މެމްބަރުން ހަމަނުވާތީ އިކެލްޝަނުން، އެމްއާރުއެމް އުވާލައިފި
ލިޔުންތެރިޔާ
އަބްދުﷲ ހުސައިން
ސިޔާސީ ޕާޓީގެ ޤާނޫނުގައި ބުނާ އަދަދަށް މެމްބަރުން ހަމަނުވާތީވެ، އިލެކްޝަންސް ކޮމިޝަނުން މޯލްޑިވްސް ރިފޯމް މޫވްމަންޓް (އެމް.އާރު.އެމް) އުވާލައިފިއެވެ.
އިލެކްޝަންސް ކޮމިޝަނުން މިއަދު އާއްމުކުރި އިއުލާނުގައި ބުނެފައިވަނީ، ސިޔާސީ ޕާޓީގެ ޤާނޫނުގެ 30 ވަނަ މާއްދާގައި ބަޔާންކޮށްފައިވާ ގޮތުގެމަތިން ސިޔާސީ ޕާޓީއެއް ދެމިއޮތުމަށް ޤާނޫނު ލާޒިމުކުރާ 3000 މެމްބަރުން ހަމަނުވާތީވެ، މިއަދުން ފެށިގެން ސިޔާސީޕާޓީތަކުގެ ދަފްތަރުން އެމްއާރުއެމް އުނިކޮށްފައިވާކަމަށެވެ.
އެމްއާރުއެމް އުވާލުމުގެ ކުރިން އިލެކްޝަންސް ކޮމިޝަނުން ވަނީ މެމްބަރުން ހަމަކުރުމަށް ފުރުސަތުވެސް ދީފައެވެ. އެމްއާރުއެމަށް މެމްބަރުން ހަމަކުރުމަށް ފުރުސަތު ދީފައިވަނީ، 2023 ވަނަ އަހަރުގެ ފެބްރުއަރީ 22 ވަނަ ދުވަހުން ފެށިގެން 3 މަސްދުވަހުގެ މުއްދަތަކަށެވެ. އޭގެ ފަހުން އެމްއާރުއެމް އުވާލުމަށް ނިންމާފައިވާކަން އިލެކްޝަނުން ހާމަކޮށްފައިވަނީ، މިދިޔަ އަހަރުގެ އޮކްޓޯބަރުމަހުގެ 25 ވަނަ ދުވަހެވެ.
އެމްއާރުއެމްއަކީ ކުރީގެ ރައީސް މައުމޫން ޢަބްދުލްޤައްޔޫމް އިސްވެ ހުންނަވައިގެން 2019 ވަނަ އަހަރު އުފައްދަވާފައިވާ ސިޔާސީ ޕާޓީއެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
