މާލެއާ ތިލަފުއްޓާ ދެމެދުގައިވާ ޗެނަލްތަކުން ދަތުރު ނުކުރަން އަނެއްކާވެސް އިލްތިމާސްކޮށްފި
ލިޔުންތެރިޔާ
އަބްދުﷲ ހުސައިން
ތިލަމާލެ ބްރިޖް މަޝްރޫޢުގެ މަސައްކަތް ކުރިއަށްދާތީވެ، މާލެއާ ތިލަފުއްޓާ ދެމެދުގައިވާ ޗެނަލްތަކުން ދަތުރު ނުކުރަން އަނެއްކާވެސް އިލްތިމާސްކޮށްފިއެވެ.
މިކަމާ ގުޅޭގޮތުން ފުލުހުން މިއަދު ބުނެފައިވަނީ، މާލެ - ތިލަފުށި ގުޅުވާލުމުގެ މަސައްކަތް މާލެއާ ތިލަފުއްޓާ ދެމެދުގައިވާ ތިން ޗެނަލުގައި ކުރިއަށްދާއިރު، މި ފަހަކަށް އައިސް އެތަންތަނުން އާއްމު ދަތުރުފަތުރަށް ބޭނުންކުރަމުންގެންދާކަން ފާހަގަކުރެވިފައިވާކަމަށެވެ. ފުލުހުން ބުނީ އެ ޗެނަލްތަކުން ދަތުރުކުރުމަކީ ރައްކާތެރިކަމަކަށް ނުވާތީވެ، މީގެ ކުރިންވެސް އެސަރަހައްދު ބޭނުން ނުކުރަން އިލްތިމާސް ކޮށްފައިވާނޭ ކަމަށެވެ.
މިއީ ނުރައްކާތެރި ހާދިސާއެއް ހިނގާފާނޭ ކަމަކަށްވުމުން، އެ މަޝްރޫޢުގެ މަސައްކަތް ނިމި، އެ ސަރަހައްދު ބޭނުންކުރުމަށް ރަސްމީކޮށް ހުޅުވާލެވެންދެން އާއްމު ދަތުރުފަތުރުގެ ބޭނުމަށް ތިން ޗެނަލް ބޭނުންނުކުރުމަށް ފުލުހުން ވަނީ އިލްތިމާސްކޮށްފައެވެ.
މާލެ އާއި ވިލިމާލެ އަދި ވިލިމާލެ-ގުޅީފަޅު ދެމެދުގައި އޮންނަ ކަނޑުއޮޅި ބަންދު ކޮށްފައިވާއިރުވެސް އެ ސަރަހައްދުން އުޅަނދުތައް ދަތުރު ކުރާތީ ޓްރާންސްޕޯޓް މިނިސްޓްރީންވެސް ވަނީ މީގެ ކުރިން އެ ސަރަހައްދު ބޭނުން ނުކުރުމަށް އެދިފައެވެ. އޭގެ ފަހުންވެސް ބައެއް އާއްމު ފަރާތްތަކުން އެ ސަރަހައްދުން ދަތުރުކުރާތީވެ، ޓްރާންސްޕޯޓުން ވަނީ ލައިސަންސް ހިފަހައްޓާނޭކަމުގެ އިންޒާރުވެސް ދީފައެވެ.
ތިލަމާލެ ބްރިޖް މަޝްރޫޢު ނިންމަން އޮތީ މިދިޔަ އަހަރެވެ. ނަމަވެސް މަސައްކަތް ކުރިއަށްގެންދިއުމުގައި ދިމާވި ލަސްތަކާހެދި ފަހުން ވަނީ އަންނަ އަހަރުގެ ސެޕްޓެމްބަރުމަހުގެ ނިޔަލަށް މުއްދަތު އިތުރުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
