އެންމެގިނައިން ފަންކާ ވަގަށް ނެގުމުގެ ރެކޯޑް، ޢީދު މިސްކިތުން؟

މާލޭގެ ހަނދުވަރީ ހިނގުމުގައި ހުންނަ ޢީދު މިސްކިތަކީ މިހާރު މާލޭގައި ހުރި މިސްކިތްތަކުގެ ތެރެއިން އެންމެ ގިނަދުވަސްވީ އެއް މިސްކިތެވެ. ޢީދު މިސްކިތް ފާހަގަކުރެވިފައިވަނީ އެއް ޒަމާނެއްގައި ދިވެހިން ޢީދު ނަމާދުކުރުމަށް އެންމެންގޮސް އުޅޭ މިސްކިތުގެ ގޮތުގައެވެ. ޢީދު މިސްކިތަށް މިހާރު 190 އަހަރުވާނޭކަމަށް ބެލެވޭކަމަށް އިހުގެ ދިވެހި ލިޔުއްވުންތައް ގެނެސްދޭ ބޭފުޅުންގެ ލިޔުންތަކަށް ބަލާލުމުން އެނގެއެވެ. ޢީދު މިސްކިތް ބިނާކުރެވިގެން ދިޔައީ އަލް ސުލްތާން މުހައްމަދު މުއިން އިސްކަންދަރު ކަޅު ސުއްދު ކައްތިރި ބަވަނަ މަހާރަދުންގެ ދުވަސްވަރެވެ.

މާލޭގައި މިސްކިތްތަކުން ވައްކަންކުރުން އިތުރުވެފައިވާއިރު، ޢީދު މިސްކިތަކީ ވަގުންގެ އުނދަގޫ އެންމެބޮޑުވެފައިވާ އެއް މިސްކިތެވެ. ޢީދު މިސްކިތުގައި ހުންނަ ފަންކާތަކާއި، ބޮކިތަކުގެ އިތުރުން ސައުންޑްސިސްޓަމް ވަގަށްނެގުން ފަދަ ކަންކަން މީގެކުރިން އެތައްފަހަރަކު ކޮށްފައި އެބަހުއްޓެވެ.

ވަގުންގެ އުނދަގޫ ބޮޑުވުމުން މާލެސިޓީ ކައުންސިލުން ވަނީ ޢީދު މިސްކިތުގައި ކެމެރާވެސް ހަރުކޮށްފައެވެ. އެހެންނަމަވެސް މިސްކިތުން ވައްކަންކުރުމުގެ މުޑުދާރު އަމަލެއް ނުހުއްޓެއެވެ.

އެންމެފަހުން ރޭ ދަންވަރު އޮފީސްތައްވެސް ބަންދު، އަދި މީހުންވެސް ނިދާފައިތިއްބާ މާލެސިޓީކައުސިލުން އެކްސްގައި ކުރި ޕޯސްޓެއްގައި ބުނެފައިވަނީ، އީދު މިސްކިތް މަރާމާތަށް ބަނދުކޮށްފައި ވަނިކޮށް ރޭ އިރުއޮއްސި ހަޔަކާއި ރޭގަނޑު ދިހައަކާ ދެމެދުގެ  ވަގުތެއްގައި މިސްކިތުން އަނެއްކާވެސް ވައްކަންކޮށްފައިވާކަމަށެވެ. މިފަހަރުވެސް މިސްކިތުން ގިނަ އަދަދެއްގެ ބޮތްކާއި ފަންކާ ވަގަށް ނަގާފައިވާކަމަށް ސިޓީ ކައުންސިލުން ބުންޏެވެ. މިގޮތުން 13 ބޮތްކާއި 8 ފަންކާ ވަނީ ވަގަށް ނަގާފައެވެ.

މާލެސިޓީ ކައުންސިލުން ބުނީ ޢީދު މިސްކިތުން ވައްކަންކުރި މައްސަލަ ފުލުހަށް ހުށަހަޅާފައިވާކަމަށެވެ.

މީގެ ކުރިން ޢީދު މިސްކިތުން އެތައް ފަހަރަކު ވަނީ ވައްކަންކޮށްފައެވެ. މީގޮތުން މިއަހަރުގެ ޖޫންމަހުގެ ޢީދު މިސްކިތުން ކުރި ވައްކަންތަކުން އެކަނިވެސް ވަނީ 10 ފަންކާ ވަގަށް ގެންގޮސްފައެވެ. މީގެ އިތުރުން އެކި ފަހަރުމަތިން ބޮކިތަކާއި ބައެއްކަހަލަ ކޭބަލްތައްވެސް ވަގަށް ގެންގޮސްފައިވާކަން ފާހަގަކޮށްލެވެއެވެ.

މާލެ ސިޓީކައުންސިލުން ވަނީ މިފަދަ މައްސަލަ ތަކުގެ ވީޑިއޯތައްވެސް ފުލުހުންގެ އިދާރާއަށް ހުށަހަޅާފައެވެ. ނަމަވެސް މިސްކިތުން ވައްކަންކުރުން ހުއްޓުމަކަށް ނާދެއެވެ. މިސްކިތްތަކުން ވައްކަންކުރުން ގިނަވެފައިވާތީވެ ގިނަ މިސްކިތްތަކުގައި ސައުންޑް ސިސްޓަމްތަކާއި މައިކުތައް ބަހައްޓަނީ ތަޅުލާފައި ހުންނަ ވަތްގަނޑަށް ލައިގެންކަން ފާހަގަކޮށްލެވެއެވެ.

މިސްކިތްތަކަކީ މި ބިމުގައިވާ މާތްﷲ ގެ ގެކޮޅެވެ.