ތިނަކުން އެކެއް: ހަނުހުރެވޭކަށެއް ނެތް!

"އެއީ ހަމަ ވާންވީ ގޮތް"، މިއީ އާންމުގޮތެއްގައި އަޅުގަނޑުމެންގެ މުޖުތަމައުއާއި އާންމު ދިރިއުޅުމުގައި އިވޭ އަޑެކެވެ. އާންމުގޮތެއްގައި މި ބަސް ބޭނުންކޮށް އުޅެނީ، ބަދުނަސީބުވެރި ނުވަތަ އަނިޔާވެރިކަމެއް ދިމާވުމުން އެއީ އެމީހަކަށް ހައްގު މިންވަރެއްކަމުގައި ބުނުމަށެވެ. އާފިޔާ (އަސްލު ނަމެއް ނޫން) އޭނާގެ މައިދައިތަ ގާާތުގައި، ފިރިމީހާގެ ފަރާތުން ޖިސްމާނީ އަނިޔާ ލިބޭކަމަށް ބުނުމުން އާފިޔާއަށް ޖަވާބުގައި ލިބުނީ އެއީ ވާންވީ ގޮތް ކަމުގައެވެ.

ކައިވެނީގެ މަތިވެރި ގުޅުމުން އާފިޔާއާއި އޭނާގެ ފިރިމީހާ ގުޅުނުއިރު، އާފިޔާއަށް ހީވެފައިއޮތީ އޭނާގެ ފިރިމީހާއަކީ ޚުލްގު ހެޔޮ، ހަރުދަނާ މީހެއް ކަމަށެވެ. ކައިވެނީގެ ފުރަތަމަ ދުވަސްކޮޅު މިފަދަ ފޮނި އިހުސާސެއް މަތީ އާފިޔާ ހުއްޓާ، ކުއްލިއަކަށް އޭނާ ހުންނަންޖެހުނީ ވިހަ ކަށިތަކެއްގެ މަތީގައެވެ. ފުރަތަމަ ދަރިއަށް ބަނޑުބޮޑު ވުމާއި އެކު، ފިރިމީހާގެ ފަރާތުން އަޅާލުން ލިބުން ކުޑަވެ، ގޭތެރޭގައި އެކަނިވެ ބާކީވެދިޔައެވެ. އެކަމުގެ ޝަކުވާކުރުމުން، ފިރިމީހާގެ ކިބައިން ލިބުނީ ވިހަ ބަސްތަކާއި ވޭންދެނިވި އަނިޔާއެވެ. އެ އަނިޔާ ތަހައްމަލް ކުރާ ހާލު ފުރަތަމަ ދަރިފުޅު މި ދުނިޔެއަށް ގެނެސްދިނެވެ. ދަރިފުޅު އައުމާއި އެކު ފިރިމީހާއަށް ބަދަލު އަންނާނެ ކަމަށް ހީކޮށް، ލިބުނު އަނިޔާތައް އާފިޔާ ސިއްރުކުރިއެވެ. ނަމަވެސް ކަންދިމާވީ މުޅިން އިދިކޮޅަށެވެ.

އާފިޔާއަށް އޭނާގެ ފިރިމީހާ އަކީ މަސްތުވާތަކެއްޗަށް ދެވިހިފާފައިވާ މީހެއްކަން ފަޅާއެރުމުން އެކަން ހުއްޓުވުމަށް މަސައްކަތްކުރިއެވެ. ނަތީޖާއަކަށްވީ، އެތަކެއް އަނިޔާތަކާއި އާފިޔާ ކުރިމަތިލުމެވެ. އާފިޔާގެ ތުއްތު ދަރިފުޅު ރޯލަރޯލައި އޮތްހާލުގައި އާފިޔާ ގައިގައި ތަޅަމުންދިޔައިރު، ފިރިމީހާއަށް ދުނިޔޭގެ ހޭވެރިކަމެއް ނެތެވެ. ތިހުރީ ބުނި އަގެއް ދީގެން ގެނެސްފައިކަމަށާއި، ހުންނަންވާނީ މަޑުންކަމަށްބުނެ އޭނާގެ ގަަދަކަމާއި "ފިރިހެންވަންތަކަން" ދައްކަމުންދިޔައެވެ.

އެންމެފަހުން އެ އަނިޔާއަށް ކެތްނުވެގޮސް، އާފިޔާ ނިންމީ މައްސަލަ ހައްލުކުރާށެވެ. ނަމަވެސް ރިޕޯޓްކުރާނެހާ ހިތްވަރެއް އާފިޔާ ގަޔަކުއެއް ނެތެވެ. އާއިލާއަށް ލިބިދާނެ ހުތުރުނަމަކަށްޓަކައި ކަމަށްބުނެ، ދަރިފުޅު ބިކަވާނެ ކަމަށްބުނެ ފިރިމީހާ އާއިލާ ތެރެއިން މައްސަލަ ހައްލުކުރެވޭތޯ ބެލީއެވެ. މައިދައިތައަށް ހިތުގެ އުދާސްތައް އޭނާ ބަންޑުން ކޮށްލިއެވެ. ޖަވާބަކަށްއައީ ކުރިންވެސް ބުނިފަދައިންނެވެ. އެއީ އާފިޔާއަށް ހަމަވާންވީ ގޮތްކަމަށާއި އަނބިންނަކީ ބަސްބުނެ ހަދަންޖެހޭ ބައެއް ނޫންކަމަށް މައިދައިތަ ބުންޏެވެ.

