އަންނަ އަހަރު ބާއްވާ ވޯލްޑްކަޕްގެ ޓިކެޓް ގަންނަން 5 މިލިއަނަށް ވުރެ ގިނަ ފޯމު ހުށަހަޅައިފި: ފީފާ

2026 ވަނަ އަހަރުގެ ވޯލްޑް ކަޕްގެ ޓިކެޓް އަގު ބޮޑު ކަމަށް ބުނެ ފާޑުކިޔުންތައް އަމާޒުވެފައިވީ ނަމަވެސް، މިހާތަނަށް ފަސް މިލިއަނަށް ވުރެ ގިނަ ޓިކެޓަށް އެދޭ ފޯމު ހުށަހަޅައިފައިވާ ކަމަށް ފީފާއިން ބުނެފިއެވެ.

ފީފާއިން ބުނި ގޮތުގައި 2026 ވަނަ އަހަރު ބާއްވާ ވޯލްޑް ކަޕްގެ ޓިކެޓްތަކުގެ އަގު ބޮޑު ކަމަށް ބުނެ ސަޕޯޓަރުންގެ ފާޑުކިޔުންތައް އަމާޒުވެފައިވީ ނަމަވެސް، މިދިޔަ ބުރާސްފަތި ދުވަހު ޓިކެޓް ވިއްކަން ފެށި ފަހުން މިހާތަނަށް ފަސް މިލިއަނަށް ވުރެ ގިނަ ޓިކެޓަށް އެދޭ ފޯމު ވަނީ ހުށަހަޅާފައެވެ.

ޖޫން 11 އިން ޖުލައި 19 އަށް ކުރިއަށްދާ މި މުބާރާތަކީ 48 ޓީމު ބައިވެރިވާ ފުރަތަމަ ވޯލްޑް ކަޕެވެ.

ފީފާއިން ބުނި ގޮތުގައި 200 އަށް ވުރެ ގިނަ ގައުމުގެ ސަޕޯޓަރުން ޓިކެޓަށް އެދިފައިވާ އިރު، މިހާތަނަށް އެންމެ ގިނަ ބަޔަކު ބަލަން ބޭނުންވެފައިވަނީ ޖޫން 27 ގައި މިއާމީގައި ކޮލަމްބިއާ އާއި ޕޯޗުގަލް ބައްދަލުކުރާ ގްރޫޕް ސްޓޭޖް މެޗެވެ.

އަދި އެންމެ ގިނަ ޓިކެޓް އެދޭ ފޯމު ހުށަހަޅާފައިވަނީ މުބާރާތް ބާއްވާ ތިން ގައުމު ކަމަށްވާ އެމެރިކާ، ކެނެޑާ އަދި މެކްސިކޯ އިން ކަމަށާ، އެ ތިން ގައުމާ ޖެހިގެން އެންމެ ގިނަ ޓިކެޓް އެދޭ ފޯމު ހުށަހަޅާފައިވަނީ ކޮލަމްބިއާ، އިނގިރޭސިވިލާތް، އެކުއެޑޯ، ބްރެޒިލް، އަރޖެންޓީނާ، ސްކޮޓްލެންޑް، ޖަރުމަނު، އޮސްޓްރޭލިއާ، ފްރާންސް އަދި ޕެނަމާ އިން ކަމަށް ބުނެފައިވެއެވެ.

މި މުބާރާތް އެމެރިކާ، ކެނެޑާ އަދި މެކްސިކޯގައި ބާއްވާއިރު، ޓިކެޓްތަކުގެ އަގު ކަނޑައަޅާފައިވާ ގޮތާމެދު ވަރަށް ބޮޑަށް ފާޑުކިޔުންތައް އަމާޒުވެފައިވެއެވެ.

އެގޮތުން ފުޓުބޯޅަ ސަޕޯޓަރުންގެ ޖަމްއިއްޔާ (އެފްއެސްއޭ) އިން ވަނީ 2022 ވަނަ އަހަރު ގަތަރުގައި ބޭއްވި ވޯލްޑް ކަޕްގައި ގްރޫޕް ސްޓޭޖްގެ ޓިކެޓްތަކަށް ވުރެ މިފަހަރުގެ ޓިކެޓްތައް ތިން ގުނަ އަގުބޮޑު ކަމަށާއި، ފައިނަލް މެޗުގެ އެންމެ އަގުހެޔޮ ޓިކެޓްގެ އަގު 3،119 ޕައުންޑަށް އަރާ ކަމަށް ބުނެފައެވެ.

2022 ވަނަ އަހަރު ގްރޫޕް ސްޓޭޖް ޓިކެޓް 68.50 ޕައުންޑް، 164.50 ޕައުންޑް އަދި 219 ޕައުންޑް އަށް ލިބުނު އިރު، އަންނަ އަހަރު އިނގިރޭސިވިލާތާއި ކްރޮއޭޝިއާ އަދި ސްކޮޓްލެންޑާއި ބްރެޒިލް ކަހަލަ ގްރޫޕް ސްޓޭޖް މެޗުތަކުގެ ޓިކެޓްގެ އަގުތައް ވަނީ 198 ޕައުންޑް، 373 ޕައުންޑް އަދި 523 ޕައުންޑް އަށް ބޮޑުވެފައެވެ.

ކުއާޓާ ފައިނަލް ޓިކެޓްތައް 507 ޕައުންޑް، 757 ޕައުންޑް އަދި 1,073 ޕައުންޑަށް އަގުބޮޑުވާ އިރު، ސެމީ ފައިނަލް ޓިކެޓް 686 ޕައުންޑް، 1,819 ޕައުންޑް އަދި 2,363 ޕައުންޑަށް އަދި ފައިނަލްގެ އެންމެ އަގުހެޔޮ ޓިކެޓް ފެށެނީ 3,119 ޕައުންޑުންނެވެ. މީގެ އިތުރުން ކުޑަކުދިންނާއި އެހެނިހެން ގްރޫޕްތަކަށް އަގުހެޔޮކޮށް ޓިކެޓް ލިބޭނެ ގޮތްތަކެއް ހަމަޖައްސާފައެއްވެސް ނުވެއެވެ.

ސަޕޯޓަރުންގެ ޖަމްއިއްޔާތަކުން ވަނީ މި އަގުތަކުގެ ސަބަބުން ސަޕޯޓަރުންނަށް މުބާރާތް ބެލުމުގެ ފުރުސަތު ނުލިބުމުގެ ފުރުސަތު އެބައޮތް ކަމަށެވެ.

އަދި މިއީ، ހުރިހާ ގްރޫޕް ސްޓޭޖް މެޗުތަކަށް އެއް އަގެއް ކަނޑަނާޅައި، މެޗުގެ މަގުބޫލުކަމަށް ބަލައި އަގުތައް ކަނޑައަޅާ ފުރަތަމަ ފަހަރު ކަންވެސް އެ ޖަމިއްޔާއިން ފާހަގަކޮށްފައިވެއެވެ.