވެ.

އަލައިކާ ޑިމޮކްރެޓްސްއިން ވަކިވެވަޑައިގެންފައުވާއިރު، އެ ޕާޓީން ދާދިފަހުން ވަނީ ޕާޓީގެ މެންބަރުން އެމްޑީޕީއާ ގުޅުމަށް ގަރާރެއް ފާސްކޮށްފައެވެ. އަދި އެ ޕާޓީ އުފެއްދުމުގައި އެންމެ އިސްކޮށް ހަރަކާތްތެރިވި ގިނަ ފަރާތްތައް ރޭގެ ވަގުތެއްގައި ވަނީ އެމްޑީޕީއާ އަލުން ގުޅިފައެވެ.

އޭގެ ތެރޭގައި ކުރީގެ ރައީސް މުޙައްމަދު ނަޝީދާއި، މަޖިލީހުގެ ކުރީގެ ނާއިބު ރައީސް އީވާ އަބްދުالله ހިމެނިވަޑައިގަންނަވައެވެ.