"ޑޮނަލްޑް ޓްރަމްޕް" ގެ ނަމުން މަޝްހޫރުވި މީގޮނު ގުރުބާން ކުރުން ހުއްޓުވައި ޒުލަށް ގެންގޮސްފި

ބަންގްލަދޭޝްގައި އަޟްޙާ އީދުގައި ގުރުބާންކުރުމަށް ތައްޔާރުކުރި، އެމެރިކާގެ ރައީސް ޑޮނަލްޑް ޓްރަމްޕްގެ ނަމުން ނަންދެވިފައިވާ މަޝްހޫރު މީގޮނު ކަތިލުން މަނާކޮށް ޒުލަށް ގެންގޮސްފިއެވެ.

މި މީގޮނަށް "ޑޮނަލްޑް ޓްރަމްޕް" ގެ ނަން ދީފައިވަނީ އޭގެ ބޯމަތީގައި ހުންނަ ރަންކުލައިގެ އިސްތަށިގަނޑު، ރައީސް ޓްރަމްޕްގެ އިސްތަށިގަނޑާ ވައްތަރުވުމުންނެވެ.

1,500 ޕައުންޑް ބަރުދަން ހުރި މި ހުދު (އަލްބީނޯ) މީގޮނުގެ ފޮޓޯތަކާއި ވީޑިއޯތައް މީސްމީޑިއާގައި ދައުރުވުމާއެކު، މުޅި ދުނިޔޭގެ ސަމާލުކަން މި ޖަނަވާރަށް ވަނީ ލިބިފައެވެ.

ބަންގްލަދޭޝްގެ ހޯމް މިނިސްޓްރީގެ އޮފިޝަލަކު ރޮއިޓާސްއަށް މައުލޫމާތު ދިން ގޮތުގައި، މި މީގޮނު ގުރުބާނީއަށް ވިއްކާލާފައި ވަނިކޮށް، ހޯމް މިނިސްޓަރު ސަލާހުއްދީން އަހުމަދު ވަނީ އެ ސަލާމަތްކުރުމަށް އަމުރުކުރައްވާފައެވެ.

ސަރުކާރުން މިގޮތަށް ނިންމީ، މި މީގޮނަށް އާންމުންގެ ބޮޑު ސަމާލުކަމެއް ލިބިފައިވުމާއެކު، ސަލާމަތީ ގޮތުން ކުރިމަތިވެދާނެ ނުރައްކަލަކަށް ބަލައިފައެވެ. މި ނިންމުމާއެކު، މީގޮނު ގަތް ފަރާތަށް ފައިސާ އަނބުރާ ދިނުމަށްފަހު، އެ ޖަނަވާރު މިހާރު ވަނީ ޑާކާގައި ހުންނަ ގައުމީ ޒޫއަށް ބަދަލުކުރުމަށް ނިންމާފައެވެ.

މި މީގޮނަކީ ބަންގްލަދޭޝްގެ ވެރިރަށް ޑާކާއާ ކައިރީގައި އޮންނަ ނާރަޔަންގަންޖް ސިޓީގެ ފާމެއްގެ ވެރިއެއް ކަމަށްވާ ޒިޔާއުއްދީން މުރީޛާ ގެންގުޅުނު ޖަނަވާރެކެވެ. މުރީޛާ ބުނި ގޮތުގައި އޭނާގެ ކޮއްކޮއަށް މި މީގޮނާއި ޓްރަމްޕާ ދެމެދު ހުރި ވައްތަރުކަން ފާހަގަވެގެން، މަޖަލަކަށް އެ ނަން ދިނީއެވެ. ނަމަވެސް، މިއީ އިންސާނަކާ އަޅާކިޔުމުގެ ނިޔަތުގައި ކުރި ކަމެއް ނޫން ކަމަށާއި، އެއީ ލޯބިން ދީފައިވާ ނަމެއް ކަމަށް އޭނާ ފާހަގަކުރިއެވެ.

"މިއީ ވަރަށް މަޑުމައިތިރި މިޒާޖެއްގެ ޖަނަވާރެއް. މީތި ބެލެހެއްޓުމަށްޓަކައި ވަރަށް ގިނަ ވަގުތާއި ހަރަދު ދޭންޖެހޭ،" މުރީޛާ ބުންޏެވެ.

ބަންގްލަދޭޝްގައި އާންމުކޮށް ފެންނަނީ ކަޅުކުލައިގެ މީގޮނު ކަމަށްވާއިރު، މިފަދަ ހުދު މީގޮނަކީ އެ ގައުމުގައި ވަރަށް މަދުން ފެންނަ ބާވަތެކެވެ.