އީޒެޕުން ކުރާ މުއާމަލާތްތައް ވިސާއާ މާސްޓާ ކާޑުން ކުރެވޭ ގޮތަށް އެމްއައިބީއާއެކު އެއްބަސްވުމެއް

ރާއްޖޭގައި ހަލުވިކަމާއެކު ކުރިއަރަމުން އަންނަ ސުޕަ އެޕެއް ކަމަށްވާ އީޒެޕުން ކުރާ މުއާމަލާތްތައް ވިސާ އަދި މާސްޓާ ކާޑު މެދުވެރިކޮށް ކުރެވޭގޮތަށް މޯލްޑިވްސް އިސްލާމިކް ބޭންކާ އެކު އެއްބަސްވުމެއްގައި ސޮއިކޮށްފި އެވެ.

އެމްއައިބީގެ ހެޑް އޮފީހުގައި މިއަދު އޮތް ރަސްމިއްޔާތެއްގައި އީޒެޕްގެ ފަރާތުން މި އެއްބަސްވުމުގައި ސޮއިކުރެއްވީ އީޒެޕް ގެ މެނެޖިން ޑިރެކްޓަރު އަހްމަދު މައުރޫފް އަބްދުލް ހަކީމް އެވެ. އެމްއައިބީގެ ފަރާތުން ސޮއިކުރެއްވީ މެނޭޖިން ޑިރެކްޓަރު އަދި ސީއީއޯ މުފައްދަލް އިދްރީސް ހުމްރީ އެވެ.

އީޒެޕުން ބުނީ މި އެއްބަސްވުމާއެކު އެ އެޕް މެދުވެރިކޮށް ހޯދާ ހިދުމަތްތަކަށް  އެމްއައިބީގެ ގްލޯބަލް ޕޭ މެދުވެރިކޮށް ކޮންމެ ވިސާ އަދި މާސްޓާ ކާޑަކުންވެސް ފަސޭހަމާއެކު ފައިސާ ދައްކާލެވޭނެ އެވެ.

އީޒެޕުން ބުނި ގޮތުގައި އެމް އައި ބީ ގްލޯބަލް ޕޭ އިންޓަގްރޭޓް ކުރުން އޮތީ ޓެސްޓިން ފޭޒްގައި ކަމާައި މޭ މަސް ތެރޭގައި  އިންޓަގްރޭޝަން ނިންމާލައި ކަސްޓަމަރުންނަށް ފަސޭހަކަމާއެކު ކާޑުން ކަނޑާލެވޭނެ ގޮތް ފަހި ވެގެން ދާނެ އެވެ.

އެގޮތުން ކޮންމެ ބޭންކެއްގެ ވިސާ އަދި މާސްޓާ ކާޑު އީޒެޕްގައި ބޭނުން ކުރެވޭނެއެވެ.

ސުޕައެޕެއްގެ ގޮތުގައި ދާދި ފަހުން ލޯންޗުކުރި އީޒެޕް މެދުވެރިކޮށް ފުޑް ޑެލިވަރީގެ އިތުރުން ގޭތެރެއަށް ބޭނުންވާ ހުރިހާ ސާމާނަކާއި، ކަންމަތީ ފިހާރައަކުން ލިބޭ ހުރިހާ އެއްޗެއް ވެސް ލިބެން ހުންނާނެ އެވެ.

މީގެ އިތުރުން ޓެކްސީ އާއި ސައިކަލު ޓެކްސީގެ ހިދުމަތް ވެސް އެ އެޕް މެދުވެރިކޮށް ވަނީ ފަށާފަ އެވެ. ޑްރައިވަރުން އިތުރުވީ ވަރަކަށް އެ ހިދުމަތް އިތުރަށް ފުޅާވާނެ ކަމަށް އީޒެޕުން ބުނެ އެވެ. އެއްވެސް ކަމިޝަނެއް ނުވަތަ ފީ އަކާ ނުލައި ޑްރައިވަރުންނަށް އީޒެޕާ ގުޅުމުގެ ފުރުސަތު ވަކި މުއްދަތަކަށް ވަނީ ފަހިކޮށްދީފަ އެވެ.

އީޒެޕަކީ ދިވެހި ކުދި ވިޔަފާރިތަކުގެ ބޭނުންތަކަށް އަމާޒުކޮށްގެން ދިވެހި ޒުވާނުންތަކެއް އިސްވެ އުފައްދާފައިވާ އެޕެކެވެ.

މި އެޕް މެދުވެރިކޮށް ހިދުމަތް ދޭން ބޭނުންވާ ވިޔަފާރިތަކަށް 7560606 މެދުވެރިކޮށް ވަޓްސެޕް މެސެޖް ކުރައްވައިގެން ކުރިއަށް ދިއުމުގެ ފުރުސަތު އެބައޮތެވެ. އަދި އީޒެޕުން ހިދްމަތް ދޭން ބޭނުންވާ ފަރާތްތައް ގިނަވުމުން ގުޅުއްވުމުގެ ބަދަލުގައި މެސެޖް ކުރެއްވުމަށް އީޒެޕުން އެދިފައިވެ އެވެ.