އިޓަލީން މިފަހަރުވެސް ޒިދާން ހުއްޓުވައިފި

ޔުއެފާ ނޭޝަންސް ލީގްގައި އިޓަލީ އާއި ފްރާންސް ބައްދަލުކުރިމެޗް އެއްވަރުވެގެން ނިމިއްޖެއެވެ.

ފްރާންސްގައި ކުޅުނު މިމެޗް ނިމުނީ 1-1 ގެ ނަތީޖާއިން ދެޓީމް އެއްވަރުވެގެންނެވެ. މިއީ ބައިނަލްއަގުވާމީ މި ބްރޭކުގައި ރަށުން ބޭރުގައި ކުޅުނު ދެ މެޗުން މޮޅުވުމަށްފަހު، ޒިދާންގެ ކޯޗްކަމުގެ ދަށުން ފަރަންސޭސިން އަމިއްލަ ދަނޑުގައި ކުޅުނު ފުރަތަމަ މެޗެވެ.

ސްޓޭޑް ޑި ފްރާންސްގައި ކުޅުނު މި މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީ ފަރަންސޭސިންނެވެ. އެއީ މެޗްގެ 55 ވަނަ މިެނޓް ތެރޭގައި އޮލީސޭ ޖަހައިދިން ލަނޑުންނެވެ. އިޓަލީން މެޗުގެ ނަތީޖާ ހަމަހަމަކުރީ، ލޫކަސް ޑަ ކޫންހާގެ އަތުން އެލެސަންޑްރޯ ބަސްޓޯނީ ބޯޅަ ހޯދުމަށްފަހު އޭރިއާ ރޮނގުމަތިން ފޮނުވާލި ހަމަލާއަކުންނެވެ.

މެޗުގެ ފަހުކޮޅު ފަރަންސޭސިވިލާތުގެ ޑަޔޮޓް އުޕަމެކާނޯއަށް ދެއްކި ދެވަނަ ރީނދޫ ކާޑާއެކު އޭނާ ވަނީ ދަނޑުން ފޮނުވާލައިފައެވެ. މި މެޗަކީ 2006 ވަނަ އަހަރުގެ ވަރލްޑްކަޕް ފައިނަލަށްފަހު ޒިދާން ޤައުމީ ޓީމްގައި ހުރެ އިޓަލީ އާ ދެކޮޅަށް ނިކުތް ފުރަތަމަ މެޗެވެ. މެޗަށް ނިކުތުމުގެ ކުރިން ޒިދާން ވަނީ އެފަހަރުގެ ވަރލްޑްކަޕް ފައިނަލްމެޗްގައި ހިނގާދިޔަ ކަންތައްތައް މިހާރު ހަނދާންކުރަން ބޭނުންނުވާ ކަމަށް ބުނެފައެވެ. އެފަހަރުގެ ފައިނަލަކީ ޒިދާންގެ ފަހު މެޗެވެ. ގިނަ ބަޔަކު ގަބޫލުކުރާގޮތުގައި އެފަހަރު ފައިނަލް މެޗް ފްރާންސަށް ގެއްލުނީ ޒިދާން އެމެޗްގައި ޒިދާން އިޓަލީގެ ޑިފެންޑަރު މާކޯ މަޓަރާޒީ މޭގައި ބޮލުންޖެހުމާ ގުޅިގެން ދެއްކި ރަތްކާޑުގެ ސަބަބުންނެވެ. މެޗްގެ ފުރިހަމަ ވަގުތު 1-1 ގެ ނަތީޖާއިން ދެޓީމް އެއްވަރުވިއިރު، މުބާރާތުގެ ތަށި ފްރާންސަށް ގެއްލުނީ ޕެންލްޓީން ބަލިވުމުންނެވެ.

މި ގްރޫޕުގެ އަނެއް މެޗުގައި، މާކް ވަން ބޮމެލްގެ އިރުޝާދުގެ ދަށުން ކުޅެމުންދާ ބެލްޖިއަމް ވަނީ 3-0 އިން ތުރުކީ ބަލިކޮށްފައެވެ. މި މެޗުގައި ކެވިން ޑި ބްރޭނާ ދެ ލަނޑު ޖެހިއިރު، އަނެއް ލަނޑު ކާމިޔާބުކޮށްދިނީ ރޮމެލޫ ލުކާކޫއެވެ.