ކުރީގެ ޑެޕިއުޓީ ކޮމިޝަނަރ އޮފް ޕޮލިސް ޢަބްދުއްޝަކޫރު ނިޔާވެއްޖެ

ކުރީގެ ޑެޕިއުޓީ ކޮމިޝަނަރ އޮފް ޕޮލިސް ޢަބްދުއްޝަކޫރު ޢަބްދުالله މިއަދުގެ ވަގުތެއްގައި ނިޔާވެއްޖެއެވެ.

ޢަބްދުއްޝަކޫރު ޢަބްދުالله ނިޔާވެފައިވަނީ ހެނދުނު 10:15 ގައި އިންޑިއާގެ ބެންގަލޫރުގައި ކެންސަރު ބައްޔަށް ފަރުވާ ހޯދަމުންދަނިކޮށް ކަމަށް މައުލޫމާތު ލިބެއެވެ.

ޝަކޫރު ނިޔާވެފައިވަނީ އުމުރުން 75 އަހަރުގައެވެ.

ދަރިކަލުން އަދި ފުލުހުންގެ އިސް އޮފިސަރަކަށް ކުރިން ހުންނެވި އަހުމަދު ޝުހާދު ފޭސްބުކްގައި ކުރެއްވި ޕޯސްޓުގައި ވަނީ އޭނާގެ ބައްޕައަށް ހެޔޮ ދުއާ ކޮށްދިނުމަށް އެދިވަޑައިގެންފަ އެވެ.

ޢަބްދުއްޝަކޫރު ވަނީ ދިވެހިންގެ ފުލުހުންގެ ހިދުމަތުގައި 43 އަހަރު ހޭދަކޮށްފައެވެ. އަދި އޭގެ ކުރިން، އޭނާ ވަނީ ދިވެހިރާއްޖޭގައި އުފެއްދި އެންމެ ފުރަތަމަ ޑްރަގް ރިހިބިލިޓޭޝަން ސެންޓަރުގެ އިސްވެރިޔެއްގެ ގޮތުގައި މަސައްކަތް ކޮށްފައެވެ.

ޝަކޫރު ނިޔާވުމައި ގުޅިގެން ދިވެހި ފުލުހުންގެ ހިދުމަތުން ވެސް ވަނީ ތައުޒިޔާކިޔާފައެވެ.