ޖަލުގައި ހުރި ލަންކާ ސްނައިޕަރާއި އެގައުމުގެ ސަރުކާރުން ބައްދަލުކޮށްފި

ކުރީގެ ރައީސުލްޖުމްހޫރިއްޔާ އަބްދުﷲ ޔާމީން އަބްދުލްގައްޔޫމް އަވަހާާރަކޮށްލަން އުޅުނުކަމުގެ ތުހުމަތުގައި ހައްޔަރުކުރެވުނު ސްރީލަންކާާގެ ރައްޔިތެއްކަމުގައިވާ ލަހިރު މަދުޝަންކަ އާއި އެގައުމުގެ ސަރުކާރުގެ މަންދޫބެއް ބައްދަލުކުރައްވައިފިއެވެ.

އެގައުމުގެ މީޑިޔާތަކުން ރިޕޯޓްކުރާ ގޮތުގައި ލަހިރު މަދުޝަންކައާއި ބައްދަލުކޮށްފައިވަނީ އެގައުމުގެ ސްޕޯޓްސް އެންޑް ޕްރިވިންޝިއަލް އެފެއާޒްގެ މިނިސްޓަރ، ފައިޒަރް މުސްތަފާއެވެ. ފައިޒަރް ލަހިރު އާއި ބައްދަލުކޮށްފައިވަނީ، ރައީސް އިބްރާހިމް މުހައްމަދު ސޯލިހުގެ ހުވާކުރެއްވުމުގެ ރަސްމިއްޔާތުގައި ބައިވެރިވުމަށް ކުރެއްވި ދަތުރުފުޅުގައެވެ.

މި ބައްދަލުވުމުގައި ލަންކާާއިން ރާއްޖެއަށް ކަނޑައަޅުއްވާފައިވާ ސަފީރުވެސް ވަނީ ބައިވެރިވެ ވަޑައިގަންނަވާފައެވެ. މީގެ ކުރިންވެސް ފައިޒަރް ވަނީ އިބްރާހިމް މުހައްމަދު ސޯލިހާއި ބައްދަލުކުރައްވާ، ލަހިރު މިނިވަން ވުމާއި ގުޅޭގޮތުން ވާހަކަދައްކާފައެވެ.

ސްނައިޕަރެއްގެ ތުހުމަތު ކުރެވޭ ލަހިރުއަށް ޝަރީއަތް ހިންގުމުގައި އިންސާފެއް ނެތި، ގިނަ ދުވަސްތަކަށް ދިގުލައި، ޖަލުގައި އެތަކެއް އަނިޔާތަކާއި ކުރިމަތިވަމުންދާތީ މީގެ ކުރިންވެސް އޭނާގެ އާއިލާއާއި އެމްނެސްޓީ އިންޓަރނޭޝަނަލް ފަދަ ބައިނަލްއަގްވާމީ ޖަމްއިއްޔާތަކުން ވަނީ، އޭނާގެ ހާލާއި މެދު ކަންބޮޑުވުން ފާޅުކޮށްފައެވެ.