ކޮމިޔުނިސްޓް ޕާޓީއާ ޕޮލިސީއެމްވީ ގުޅިގެން ދިރާސާކުރުމުގެ ޕްރޮގްރާމެއް ފަށަނީ

ކޮމިޔުނިސްޓް ޕާޓީ އޮފް ޗައިނާގެ އިންޓަރނޭޝަނަލް ޑިޕާޓްމަންޓް އާއި ޕޮލިސީއެމްވީ ގުޅިގެން ދިރާސާކުރުމުގެ ޕްރޮގްރާމެއް މިއަދު އިފްތިތާހު ކޮށްފި އެވެ.

މޯލްޑިވްސް-ޗައިނާ ގަވާނަންސް ރިސާޗް ޕްރޮގްރާމްގެ ނަމުގައި މިއަދު ފެށުނު މި މަސައްކަތަކީ ހިންގުމުގެ އެކިއެކި ދާއިރާއިން ފަންނީ ދިރާސާ ހެދުމަށް ފެށުނު މަސައްކަތެއް ކަމަށާ މި ޕްރޮގްރާމުގައި ބައިނަލްއަގުވާމީ އަދި ގައުމީ ފެންވަރުގެ ދިރާސާ ކުރެވޭނެ ކަމަށް ޕޮލިސީއެމްވީ ބުނެ އެވެ.

މި ޕްރޮގްރާމްގެ ބޭނުމަކީ ރާއްޖެ އާއި ރާއްޖޭން ބޭރުގެ ކިޔަވާކުދިންނަށާއި، އިލްމީ ދިރާސާވެރިންނަށާއި އާންމުކޮށް އެންމެނަށް، ހިންގުމުގެ ދާއިރާތަކުން ބައިނަލްއަގުވާމީ އަދި ގައުމީ މައްސަލަތަކުގައި އިލްމީ ދިރާސާކޮށް ހޯދާ މައުލޫމާތުތައް އާންމު ކުރުމެވެ.

އަދި ސިޔާސަތު ކަނޑައެޅުމުގައިބޭނުންކުރެވޭނެ ފަންނީ މައުލޫމާތު ދިރާސާކުރެވި އާންމު ކުރުމެވެ. މީގެ އިތުރުން، ފަންނީ ދިރާސާކުރުމަކީ ބައިނަލްއަގުވާމީ ދާއިރާގައި އިސްތިރާޖީ ގޮތުން ބޭނުންކުރާ މުހިންމު ވަސީލަތަކަށްވާއިރު، ރާއްޖެއާބެހޭ ދިރާސީ މައުލޫމާތު އުފައްދައި ފުޅާކުރުމަކީ ވެސް މި ޕްރޮގްރާމުގެ ލަނޑުދަނޑިއެއް ކަަމަށް ޕޮލިސީއެމްވީ އިން ބުންޏެވެ.

މި ޕްރޮގްރާމް އިފްތިތާހު ކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ޕޮލިސީއެމްވީގެ އެގްޒެކެޓިވް ބޯޑުގެ ޗެއާޕަސަން ޙަމްދޫން ޙަމީދު ވިދާޅުވީ، މި ޚާއްސަ ދުވަހަކީ، މިދިޔަ ދެ އަހަރެއްހާ ދުވަހުގެ ތެރޭގައި ރާއްޖޭގެ ތަޖުރިބާކާރުންނާއި ޢިލްމީ ދިރާސާވެރިންނާއެކު ޕޮލިސީއެމްވީން ކުރަމުންދިޔަމަސައްކަތް ކާމިޔާބުކަމާއެކު ރާއްޖޭގެ ހަފޮޅު ދޫކޮށް ބައިނަލްއަޤްވާމީ މައިދާނަށް ގެންދެވުނު ދުވަސް ކަމުގަ އެވެ.

މި ރަސްމިއްޔާތުގައި އައިޑީސީޕީސީގެ ބިއުރޯ ފޮރ ސައުތު އީސްޓް އޭޝިއާ އެންޑް ސައުތު އޭޝިއަން އެފެއަރޒްގެ ޑިރެކްޓަރ ޖެނެރަލް ޕެންގ ދެއްކެވި ވާހަކަފުޅުގައި، ޗައިނާގެ ކޮމިއުނިސްޓް ޕާޓީއިން ޗައިނާގެ ތަރައްގީއަށް ކުރެވިފައިވާ މަސައްކަތްތަކަށް އަލިއަޅުވާލައްވައި، ޕޮލިސީއެމްވީއާއެކު މިފެށުނު މަސައްކަތަކީ އައިޑީސީޕީސީއިން ވަރަށް އިސްކަން ދެއްވާ މަސައްކަތެއް ކަމުގައި ވިދާޅުވި އެވެ.

ޗައިނާއިން ރާއްޖެއަށް ކަނޑައަޅުއްވާފައިވާ ސަފީރު ކޮންގް ވެސް މި ރަސްމިއްޔާތުގައި ވާހަކަފުޅު ދެއްކެވި އެވެ.

އަދި ރާއްޖޭގެ ތަރައްގީއަށް ބޭނުންވާ މުހިންމު ދިރާސާތައް ކުރުމަށް ޕޮލިސީއެމްވީ އާއި އައިޑީސީޕީސިން ކުރިޔަށް ގެންދާ މަސައްކަތުގައި ބައިވެރިއެއް ގޮތުގައި ދެމިހުންނަވާނެ ކަމަށް އޭނާގެ ވާހަކަފުޅުގައި ވިދާޅުވި އެވެ. ޒުވާނުންނަށް ހުރި ގޮންޖެހުންތަކާމެދު ޕޮލިސީއެމްވީގެ ޔޫތު ޗެޕްޓަރުގެ ފަރާތުން މިއަހަރު ބާއްވަން ރާވާފައިވާ އެކްސްޕޯގެ މުހިންމުކަން ފާހަގަކުރައްވައި މިފަދަ މަސައްކަތްތަކުގައި ޒުވާނުން ބައިވެރިވުމަށް ވެސް އޭނާ ހިތްވަރުދެއްވި އެވެ.

ޕޮލިސީއެމްވީ އަކީ ދިވެހިރާއްޖޭގައި ޢިލްމީ ދިރާސާ ކުރުމަށާއި، އަދާހަމަ ހާލަތާއި ތަފާސްހިސާބަށް ބިނާވެ ސިޔާސަތުތައް ކަނޑައެޅުމަށް އެހީތެރިވުމަށާއި، ގައުމީ އަދި ޢިލްމީ މައުލޫތަކުގެ މައްޗަށް ވިސްނައި ވާހަކަދައްކައި، ބަހުސްތައް އިންތިޒާމްކުރުމާއި، ޢިލްމީ ލިޔުންތައް ލިޔުމާއި، މި މަޢުލޫމާތު އާންމުކޮށް ފޯރުކޮށްދޭ މަންސަތައް ބޭއްވުމުގެ މަގްސަދުގައި 2024 ވަނަ އަހަރު އުފައްދައި ހަރަކާތްތެރިވަމުން އަންނަ ތިންކް ޓޭންކެކެވެ.