ފްރާންސްގެ ރައީސް މެކްރޮންގެ މޫނުގައި އަނބިކަނބަލުން ޖަހާތަން ފެންނަ ވީޑިއޯގެ ހަގީގަތް ކިޔައިދީފި

ފްރާންސްގެ ރައީސް އެމެނުއެލް މެކްރޮންގެ މޫނުގައި އަނބިކަނބަލުން ބްރިޖިޓް މެކްރޮން ޖަހާލާތަން ފެންނަ ކަމަށް ބުނެ މީސްމީޑިއާގައި ދައުރުކުރަމުންދާ ވީޑިއޯގެ ހަގީގަތް ރައީސް މެކްރޮން ހާމަކޮށްދެއްވައިފިއެވެ.

ވިއެޓްނާމްގެ ވެރިރަށް ހަނޮއީއަށް ކުރެއްވި ދަތުރުފުޅެއްގައި މަތިންދާބޯޓުން ފައިބާވަޑައިގަންނަވާތަން ފެންނަ މި ވީޑިއޯގައި ފެންނަނީ ރައީސް މެކްރޮންގެ މޫނުގައި އަތަކުން ޖަހާލާތަނެވެ. ނަމަވެސް، މި މަންޒަރަކީ އޭނާއާއި އަނބިކަނބަލުން ދެމެދު އާންމުކޮށް ސަމާސާ ކުރުމުގެ ތެރެއިން މަޖަލަކަށް ކޮށް އުޅޭ ކަމެއް ކަމަށް ރައީސް މެކްރޮން ވަނީ ވިދާޅުވެފައިވެއެވެ.

"އަޅުގަނޑުމެން ދެމަފިރިން އާދައިގެ މަތިން ކުރާ ކަމެއް މިއީ. މިކަމުގައި އެއްވެސް ކަހަލަ ޖަދަލެއް ނުވަތަ ރުޅިވެރިކަމެއް ނެތް،" އެކަމާއި ގުޅޭ ގޮތުން ނޫސްވެރިން ކުރި ސުވާލަށް ޖަވާބު ދެއްވަމުން ރައީސް މެކްރޮން ވިދާޅުވިއެވެ.

ރައީސް މެކްރޮން އިތުރަށް ވިދާޅުވެފައިވަނީ މީގެ ކުރިން ވެސް އޭނާއާ ގުޅޭ ގޮތުން ނަގާފައިވާ އެހެން ވީޑިއޯތަކެއް ވެސް ނުރަނގަޅު ގޮތުގައި މާނަކުރެވިފައިވާ ކަމަށެވެ.

"މީހުން ހީކޮށްފައިވޭ އަހަރެން ކޮކެއިން ބޭނުންކުރާ ކަމަށް، ތުރުކީގެ ރައީސްއާ ޖަގަޑާ ހަދާ ކަމަށް، އަދި މިހާރު އަނބިމީހާއާ ޖަގަޑާ ހަދާ ކަމަށް... މިއިން އެއްވެސް ކަމަކީ ހަގީގަތެއް ނޫން. އެންމެން ވެސް ހަމަޖެހިލަން ޖެހޭ،" ރައީސް މެކްރޮން ވިދާޅުވިއެވެ.

މި ވީޑިއޯ ރަޝިއާގެ ސަރުކާރު މީޑިއާތަކާއި ފްރާންސްގެ އެކި އެކި މީސްމީޑިއާ އެކައުންޓްތަކުން ވަނީ ހިއްސާކޮށްފައެވެ. އެގޮތުން ރަޝިއާގެ ޚާރިޖީ ކަންތައްތަކާބެހޭ މިނިސްޓްރީގެ ތަރުޖަމާނު މަރިއާ ޒަކަރޯވާ ވެސް މި ވީޑިއޯއާ ގުޅޭ ގޮތުން ފުރައްސާރަކުރާ ގޮތަށް ވާހަކަދައްކާފައިވެއެވެ.