‏އިތުރު 6 ޕާކިން ބިލްޑިންގެ މަސައްކަތްވެސް ވަރަށް އަވަހަށް ފެށޭނެ: ވަޒީރު އަމީން

ސަރުކާރުގެ އަމާޒަކީ މާލެ ސަރަހައްދަށް ދިމާވެފައިވާ ޕާކިންގ ގެ މައްސަލަ ހައްލުކުރުމަށް މިއަދު ބިންގާ އެޅުނު ޕާކިންގ ބިލްޑިންގެ މަސައްކަތް ދެ އަހަރު ތެރޭގައި ނިންމާލުން ކަމަށާ، އިތުރު ހަ ޕާކިން ބިލްޑިންގ އެއްގެ މަސަައްކަތްވެސް ވަރަށް އަވަހަށް ފެށޭނެ ކަމަށް ދަތުރުފަތުރާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ބެޗު ކޮންސްޓްރަކްޝަންއާ ހަވާލުކޮށްގެން ހުޅުމާލެ ފޭސް 1ގައި ތަރައްގީ ކުރާ 13 ބުރީގެ ޕާކިން އިމާރާތުގެ ބިންގާ މިއަދު ވަނީ އަޅާފައެވެ.

'ނެކްސްޓް ބައި ބެޗު' (އެންއެކްސްޓީ)ގެ ނަމުގައި އަޅާ މި އިމާރާތަކީ ޕާކިން ބިލްޑިންއެއްގައި ހުންނަންޖެހޭ ހުރިހާ ވަސީލަތަކާ އެކު ތަރައްގީ ކުރާ ޒަމާނީ ޕާކިން ބިލްޑިން އެއް ކަމަށް ސަރުކާރުން ބުނެއެވެ.

އެގޮތުން މަޝްރޫޢު ނިމޭއިރު، 4 ފުރޮޅުލީ 800އަށް ވުރެ ގިނަ އުޅަނދު ޕާކު ކުރެވޭނެ ޖާގަ ހުންނާނެ ކަމަށާ، ސައިކަލު ޕާކު ކުރާނެ 500އަށް ވުރެ ގިނަ ޖާގަ ހުންނާނެ ކަމަށް ބުނެފައިވެއެވެ.

މީގެ އިތުރުން ޓްރެފިކަށް ދަތިނުވާނެހެން މި އިމާރާތުގައި ހީލިކްސް ރޭމްޕު ހުންނާނެކަންވެސް ފާހަގަކޮށްފައިވެއެވެ.

މި ރަސްމިއްޔާތުގައި ވާހަކަދައްކަވަމުން، ވަޒީރު އަމީން ވިދާޅުވީ، ސަރުކާރުގެ އަމާޒަކީ ދެ އަހަރު ދުވަހުގެ ތެރޭގައި އެ މަޝްރޫޢުގެ މަސައްކަތް ނިންމާލުން ކަމަށެވެ.

ސަރުކާރުގެ މި މަޝްރޫޢުގެ ތެރޭގައި ހިމެނޭ އިތުރު 6 ޕާކިން ބިލްޑިންގެ މަސައްކަތްވެސް ދިވެހި 6 ކުންފުންޏެއްގެ ދަށުން ވަރަށް އަވަހަށް ފެށިގެންދާނެ.

މުހައްމަދު އަމީން

މި ޕާކިންގ ބިލްޑިން ތަކުގެ ތެރެއިން، ކަނޑައެޅިފައިވާ ވަކި އުސޫލެއްގެ ތެރެއިން އާއްމު ޚިދުމަތްދޭ ފަރާތްތަކާއި ޚާއްސައެހީއަށް ބޭނުންވާ ފަރާތްތަކަށް ވަކި އިންސައްތައެއް ކަނޑައެޅިފައިވާ ކަމަށް އަމީން ފާހަގަކުރެއްވިއެވެ.

އަދި ސަރުކާރުން އަޅާ ޕާކިންގ ބީލްޑިންތަކުގެ މަސައްކަތް ނިމުމުން މާލޭގެ މަގުތައް އަމާންވެ، ވެހިކަލް ރެޖިސްޓާ ކުރުމަށް ދިމާވެފައިވާ ދަތިތަކަށް ހައްލެއް ލިބިގެންދާނެކަމަށްވެސް ވަޒީރު ވިދާޅުވިއެވެ.