ވައުދާ އެއްގޮތަށް ޗާގޯސް ހޯދަން ނޫޅޭތީ ޑިމޮކްރެޓްސް އިން ކަންބޮޑުވުން ފާޅުކޮށްފި

ޗާގޯސްގެ ރަށްތަކުގެ ސިޔާދަތުގެ މައްޗަށް ދައުވާކުރުމުގެ ހައްގު އަލުން ހޯއްދާނެ ކަމަށް އަދުގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންނެވި ވައުދު ފުއްދަވަން މަސައްކަތް ނުކުރައްވާ ކަމަށްބުނެ، ޑިމޮކްރެޓްސްއިން ކަންބޮޑުވުންފާޅުކޮށްފިއެވެ.

ޑިމޮކްރެޓްސްއިން ރޭ ނެރުނު ނޫސްބަޔާނެއްގައި ބުނެފައި ވަނީ ޗާގޯސްގެ ރަށްތަކުގެ ސިޔާދަތާ ގުޅޭ ގޮތުން ދިވެހިރާއްޖެއިން ޒަމާނުއްސުރެ ގެންގުޅެމުންދިއަ ސިޔާސަތު ނިމިދިއަ ސަރުކާރުން ބަދަލުކުރެއްވި ކުރެއްވުމުން ދިވެހިރާއްޖެއަށާއި ދިވެހީންނަށް ލިބުނުގެއްލުމާ މެދު ރައީސް ޑރ. މުޙައްމަދު މުޢިއްޒުގެ ސަރުކާރުން ވެސް މިހާތަނަށް ފިޔަވަޅެއް އަޅާފައި ނުވާތީ އެކަމާ ކަންބޮޑުވާ ކަމަށެވެ.

މިއާއެކު ޑިމޮކަރެޓްސް އިންވަނީ ޗާގޯސްގެ ރަށްތަކުގެ ސިޔާދަތާ ގުޅޭގޮތުން އުފެދިފައިވާ ދެބަސްވުމުގައި، ޗާގޯސްގެ މައްޗަށް މޮރިޝަސްގެ ސިޔާދަތީ ބާރު ޤަބޫލުކުރައްވައި، ދިވެހިރާއްޖޭގެ ފަރާތުން ދައުވާކުރުމުގެ ހައްގު ނިމިދިޔަ ސަރުކާރުން "ސިއްރު ސިޓީއަކުން" ދޫކޮށްލައްވައި އަދި އދ. ގައި އެގޮތަށް ވޯޓްދެއްވާފައިވާތީ އެކަމާމެދު ކަންބޮޑުވުންފާޅުކޮށް ކުށްވެރި ކޮށއފައެވެ.

ޑިމޮކްރެޓްސްއިން  އިތުރަށް ބުނީ ނިމިދިޔަ ސަރުކާރުން ޗާގޯސް މައްސަލާގައި އަމަލު ކުރެއްވި ގޮތް އަލުން މުރާޖާކުރައްވާނޭކަމަށާއި، ޗާގޯސްގެ ރައްތަކުގެ ސިޔާދަތުގެ މައްޗަށް ދައުވާކުރުމުގެ ހައްގު އަލުން ހޯއްދަވާނޭކަމަށް ވަޢުދެއްގެ ގޮތުގައި ރިޔާސީ އިންތިހާބުގައި ވިދާޅުވަމުން ގެންގޮސްފައިވެއެވެ.

"ނަމަވެސް މި ސަރުކާރުން ވެސް އެކަމާމެދު އެއްވެސް ފިޔަވަޅެއް އަޅުއްވާފައި ނުވަނީސް، އިނގިރޭސިވިލާތުގެ ސަރުކާރުން ޗާގޯސް، މޮރިޝަސްއާ ހަވާލުކުރުމަށް ނިންމިކަން މިހާރު އެވަނީ އިއުލާނުކޮށްފައެވެ. މިއީ ދައުވާކުރުމުގެ ހައްގު ދިވެހިރާއްޖެއިން ދޫކޮށްލެއްވުމުގެ ސަބަބުން ނުވަތަ އެ ޙައްޤު އަލުން ހޯދައިދިނުމަށް މަސައްކަތްނުކުރެއްވުމުގެ ސަބަބުން ދިވެހިރާއްޖޭގެ ސިޔާދަތައް ލިބިގެންދާ ގެއްލުމެއްކަމަށް މި ޕާޓީން ދެކެމެވެ،" ޑިމޮކްރެޓްސްގެ ބަޔާނުގައިވެއެވެ.