ޓެކްްސް އިދާރާއަށް އޮތް އެންމެބޮޑު ގޮންޖެހުމަކީ މުއައްޒަފުންގެ ހިފެހެއްޓުމުގެ ދަތިކަން: ޒަރީރު
ލިޔުންތެރިޔާ
އަބްދުﷲ ހުސައިން
ދައުލަތުގެ ޓެކްސް އިދާރާ، މޯލްޑިވްސް އިންލަންޑް އޮތޯރިޓީ (މީރާ) އަށް އޮތް އެންމެބޮޑު ގޮންޖެހުމަކީ މުއައްޒަފުންގެ ހިފެހެއްޓުމުގެ ދަތިކަންކަމަށް ކޮމިޝަނަރު ކޮމިޝަނާ ޖެނެރަލް އޮފް ޓެކްސޭޝަން ހަސަން ޒަރީރު ވިދާޅުވެއްޖެ އެވެ.
ރައްޔިތުން މަޖިލީހުގެ ބަޖެޓް ކޮމިޓީގައި ވާހަކަދައްކަވަމުން ޓެކްސް ކޮމިޝަނަރު ވިދާޅުވީ، މީރާއަކީ ދައުލަތުގެ އެހެން އިދާރާތަކުގައި މަސައްކަތްކުރާ މުއައްޒަފުންނާ ހިލާފަށް ތަފާތުގޮތަކަށް ގިނައިރު މަސައްކަތްކުރަންޖެހޭ ބައެއް ކަމަށެވެ. ޒަރީރު ވިދާޅުވީ މުއައްޒަފުން ހިފެހެއްޓުމުގެ ދަތިކަން ނިހާޔަތަށް ހުރިއިރު ތަނުން ވަކިވާ މުއައްޒަފުންގެ ނިސްބަތް މިހާރޔު ހުރީ 21 އިންސައްތައިގަކަމަށެވެ. އެހާގިނައިރު އަދި މުއައްޒަފުންނަށް ފަޒީފާގެ ގޮތުން ހިފެހެއްޓުންތަކެއް ހުންނައިރު މުއައްޒަފުންގެ މުސާރަ ދަށްވުމުގެ މައްސަލަ ބޮޑުކަމަށް ޒަރީރު ފާހަގަކުރެއްވިއެވެ.
ޒަރީރު ވިދާޅުވީ ސިވިލްސާވަންޓުންގެ ތެރެއިން 30 ހާސް ރުފިޔާ ލިބޭ ފަންތީގެ މުއައްޒަފުންނަށް، މީރާގައި ނަމަ ލިބެނީ 18 ވަރަކަށް ހާސްރުފިޔާކަމަށާއި، މިއީ އެ އިދާރާގެ މުއައްޒަފުންވެސް ފާހަގަކުރަމުން އަންނަ ކަމެއްކަމަށެވެ. އޭނާ ވިދާޅުވީ މުއައްޒަފުން ލިބުން ދަތިވުމުގެ މައްސަލާގައި އަތޮޅުތެރޭގައި ގާއިމްކޮށްފައިވާ ގޮފިތައް މިހާރު ބަންދުކުރުމާ ގާތަށް ގޮސްފައިވާކަމަށެވެ. މީގެ އިތުރުން އަމިއްލަ ކުންފުނިތަކުގެ ތެރެއިން ޓެކްސް އަދި މާލީ ކުންފުނިތަކުން މީރާގެ މުއައްޒަފުންނަށް ބޮޑު ޑިމާންޑެއް އޮންނައިރު، މީރާގެ މުއައްޒަފެއްނަމަ، އިންޓަވިއުއެއް ކުރުމެއްނެތި ވަޒީފާއަށް ނަގާކަމަށް ޒަރީރު ފާހަގަކުރެއްވިއެވެ.
މުއައްޒަފުން ތަނުން ވަކިވާ މައްސަލައަކީ އެ އިދާރާއިން ކުރަމުންދާ އޮޑިޓްތަކަށް އަދި ދައުލަތަށް ނުލިބިވާ ފައިސާ ހޯދުމުގައި އޮތް ވަރަށްބޮޑު ގޮންޖެހުމެއްކަމަށް ޓެކްސް ކޮމިޝަނަރު މިއަދު ފާހަގަކުރެއްވިއެވެ.
އަންނަ އަހަރު މީރާއަށް ކަނޑައަޅާފައިވާ ބަޖެޓާމެދު މާބޮޑު ޝަކުވާއެއް ނެތްކަމަށް މި ބައްދަލުވުމުގައި ޒަރީރު ވަނީ ފާހަގަކުރައްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
