ލޯނު ދެއްކިޔަސް މަޝްރޫޢުތައް ކުރިއަށްދާނެ؛ ތަރައްޤީގެ މަޝްރޫޢުއެއް ނުހިނގާ އެންމެ ރަށެއްވެސް ނޯންނާނެ: ތަރުޖަމާނު

ރާއްޖޭގައި ތަރައްޤީގެ މަޝްރޫޢުއެއް ނުހިންގާ އެންމެ ރަށެއްވެސް ނޯންނާނެ ކަމަށާ، ބައެއް ރަށްރަށުގައި އެއް މަޝްރޫޢުއަށްވުރެ ގިނަ މަޝްރޫޢު ހިނގަމުންދާ ކަމަށް ރައީސް އޮފީހުގެ އިސްތަރުޖަމާނު މުޙައްމަދު ހުސައިން ޝަރީފް (މުންދު) ވިދާޅުވެއްޖެއެވެ.

މި ސަރުކާރުން ވަނީ މިދިޔަ 45 އެއްހާ ދުވަސްތެރޭގައި 971 މިލިއަން ޑޮޮަރުގެ ދަރަނި ދައްކައި ޚަލާސްކޮށްފައެވެ. އެކަމުގެ ސަބަބުން މަޝްރޫޢުތައް ކުރިއަށް ނުދާކަމަށް ބައެއް ފަރާތްތަކުން ފާހަގަކުރެއެވެ.

އެކަން ފާހަގަކޮށް، މިއަދު އޮތް ޕްރެސާ ވިތް ސްޕޮކްސް ނިޔުސް ކޮންފަރެންސްގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މުންދު ވިދާޅުވީ ރާއްޖޭގެ ހުރިހާ ރަށެއްގައިވެސް މަޝްރޫޢުތައް ކުރިއަށްދާ ކަމަށެވެ.

ރާއްޖޭގައި މަޝްރޫޢު ނުހިނގާ ރަށެއް ނޯންނާނެ. އެއް މަޝްރޫޢުއަށްވުރެ ގިނަ މަޝްރޫޢު ހިނގާ ރަށްރަށް ހުންނާނީ. (އެކަން) ފަޚްރުވެރިކަމާއެކު އަބަދުވެސް ފާހަގަކުރަނީ އަޅުގަނޑުމެން. ބައެއް ތަންތާނގައި އެބަހުރި ވަރަށް ބައިވަރު މަޝްރޫއުތައް އެކި ހިސާބުތަކަށް ގޮއްސަ.

ރައީސް އޮފީހުގެ އިސްތަރުޖަމާނު މުޙައްމަދު ހުސައިން ޝަރީފް (މުންދު)

މުންދު ވިދާޅުވީ ވޭތުވެދިޔަ 45 އެއްހާ ދުވަސް ތެރޭގައި ސަރުކާރުން ގާތްގަނޑަކަށް މިލިއަނެއްހާ ޑޮލަރުގެ ލޯނު ދައްކާފައިވާ ކަމަށާ، އެ ދައްކާފައިވަނީ އެމްއެމްއޭއާއި ފިނޭންސް މިނިސްޓްރީ ގުޅިގެން ކަމަށެވެ.

އެކަން ކޮށްފައިވަނީ ބަޖެޓްގެ ތެރެއިން، ނުވަތަ މަޝްރޫޢުތަކުގެ ޕީއެސްއައިޕީ އެކަށައަޅާފައި ހުރި ލާރި، ޑޮލަރު ނުވަތަ ދިވެހި ރުފިޔާވިޔަސް، އެއަށް ހުޢްޓުމެއް އަރުވައިގެން ނުވަތަ ބޭނުންކޮށްގެނެއް ނޫން އެކަން ކުރީ.

ރައީސް އޮފީހުގެ އިސްތަރުޖަމާނު މުޙައްމަދު ހުސައިން ޝަރީފް (މުންދު)

މުންދު ވިދާޅުވިގޮތުން، ސުކޫކަށް ފައިސާ ދެއްކީ އެސްޑީއެއް ގައި ހުރި ފައިސާއިންނެވެ. އަދި އެކަން ކުރީ ޒިންމާދާރު ކަމަާއެކުގައެވެ.

”އެއްވެސް މަޝްރޫޢަކަށް އަޅުގަނޑުމެން މިދައްކާ ލޯނަކުން ނޫނީ ދަރަނި އަދާކުރުމުގެ ސަބަބަކުންނެއް ހުއްޓުމެއް ނޫނީ ލޮޅުމެއް ނާންނާނެ. އަޔަސް އަންނާނީ ކޭޝް ފްލޯގެ ސަބަބުން. ހަނގުރާމައިގެން ސަބަބުން ކޭޝް ފްލޯއަށް އަސަރުކުރޭ. ކޭޝް ފްލޯއަށް އަންނަ ބަދަލާއެކު މަޝްރޫތަކުގެ ޓައިމްލައިނަށް ބަދަލު އައި ނަމަވެސް އެއްވެސް މަޝްރޫޢުއެއް ހުއްޓައެއް ނުލާނަން.“ މުންދު ވިދާޅުވިއެވެ.