ސްރީލަންކާގައި ނުކުޅެދުންތެރިކަން ހުންނަ ކިޔަވާކުދިންނަށް އެލަވަންސެއް
ލިޔުންތެރިޔާ
އަބްދުﷲ ހުސައިން
އަވަށްޓެރި ސްރީލަންކާގައި ތަނަވަސްކަން ކުޑަ އާއިލާތަކަށް ނިސްބަތްވާ، ނުކުޅެދުންތެރިކަން ހުންނަ ދަރިވަރުންނަށް މަހަކު 5،000 ރުޕީސްގެ މާލީ އިނާޔަތެއް ދިނުމަށް އެ ޤައުމުގެ ވަޒީރުންގެ މަޖިލީހުން ނިންމައިފިއެވެ.
ސްރީލަންކާ ސަރުކާރުން ހާމަކުރި ގޮތުގައި މި ޕްރޮގްރާމަކީ 2026 ވަނަ އަހަރުގެ ބަޖެޓުގެ ދަށުން ކުރިއަށްގެންދިއުމަށް ހަމަޖެހިފައިވާ ޚާއްސަ ޕްރޮގްރާމެކެވެ. މުޅި ޤައުމުގެ ސްކޫލްތަކަށް ހުޅުވާލައިގެން ކުރިއަށްގެންދިޔަ މި ފުރުސަތުގައި، މިހާތަނަށް ޖުމްލަ 5،530 ދަރިވަރުން ވަނީ މި އެލަވަންސް ލިބުމަށް ޝަރުތު ހަމަވާ ކަމަށް ކަނޑައަޅާފައެވެ. ޝަރުތުހަމަވާ ހުރިހާ ދަރިވަރުންނަށް މި އެލަވަންސް ދިނުމަށް ބޭނުންވާ ފައިސާ ހަމަޖެއްސުމަށްޓަކައި، އެ ޤައުމުގެ ތައުލީމާއި، މަތީ ތައުލީމާއި އަދި މަސައްކަތްތެރިކަމާ ބެހޭ ވަޒީރުގެ ހައިސިއްޔަތުން ބޮޑުވަޒީރު ހުށަހެޅުއްވި ކަރުދާސް މިހާރު ވަނީ ކެބިނެޓުން ފާސްކޮށްފައެވެ.
ސްރީލަންކާއިން މި އެލަވަންސް ދިނުމުގައި އެންމެ ބޮޑަށް ބަލާފައިވަނީ އެ އާއިލާއެއްގެ މާލީ ފުދުންތެރިކަމަށެވެ. އެގޮތުން، މި އެހީ ހަމަޖައްސައިދެނީ ހަމައެކަނި ތަނަވަސްކަން ދަށް، އެހީތެރިކަމަށް ހަގީގަތުގައިވެސް ބޭނުންޖެހިފައިވާ އާއިލާތަކުގެ ކުދިންނަށެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
