ތިމަރަފުށީ ސްކޫލު ލެބޯޓަރީ ގޮއްވާލަން ރޭވުން: ބައެއް ދައުވާތައް ސާބިތު، އެކަކު ފިޔަވާ އެންމެން މިނިވަންވެއްޖެ

ތ. ތިމަރަފުށީގައި އޮޕަރޭޓް ކުރަމުންދިޔަ އައިސް އެޖަމާއަތަށް ތާއީދުކުރާ ހަރުކަށި ފިކުރުގެ ސެލްއަކުން ރާއްޖޭގައި ޓެރަރިސްޓު ހަމަލާއެއް ދޭން ރޭވިކަމަށް ދައުވާކޮށްފައިވާ މައްސަލާގައި ބައެއް ދައުވާތައް ސާބިތުވާ ކަމަށް ކްރިމިނަލް ކޯޓުން މިއަދު ހުކުމްކޮށްފި އެވެ.

މި މައްސަލާގައި ހަތް ދައުވާއެއް އަށް މީހެއްގެ މައްޗަށް އުފުލާ ކްރިމިނަލް ކޯޓަށް ހުށަހަޅާފައިވެ އެވެ. އޭގެ ތެރެއިން ތިން ދައުވާ ބައެއް މީހުންގެ މައްޗަށް ވަނީ ސާބިތުވެފަ އެވެ.

އެގޮތުން ޢަބްދުالله ޢިމާދުގެ މައްޗަށް ވަނީ ޓަރަރިސްޓު ޖަމާޢަތަކަށް ތާއީދުކުރުމުގެ ދައުވާ ސާބިތުވެފަ އެވެ. އޭނާގެ މައްޗަށް އައީ ތިން އަހަރުގެ ޖަލު ހުކުމެކެވެ.

ޢަލީ މުނީޒުގެ މައްޗަށްވެސް މި ދައުވާ ސާބިތުވެ 1 އަހަރާއި 9 މަހާއި 1 ދުވަހަށް ޖަލަށްލުމަށް ހުކުމްކުރި އެވެ. އަދި ޢަލީ އަރުޙަމް މުޙައްމަދުގެ މައްޗަށްވެސް ތިން އަހަރުގެ ޖަލު ހުކުމެއް އައެވެ. ނަމަވެސް ޖަލުގައި ހުރި މުއްދަތު އުނިކުރުމުން އިމާދު އާއި މުނީޒު ތަންފީޒު ކުރާނެ އަދަބެއް ނެތެވެ.

މީގެ އިތުރުން ހަނގުރާމައަށް ދާން އުޅުމުގެ ދައުވާ ޢަލީ އަރުޙަމް މުޙައްމަދުގެ މައްޗަށް ސާބިތުވެ 5 އަހަރަށް ޖަލަށްލުން ވަނީ ހުކުމްކޮށްފަ އެވެ.

ޢަދުލުއިންސާފު ޤާއިމުކުރުމަށް ހުރަސްއެޅުމުގެ ދައުވާ ޢަބްދުالله ޢިމާދު އާއި އިބްރާހީމް ލޫތުގެ މައްޗަށް ސާބިތުވި އެވެ. އެހެން ކަމުން 1 އަހަރާއި 7 މަހާއި 6 ދުވަހަށް ޖަލަށްލުމަށް ވަނީ ހުކުމްކޮށްފަ އެވެ. ޖަލުގައި ހުރި މުއްދަތު އުނިކުރުމުން ތަންފީޒު ކުރާނެ އަދަބެއް ނެތެވެ.

މި މައްސަލާގައި ކޮށްފައިވާ ޓެރަރިޒަމްގެ އަމަލެއް ކުރުމަށް ބޭނުންވާ އުކުޅުތައް ދަސްކުރުމާއި ޓެރަރިސްޓް ޖަމާޢަތެއްގެ މެންބަރަކަށްވުމއި ޓެރަރިޒަމްގެ އަމަލެއްކުރުމަށް ރޭވުމާއި ޓެރަރިޒަމްގެ ޢަމަލެއް ކުރުމަށް ހިތްވަރު ދިނުމުގެ ދަޢުވާތައް ސާބިތުނުވާކަމަށް ކްރިމިނަލް ކޯޓުން ވަނީ ނިންމަވާފަ އެވެ. މައިގަނޑު ސަބަބަކީ މައްސަލާގައި ހުށަހެޅިފައިވާ މޮބައިލް ފޯނަކުން ނެގިފައިވާ ޑާޓާގެ ނަޒާހާތްތެރިކަމާމެދު ސުވާލު އުފެދިފައިވުމެވެ.

ޕީޖީ އޮފީހުން ބުނީ މި މައްސަލާގައި ސާބިތުނުވާކަމަށް ނިންމާފައިވާ ދަޢުވާތައް އިސްތިއުނާފުކުރުމާމެދު، މައްސަލައިގެ ރިޕޯޓު ލިބުމުން އެ އޮފީހުން ގޮތެއް ނިންމާނެ ކަމަށެވެ.

ކޯޓްގެ މިއަދުގެ ނިންމުމާއެކު ޢަލީ އަރުޙަމް މުޙައްމަދު ފިޔަވައި މައްސަލާގައި ދަޢުވާލިބޭ އެންމެން ވަނީ ބަންދުން މިނިވަންވެފަ އެވެ.