ޓޫރިސްޓުންގެ ޢަދަދު މަދުވިޔަސް ފަތުރުވެރިކަމުގެ އާމްދަނީ އިތުރު: އެމްއެމްއޭ

މެދުއިރުމަތީ ހަނގުރާމައިގެ ސަބަބުން ރާއްޖެ ޒިޔާރަތްކުރި ފަތުރުވެރިންގެ ޢަދަދު ދަށަށް ދިޔަ ނަމަވެސް އެ ސިނާޢަތުން ޤައުމުގެ އިޤުތިޞާދަށް ވަން ބޭރު ފައިސާ އެއް އިންސައްތަ އިތުރުވެފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ބުނެފިއެވެ.

އެމްއެމްއޭ އިން ނެރުނު ނޫސް ބަޔާނުގައި ފާހަގަކޮށްފައިވާ ގޮތުގައި މިދިޔަ ފެބްރުއަރީ 28 ގައި ފެށުނު ހަނގުރާމައާ ގުޅިގެން ވައިގެ ދަތުރުފަތުރުގެ މައި ޓްރާންސިޓް ހަބްތައް ބަންދުވެ ދަތުރުތަކުގެ އަގު އުފުލުމުގެ ނަތީޖާއެއްގެ ގޮތުން ފަތުރުވެރިންގެ ޢަދަދަށް ބޮޑު ވެއްޓުމެއް އައިސްފައިވެއެވެ.

މިގޮތުން، ޖަނަވަރީ އަދި ފެބުރުވަރީ މަހުގެ ތެރޭގައި ޒިޔާރަތްކުރި ފަތުރުވެރިންގެ އަދަދު އަހަރުން އަހަރަށް އިތުރުވުމަށްފަހު، ހަނގުރާމަ ފެށުމާ ގުޅިގެން މާރިޗު އަދި އެޕްރީލް މަހުގެ ތެރޭގައި އައި ފަތުރުވެރިންގެ އަދަދު ވަނީ ކުރީ އަހަރާ އަޅާބަލާއިރު %21 އަދި %26 އިން ދަށަށްގޮސްފައިވާ ކަމަށް ބުނެފައިވެއެވެ.

މެއި 2026 ތެރޭގައި ފަތުރުވެރިން ޒިޔާރަތްކުރި އަދަދު، ކުރީ އަހަރުގެ މެއި މަހާ އަޅާބަލާއިރު %3 އިތުރުވި ނަމަވެސް ޖޫން މަހުގެ ތެރޭގައި އަނެއްކާވެސް ވަނީ 13% އިން ދަށަށްގޮސްފައެވެ. އަދި ޖުލައި މަހުގެ ތަފާސްހިސާބުތަކުން ދައްކާ ގޮތުގައި، މި މަހުގެ ތެރޭގައި ޒިޔާރަތްކުރި ފަތުރުވެރިންގެ މިންވަރު ވަނީ ކުރީ އަހަރުގެ ޖުލައި މަހާ އަޅާބަލާއިރު 2%  ދަށަށްގޮސްފައެވެ.

ޖޫން މަހުގެ ނިޔަލަށް ޝާއިޢުކުރެވިފައިވާ ތަފާސްހިސާބުތައް ދައްކާގޮތުން މި މުއްދަތުގެ ތެރޭގައި ޒިޔާރަތްކުރި ފަތުރުވެރިންގެ ޖުމްލަ އަދަދު ވަނީ އޭގެ ކުރީ އަހަރާ އަޅާބަލާއިރު 6% ދަށްވެފައެވެ. އަދި ޖުލައި މަހުގެ ތަފާސްހިސާބުތައް ހިމަނައިގެން ބަލާއިރު 2026 ވަނަ އަހަރުގެ ފުރަތަމަ 7 މަސް ދުވަހުގެ ތެރޭގައި ޒިޔާރަތްކުރި ފަތުރުވެރިންގެ އަދަދު ގާތްގަނޑަކަށް 5% އިން ދަށްވެފައިވާކަން އެމްއެމްއޭ އިން ބުނެފައުވެއެވެ.

”ހަނގުރާމައިގެ ސަބަބުން ފަތުރުވެރިން ޒިޔާރަތްކުރާ މިންވަރާއި ހޭދަކުރާ ރޭގެ އަދަދު ދަށްވެފައި ވީނަމަވެސް، ފަތުރުވެރިކަމުގެ ސިނާއަތުން، މި މިމުއްދަތުގައި ދިވެހި އިގްތިޞާދަށް ލިބުނު ބޭރު ފައިސާ ވަނީ %1 އިތުރުވެފަ“ އެމްއެމްއޭއިން ބުނެފައިވެއެވެ.

ޔޫރަޕާއި އުތުރު އެމެރިކާ ފަދަ ބާޒާރުތަކުން އަންނަ ފަތުރުވެރިން މަދުވުމުން ލިބުނު ގެއްލުން ފޫބެއްދުމަށް އައު ބާޒާރުތަކުގައި ރާއްޖެ އިޝްތިހާރުކޮށް ކަނެކްޓިވިޓީ ފުޅާކުރުމުގެ ރަނގަޅު މަސައްކަތްތަކެއް ކުރެވިފައިވާ ކަމަށް ވެސް މަރުކަޒީ ބޭންކުން ބުނެފައިވެއެވެ. އެ ބޭންކުން އިތުރަށް ބުނެފައިވަނީ މި ހާލަތު މަޑުމަޑުން ރަނގަޅުވަމުން އަންނަ ކަމުގެ ނިޝާންތައް ފެންނަ ކަމަށެވެ.

ބޭރު ފައިސާގެ ޤާނޫނަށް ގެނެސްފައިވާ ބަދަލުތަކާ ގުޅިގެން ފަތުރުވެރިކަމުގެ ދާއިރާއިން ބޭންކިން ނިޒާމަށާއި ރާއްޖޭގެ ރަސްމީ ރިޒާވަށް ވަންނަ ޑޮލަރުގެ މިންވަރު އިތުރުވެފައިވެއެވެ. އެކަމާ ގުޅިގެން އަސާސީ މުދާ އެތެރެކުރުމަށް ބޭންކުތަކުން ފޯރުކޮށްދޭ ޓީޓީ ސަޕޯޓަށް އެހީތެރިވުމުގެ ގޮތުން މިދިޔަ ހަފުތާގައި ބޭންކުތަކަށް ޑޮލަރު ވިއްކާ މިންވަރު ވެސް އެމްއެމްއޭ އިން ވަނީ އިތުރުކޮށްފައެވެ.