ޚާރިޖީ ސިޔާސަތުގެ ފުރަތަމަ އަސާސަކީ ޤައުމީ މަސްލަހަތު: ހާރިޖިއްޔާ

ދިވެހި ޚާރިޖީ ސިޔާސަތުގެ ފުރަތަމަ އަސާސަކީ، ޤައުމީ ސިޔާދަތު ރައްކާތެރިކުރުމާއި، ޤައުމީ މަސްލަހަތު އިސްކުރުންކަމަށް ހާރިޖިއްޔާއިން ބުނެފިއެވެ.

ކުރީގެ ރައީސް ނަޝީދު މިއަދު މާލެ ވަޑައިގަތުމަށްފަހު ނޫސްވެރިންނާ ވާހަކަދައްކަވަމުން ވަނީ، މޮރިޝަސް އާއެކު  އޮތް ގުޅުން ރަނގަޅުކުރުމަށް އެބޭފުޅުންގެ ޝައުގުވެރިކަން ހުރިކަމަށް ވިދާޅުވެފައެވެ. އަދި ދިވެހި ސަރުކާރުން މި ފުރުސަތުގެ ބޭނުން ހިފައިގެން މޮރިޝަސް ސަރުކާރާއެކު ވާހަކަތައް ކުރިއަށްގެންދާނެ ކަމަށް އުއްމީދުކުރާކަމަށް ވަނީ ވިދާޅުވެފައެވެ.

މިކަމާ ގުޅިގެން ދިވެހި ހާރިޖިއްޔާއިން ނެރުނު ބުނީ ހާރިޖިއްޔާގެ ފުރަތަމަ އަސާސަކީ ދިވެހިރާއްޖޭގެ ޤައުމީ ސިޔާދަތު ރައްކާތެރިކުރުމާއި، ޤައުމީ މަސްލަހަތު އިސްކުރުމާއި، އިންސާނީ ޙައްޤުތައް ޙިމާޔަތްކުރުންކަމަށެވެ. މި ސިޔާސަތަކީ ބައިނަލްއަޤުވާމީ ޤާނޫނުތަކަށް އިޙުތިރާމްކުރާ، ޒިންމާދާރު އަދި މިނިވަން ސިޔާސަތެކެވެ.

ހާރިޖިއްޔާއިން ބުނީ މިނިވަން މުސްތަޤިއްލު ދައުލަތެއްގެ ހައިސިއްޔަތުން، ރާއްޖޭގެ ޚާރިޖީ ސިޔާސަތު ބައްޓަންކޮށް ކުރިއަށް ގެންދަނީ ޤައުމީ މަސްލަހަތުގެ މައްޗަށް ބިނާވެފައިވާ، ކަނޑައެޅިފައިވާ ނިޒާމުތަކުގެ ތެރެއިން ކަމަށެވެ. މިގޮތުން ރާއްޖޭގެ ތަރައްޤީގެ ބައިވެރިންނާއެކު އޮންނަ ޒަމާންވީ ގުޅުންތަކަށާއި، އެކަކު އަނެކަކަށް ކުރާ އިޙުތިރާމާއި ދެފަރާތުގެ މަސްލަހަތުގެ މައްޗަށް ބިނާވެފައިވާ ގާތް ގުޅުމެއް، ހުރިހާ ޤައުމުތަކާއެކު ބޭއްވުމަށް ދިވެހިރާއްޖެއިން ނުހަނު ބޮޑު އިސްކަމެއް ދޭކަމަށް ހާރިޖިއްޔާއިން ބުންޏެވެ.

ހާރިޖިއްޔާއިން ބުނީ ސަރަޙައްދީ ޞުލްޙަ މަސަލަސްކަމާއި، ކަނޑުގެ ސަލާމަތާއި، ދެމެހެއްޓެނިވި ތަރައްޤީ ފަދަ ކަންކަމުގައި، ޤައުމުތަކާއި ޖަމްޢިއްޔާތަކާއެކު އޮންނަ އެއްބާރުލުން ހަމަހަމަ އަދި ބިނާކުރަނިވި ގޮތެއްގައި ވަރުގަދަކުރުމަށް ސަރުކާރުން ދެމިއޮންނާނޭކަމަށެވެ.

ރައީސް ނަޝީދަށް އިޝާރާތް ކުރައްވައި ހާރިޖިއްޔާއިން ވިދާޅުވީ، ޚާރިޖީ ސިޔާސަތާއި، ސަރަޙައްދީ ސަލާމަތާއި، ބައިނަލްއަޤުވާމީ ގުޅުންތަކާ ގުޅޭގޮތުން، ޚާއްޞަކޮށް ދައުލަތުގެ މަތީ މަގާމުތައް ފުރުއްވާފައިވާ ބޭފުޅުން ފާޅުކުރައްވާ ހިޔާލުތަކަކީ އޭގެ ސަބަބުން ނޭދެވޭ ނަތީޖާތަކެއް ނުކުމެދާނެ ކަންކަށެވެ. އެހެންކަމުން ދައްކާ އެފަދަ ވާހަކަތަކަކީ ޙަޤީޤަތުގެ މައްޗަށް ބިނާވެފައިވާ، ޤައުމީ އެއްބައިވަންތަކަމަށާއި ރާއްޖޭގެ މުވައްސަސާތަކަށް އޮންނަ އިތުބާރު ބޮޑުކުރުމަށް ބާރުއަޅާ ވާހަކަތަކަކަށް ވާންޖެހެނޭކަމަށް ވަނީ ބުނެފައެވެ. އަދި، ޤައުމީ މަސްލަހަތާއި ބޭރު ޤައުމުތަކާއެކު އޮންނަ ގުޅުންތަކަށް އަސަރުކުރާ ފަދަ ކަންކަމުގައި ވާހަކަދައްކާއިރު، ނުހަނު ބޮޑަށް ސަމާލުވެ، ޙިކުމަތްތެރިކަން އިސްކުރުމުގެ މުހިންމުކަން ހާރިޖިއްޔާއިން ވަނީ ބުނެފައެވެ.

ހާރިޖިއްޔާއިން ބުނީ ދޭދޭ ޤައުމުތަކުގެ މެދުގައި އޮތް ޚާރިޖީ ސިޔާސަތެއް ކުރިއެރުވުމުގައި ދިވެހި ސަރުކާރު ސާބިތުކަމާއެކު ދެމިއޮންނާނެ ކަމަށެވެ.