މޯލްޑިވް ގޭހުގެ ކުރީގެ އެމްޑީ މާނު، އެމްއައިބީއަށް މިލިއަނަކަށްވުރެ ގިނަ ރުފިޔާ ދައްކަންޖެހިއްޖެ

މޯލްޑިވް ގޭހުގެ ކުރީގެ އެމްޑީ ޢަބްދުﷲ މައުމޫނުގެ މައްޗަށް މޯލްޑިވްސް އިސްލާމިކް ބޭންކަށް މިލިއަނަކަށްވުރެ ގިނަ ރުފިޔާ ދެއްކުމަށް ސިވިލްކޯޓުން ހުކުމްކޮށްފިއެވެ.

ސިވިލްކޯޓުން މާނުގެ މައްޗަށް މި ހުކުމް ކޮށްފައިވަނީ، އިސްލާމިކް ބޭންކުން ނަގާފައިވާ ލޯނަކަށް އެއްބަސްވުމުގައިވާ ގޮތަށް ފައިސާ ދައްކަމުން ނުދާތީވެ، އެ ބޭންކުން ސިވިލްކޯޓަށް ހުށަހެޅި ދައުވާގައެވެ. މި ދައުވާ ކުރިއަށްގެންގޮސްފައިވަނީ، މާނު ޝަރީއަތަށް ހާޒިރުނުވުމުން ޢައިރުހާޒިރުގައެވެ.

އިސްލާމިކް ބޭންކުން ކުރި ދައުވާގައި ވަނީ މާނަށް ދޫކޮށްފައިވާ ޑިމިނިޝް މުޝާރަކާ ޕްރޮޕަޓީ ފައިނޭންޝަލް ފެސިލިޓީ ނުދެއްކުމުން ޖޫންމަހުގެ 24 ވަނަ ދުވަހަށްވާ 1.1 މިލިއަން ރުފިޔާ އާއި ޗެރިޓީގެ ގޮތުގައި 7،498.29 ރުފިޔާ ހޯދުމަށެވެ.

ކޯޓުން ކުރި އެ ހުކުމްގައި ބުނެފައިވަނީ  ފައިސާއަކީ މާނު އެމްއައިބީއަށް ދައްކަންޖެހޭކަމަށް ސާބިތުވާކަމަށެވެ. އެގޮތުން ޖުލައިމަހުގެ 24 ވަނަ ދުވަހުން ފެށިގެން 6 މަސްދުވަހުގެ ތެރޭގައި ދައްކައި ހަލާސްކުރުމަށް ކޯޓުގެ ހުކުމްގައި ވަނީ ބުނެފައެވެ.

މާނުގެ މައްޗަށް އެއް މިލިއަނަށްވުރެ ގިނަ ރުފިޔާ އެމްއައިބީއަށް ދެއްކުމަށް ހުކުމްކުރިއިރު، މަނީ ލޯންޑްރިން މައްސަލައެއް މިދިޔަ އަހަރުގެ އޮގަސްޓްމަހު ފުލުހުން ވަނީ ބަލަން ފަށާފައެވެ. އޭރު އެ މައްސަލަ ބަލަންފަށާފައިވަނީ ވަރަށް ގިނަދުވަހު ބޭރުގައި އުޅުއްވުމަށްފަހު މާނު އެނބުރި މާލެ ވަޑައިގެންނެވިތަނުންނެވެ.

މާނުގެ މައްޗަށް އެންޓި ކޮރަޕްޝަން ކޮމިޝަނުން އެދިފައިވަނީ މާނު މޯލްޑިވް ގޭހުގެ އެމްޑީކަމުގައި ހުންނެވިއިރު ކައްކާ ގޭސް ގެނައުމުގެ މުއާމަލާތުގައި ބޭރުގެ ކުންފުންނަކުން 3 މިލިއަނަށްވުރެ ގިނަ ރުފިޔާ ރިޝްވަތުގެ ގޮތުގައި ހިފާފައިވާކަމަށް ބުނެއެވެ. މި މައްސަލާގައި އޭސީސީން ވަނީ މާނުގެ މައްޗަށް 7 ދައުވާއެއް ކޮށްދިނުމަށް އެދިފައެވެ.

ނަމަވެސް މާނު ވަނީ އޭނާގެ މައްޗަށް ކުރާ ދައުވާތަކަށް އިންކާރުކޮށްފައެވެ.