ޔޫތު ހަބްގައި ވޯލްޑް ކަޕް ބަލަން ޚާއްޞަ 'ވޮޗް ޕާޓީ' އެއް ބާއްވަނީ

ފީފާ ވޯލްޑް ކަޕް 2026 ގެ ފޯރި ދިވެހި ޒުވާނުންނާ ހަމައަށް ފޯރުކޮށްދިނުމުގެ ގޮތުން، ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވުޒާރާއިން ޚާއްޞަ 'ވޮޗް ޕާޓީ' ސީރީޒްއެއް ބޭއްވުމަށް ނިންމައިފިއެވެ.

ލިލީމަގުގައި ހުންނަ ޔޫތު ހަބްގައި ކުރިއަށްދާ މި ހަރަކާތަކީ ޖޫން 11 އިން ޖުލައި 19 އަށް ބޭއްވުމަށް ހަމަޖެހިފައިވާ ހަރަކާތެކެވެ. މި މުއްދަތުގެ ތެރޭގައި ވޯލްޑް ކަޕްގެ ހުރިހާ މެޗެއް ވަގުތުން ދެއްކުމަށް ވަނީ ހަމަޖެހިފައެވެ.

އެއްފަހަރާ 250 މީހުންނަށް ތިބެވޭގޮތަށް ފަރުމާކޮށްފައިވާ މި މަރުކަޒުގައި ބާއްވާ ވޮޗް ޕާޓީއަކީ މުޅިން ހިލޭ، ކޮންމެ މީހަކަށްވެސް ބައިވެރިވެވޭނެ ގޮތަށް ހުޅުވާލެވިފައިވާ ކަމަށް އެ ވުޒާރާއިން ބުނެއެވެ.

މެޗުތައް ދެއްކުމުގެ އިތުރުން، މި ހަރަކާތުގެ ތެރެއިން ބައިވެރިންނަށް ހިލޭ ބުއިމާއި ކާބޯތަކެތި ލިބޭނެ ސްޓޯލްތަކެއް ހުންނާނެ ކަމަށް ވުޒާރާއިން މަޢުލޫމާތުދެއެވެ. އަދި ތަފާތު ކުޅިވަރުތަކާއި، ގުރުއަތުން ހޮވޭ ފަރާތްތަކަށް އަގުހުރި އިނާމުތަކެއް ދިނުމަށް ވެސް ވަނީ ރޭވިފައެވެ. މިގޮތުން ދިނުމަށް ހަމަޖެހިފައިވާ އިނާމުތަކުގެ ތެރޭގައި މުބާރާތުގެ ރަސްމީ ފުޓްބޯޅައާއި، 'ޔޫތު ބައި ޖިމްނޭޝިއާ'ގެ އެއް މަސްދުވަހުގެ ހިލޭ ޖިމް މެންބަރޝިޕް ހިމެނެއެވެ.

މި ހަރަކާތް ރަސްމީކޮށް ފެށުމުގެ ރަސްމިއްޔާތު އޮންނާނީ ޖޫން 11 ވާ ބުރާސްފަތި ދުވަހުގެ ރޭގައެވެ. މި ރަސްމިއްޔާތުގައި ސަރުކާރުގެ އިސްވެރިންނާއި، ފާހަގަކޮށްލެވޭ އެތުލީޓުންގެ އިތުރުން ދައުވަތު އެރުވޭ ޚާއްޞަ މެހެމާނުން ބައިވެރިވެވަޑައިގަންނަވާނެއެވެ. މީގެ އިތުރުން، މުބާރާތް ކުރިއަށްދާ މުއްދަތުގައި ކޮންމެ ހުކުރު ދުވަހެއްގެ ހަވީރު ކުޑަކުދިންނަށް ޚާއްޞަ ކުޑަކުދިންގެ ހަވީރުތަކެއް ވެސް ޔޫތު ހަބްގައި ކުރިއަށްދާނެއެވެ.

ޒުވާނުން ބާރުވެރިކުރުވުމާއި، ކުޅިވަރާއި ހަށިހެޔޮކަމާ ބެހޭ ވުޒާރާއިން ބުނީ، މި ހަރަކާތުގެ މައިގަނޑު މަޤްޞަދަކީ ކުޅިވަރުގެ ޒަރީޢާއިން ގައުމީ އެއްބައިވަންތަކަން އާލާކޮށް، ޒުވާނުންނަށާއި މުޅި މުޖުތަމައުއަށް ފައިދާހުރި، ހިތްހަމަޖެހޭ މާހައުލެއް ބިނާކޮށްދިނުން ކަމަށެވެ.

މި ބޮޑު ހަރަކާތް ކުރިއަށްގެންދިއުމުގައި ގިނަ މުއައްސަސާތަކެއްގެ އެހީތެރިކަން ލިބެމުންދާކަން ވުޒާރާއިން ފާހަގަކުރެއެވެ. އޭގެ ތެރޭގައި ޕީއެސްއެމް، މީޑިއާނެޓް، ޓީވީއެމް، ބްރިޓިޝް ހައި ކޮމިޝަން، ވިލާ ކޮލެޖް، އެލައިޑް އިންޝުއަރަންސް، ލިޓަސް، އައިސް ނެޓްވޯކް، ކޮކާކޯލާ، ބީއެމްއެލް، ޕްރޮކްސީ ހޯމް، މޯލްޑިވްސް ޕޯސްޓް އަދި އެފްއޭއެމް ހިމެނެއެވެ.