ސުވާލަކީ މިއީ ހަމަ އާފިޔާއަށް ހައްގު މިންވަރުބާވައެވެ؟ އާފިޔާއަށް ލިބެމުންދިޔަ އަނިޔާގައި އާފިޔާގެ ކުށެއް އެބައޮތްބާވައެވެ؟ އަނބިމީހާއަށްވުމުގެ ވާޖިބު އަދާކުރުމުން އޭގެ އަދަބަކީ އަނިޔާ ބާވައެވެ؟ ހަގީގަތަކީ މި ސުވާލުތަކުގެ ޖަވާބަކީ ނޫނެކޭކަމެވެ. ނަމަވެސް މަދުމަދުން ނަމަވެސް އަޅުގަނޑުމެންގެ މުޖުތަމައުގައި އަންހެނުންނާއި އަންހެންކުދިންނަށް ކުރާ އަނިޔާއަކީ އާދައިގެ ކަމަކަށް ހަދާފައިވާ ކަމީ ހިތާމަކުރަންޖެހޭކަމެވެ. އާފިޔާގެ މައިދައިތަ ފަދަ އެތައް ބަޔަކު މި ދިވެހި ދީބުގައި އުޅޭކަމެވެ.

މިއަދަކީ އާފިޔާފަދަ އަންހެނުންގެ ހައްގުގައި އަދި އާފިޔާގެ މައިދައިތަ ފަދަ މީހުންނާއި ދެކޮޅަށް ފާހަގަކުރާ ބައިނަލްއަގްވާމީ އަންހެނުންނަށް ކުރާ އަނިޔާ ހުއްޓުވުމުގެ ދުވަހެވެ. މި ދުވަހުގެ މުނާސަބަތުގައި ކުރިއަށް އޮތް ސޯޅަ ދުވަހަށް ދުނިޔޭގެ އެކި ކަންކޮޅުތަކުގައި ހަރަކާތްތައް ހިންގުމަށް ވަނީ ހަމަޖެހިފައެވެ.

ދިރާސާތަކުން ދައްކާގޮތުގައި 15 އަހަރާއި 49 އަހަރާ ދެމެދުގެ ކޮންމެ ދިވެހި އަންހެނަކީ އުމުރުގެ ކޮންމެވެސް ހިސާބެއްގައި އަނިޔާއެއްގެ ޝިކާރައަކަށްވެފައިވާ މީހެކެވެ. ތިނަކުން އެކަކަށް މިފަދަ އަނިޔާ، އަޅުގަނޑުމެންގެ އިސްލާމީ މުޖުތަމައުގައި ލިބޭއިރު އާންމުކޮށް މިކަން ހިނގަނީ އެންމެންނަށްވެސް އެނގޭ ބީދައިންނެވެ. ނަމަވެސް ހިތާމައަކީ ގިނަ ފަރާތްތަކުން އަދިވެސް މިފަދަ މައްސަލަތައް ރިޕޯޓްނުކޮށް ހަނުހުންނަކަމެވެ. ހަނުހުރުމަކީ ބޮޑު ޚިޔާނާތަކަށް ވަނީ މިފަދަ ދަނޑިވަޅުތަކުގައެވެ.

އާފިޔާ ފަދަ އެތަކެއް އަންހެނުން މި ދިވެހި މުޖުތަމައުގައި އުޅޭނެއެވެ. އެފަދަ އަނިޔާތަކުން އެ އަންހެނުން މިންޖުކުރުމަކީ ދައުލަތާއި މުޖުތަމައުގެ ކޮންމެ ފަރުދެއްގެ ކޮނޑުގައި އެޅިފައިވާ މަތިވެރި ޒިންމާއެކެވެ. މުޖުތަމައުގެ ފަރުދުން، އެބައިމީހުންގެ ފަރުދީ ޒިންމާ އަދާކުރާށެވެ. ދައުލަތުން ގާނޫނުތައް ވަރުގަދަކޮށް، އެގާނޫނު ތަންފީޒުކުރުންވެސް ވަރުގަދަކުރާށެވެ. އޭރުން ދެފަރާތުގެ މަސައްކަތުން ތިނަކުން އެކެއްގެ އަދަދު މަދުކުރެވޭނެއެވެ. ހަނުހުރުމުގެ ޚިޔާނާތުގެ ބަދަލުގައި ފާޅުކުރުމުގެ އަމާނާތް އިތުރުވާނެއެވެ.