ބ.އަތޮޅު ކައުންސިލުން މެޝިންތަކެއް ގެނައުމަށް ބަޔަކަށްދިން 7 ލައްކައަށްވުރެ ގިނަ ރުފިޔާ ގެއްލިއްޖެ
ބ.އަތޮޅު ކައުންސިލުން އެ އަތޮޅުގެ ރަށްރަށުގައި ކުނިމެނޭޖްކުރުމަށް ބޭނުންވާ މެޝިނަރީޒް ހޯދުމަށް އެޑްވާންސް ފައިސާގެ ގޮތުގައި ބަޔަކަށް ދިން ފައިސާތަކެއް ވީއެއް ނުވީއެއް ނޭނގި ގެއްލިއްޖެއެވެ.
އޮޑިޓަރ ޖެނެރަލްގެ އޮފީހުން ނެރެފައިވާ ބ.އަތޮޅު ކައުންސިލްގެ 2023 އަދި 2024 ވަނަ އަހަރުގެ އޮޑިޓް ރިޕޯޓްގައި ބުނެފައިވަނީ އަތޮޅު ކައުންސިލުން ކުނިމެނޭޖްކުރުމަށް ބޭނުންވާ މެޝިނަރީޒް ހޯދުމަށް 4.6 މިލިއަން ރުފިޔާގެ އަގަކަށް ބަޔަކާ ހަވާލުކޮށްފައިވާކަމަށެވެ. އެއްބަސްވުމުގައި އެ ކުންފުންޏާއެކު ސޮއިކޮށްފައިވަނީ 2023 ވަނަ އަހަރުގެ ޖުލައިމަހުގެ 1 ވަނަ ދުވަހުއެވެ.
ނަމަވެސް މަސައްކަތް ނިންމަންޖެހޭ މުއްދަތު ފަހަނަ އަޅައި ދިޔައިރުވެސް އެކުންފުނިން އެ މަސައްކަތް ކޮށްފައިނުވާއިރު، ބ.އަތޮޅު ކައުންސިލުން ވަނީ އެޑްވާންސް ފައިސާގެ ގޮތުގައި 703،575 ރުފިޔާ އެކުންފުންޏަށް ދީފައެވެ. އަތޮޅު ކައުންސިލުން ފަހުން އެއްބަސްވުން ބާތިލްކުރިނަމަވެސް އެޑްވާންސްގެ ގޮތުގައި ދިން ފައިސާ އެ ކުންފުނީގެ އަތުން ހޯދާފައިނުވާކަން އޮޑިޓް ރިޕޯޓްގައި ވަނީ ފާހަގަކޮށްފައެވެ.
ފަހުން އެކުންފުންޏާއެކު ކުރެވުނު މުއާމަލާތްތަކުން ދެފަހަރެއްގެ މަތިން ބަހާލައިގެން ފައިސާ ދެއްކުމަށް އެންގިނަމަވެސް އެކުންފުނިން އެކަމަށް އިޖާބަދީފައެއް ނުވެއެވެ. އަދި އޭގެ ފަހުން ޝަރީއަތަށް ހުށަހަޅަން ނިންމުމުން އެ ކުންފުނިން ކޯޓުން ބޭރުގައި މައްސަލަ ހައްލުކުރުމަށާއި، މެޝިންތަކުގެ ބާކީ ފައިސާ ހަމަޖެހިފައިވުމުން މެޝިންތައް ރާއްޖެގެނެސް ހަވާލުކުރުމަށް 50 ދުވަހުގެ މުއްދަތެއް ދިނުމަށް ވަނީ އެދިފައެވެ. އަދި އެޑްވާންސް ފައިސާ އަނބުރާ ދައްކާނެކަމުގެ ގެރެންޓީއެއްގެ ގޮތުގައި 20،000 ރުފިޔާ ކައުންސިލް އިދާރާއަށް ޖަމާކޮށްފައިވާކަމަށް 2024 ވަނަ އަހަރުގެ އޮކްޓޯބަރުމަހުގެ 19 ވަނަ ދުވަހު އެކުންފުނިން ވަނީ ސިޓީއަކުން ބަޔާންކޮށްފައެވެ.
ނަމަވެސް އޮޑިޓް ރިޕޯޓްގައި ވަނީ ނިމިގެންދިޔަ 2025 ވަނަ އަހަރުގެ އޮގަސްޓްމަހުގެ 28 ވަނަ ދުވަހާ ހަމަޔަށްވެސް ކައުންސިލުން އެ ފައިސާ ހޯދާފައިނުވާކަން އޮޑިޓް ރިޕޯޓުގައި ވަނީ ބުނެފައެވެ. އޮޑިޓް ރިޕޯޓްގައި އޮޑިޓަރ ޖެނެރަލްގެ ރައުޔުގައި ވަނީ، އެޑްވާންސް ފައިސާގެ ގޮތުގައި އެފަރާތަށް ދީފައިވާ ފައިސާއިން ކައުންސިލް އިދާރާއަށް ލިބެންޖެހޭ ފައިސާ ހޯދުމުގެ ކަންކަން ކޯޓު މެދުވެރިކޮށް ކުރިއަށްގެންދިއުމަށް އެދިފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
