ގޯއްޗާއި ބެހޭ މައުލޫމާތު ދެއްވުމަށް ވަޒީރަށް ހުރަސްއަޅައި، މާލެ ރައްޔިތުންނަށް އެމްޑީޕީން ދިނީ ބޮޑު ގެއްލުމެއް: ޢިމްރާން

ގޯއްޗާއި ބެހޭ މައުލޫމާތު ދެއްވުމަށް ގެދޮރުވެރިކަމާއި ބެހޭ ވަޒީރު، ޑރ. ޢަލީ ހައިދަރު އަޙްމަދު ވަޑައިގެންނެވުމުން އެކަމަށް ހުރަސްއަޅުއްވައި، މަޖިލީހުގެ ނިޒާމު ގެއްލުވާލައި، އިދިކޮޅު އެމްޑީޕީން މާލެ ރައްޔިތުންނަށް ބޮޑު ގެއްލުމެއް ދީފައިވާ ކަމަށް ހެންވޭރު ދެކުނު ދާއިރާގެ މެންބަރު ހުސައިން އިމްރާން⁩ ލަތީފް (އިއްމު) ވިދާޅުވެއްޖެއެވެ.

ރައްޔިތުންގެ މަޖިލީހުގެ މިއަދުގެ ޖަލްސާއަށް މެމްބަރުންގެ ސުވާލުތަކަށް ޖަވާބު ދެއްވުމަށް ވަޒީރު ހައިދަރު ވަޑައިގެންނެވުމުން، އެމްޑީޕީ މެންބަރުން ވަނީ ކުރީ ސަރުކާރުން ދިން ގޯތިތައް ހަވާލު ކުރާނެ އިރަކާއި ގުޅޭ ގޮތުން ސުވާލު ކުރައްވާފައެވެ.

އެ ސުވާލުތަކަށް ޖަވާބު ދެއްވަމުން ވަޒީރު ވަނީ، ގޯތި ދިނުން ލަސްވަނީ ކަނޑުންނާއި ފަޅުން ދީފައި ހުރުމުން ކަމަށާ، އެތަން ހިއްކުމަށްފަހު މި ސަރުކާރުން ގޯތި ދޫކުރައްވާނެ ކަމުގެ ޔަގީންކަން ދެއްވާފައެވެ. ނަމަވެސް، އެ ސަރުކާރުން ކަނޑުންނާއި ފަޅުން ގޯތި ދިން ކަމަށް ވަޒީރު ވިދާޅުވުމުން އެމްޑީޕީ މެންބަރުން ވަނީ ނުރުހުން ފާޅުކުރައްވައި އަޑު ގަދަކުރައްވާފައެވެ.

އެއާއެކު މަޖިލީހުގެ ނިޒާމު ގެއްލި، އެ މެންބަރުންގެ ނަން އިއްވުމަށްފަހު، ރިޔާސަތުންވަނީ ޖަލްސާ މެދު ކަނޑާލާފައެވެ.

އެކަމަށް އިޝާރާތް ކުރައްވައި، މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ޢިމްރާން ވިދާޅުވީ، ވަޒީރު ހައިދަރު މަޖިލީހަށް ވަޑައިގެންނެވީ ރައްޔިތުންނަށް ސާފު މަޢުލޫމާތު ފޯރުކޮށްދެއްވުމަށް ކަމަށެވެ.

އެހެންނަމަވެސް އިދިކޮޅު މެންބަރުން މަޖިލީހުގައި އަޑު ގަދަ ކުރައްވައި، މަޖިލީހުގެ ތަޅުމުގެ ނިޒާމް ގެއްލުވާލުމުގެ ސަބަބުން ރައްޔިތުންނަށް ވަރަށް ބޮޑު ގެއްލުމެއް ވެފައިވާ ކަމަށް ޢިމްރާން ވިދާޅުވިއެވެ.

ވަޒީރު މިތަނަށް ވަޑައިގެންނެވީ ސާފު މަޢުލޫމާތުތަކެއް ފޯތުކޮށްދެއްވުމަށް. (ނަމަވެސް) އިދިކޮޅު ބައެއް މެންބަރުން، މިތަނުގައު އަޑުގަދަކޮށް، ނިޒާމް ގެއްލުވާލައި، އެ ކުރި ކަންތަކުގެ ސަބަބުން އާއްމު ރައްޔިތުންނަށް މި ލިބުނީ ވަރަށްބޮޑު ގެއްލުމެއް. އެތައް ދުވަހަކު އަޅުގަނޑުމެން މަޑުކޮށްގެން މި ތިބީ، ސާފު މައުލޫމާތު ހޯދުމަށް. އެ ފުރުސަތު މިއަދު ގެއްލުވާލީ އިދިކޮޅު މެންބަރުން. އެކަމާ އަޅުގަނޑު ހިތާމަ ކުރަން.

ހުސައިން އިމްރާން⁩ ލަތީފް (އިއްމު)

މިއާއެކު ޢިމްރާން ވިދާޅުވީ، ނިމިދިޔަ ސަރުކާރުން ގޯތި ދޫކުރީ ކަނޑާއިން ފަޅުން ކަމަށް، ވަޒީރު ވިދާޅުވުމުން، އެ ހަގީގަތް ގަބޫލުނުކުރައްވައި، އެކަމާއި ރުޅިއަތުވެގެން މަޖިލީހުގެ ނިޒާމް ގެއްލުވާލާނީ “ވަރަށް ފެންވަރު” ދަށްވީމަ ކަމަށެވެ.

ހާދަހާ ފެންވަރު ދަށްވީމައޭ އެ ބޭފުޅުން ކުރި ކަމެއްގެ ވާހަކަ އެ ބޭފުޅުންނަށް ދެންނެވީމާ ހަޖަމް ނުވާނީ

ހުސައިން އިމްރާން⁩ ލަތީފް (އިއްމު)

ޢިމްރާން އިތުރަށް ވިދާޅުވީ ބުއްދި ސަލާމަތުން ހުރި ސަރުކާރަކުން ޖައްވާއި ފަޒާއިން ރައްޔިތުންނަށް ގޯތި ނުދޭނެ ކަމަށެވެ. އަދި އެފަދައިން ކަން ކުރަނީ ކޮން ވޯޓެއް ހޯދުމަށްތޯވެސް އޭނާ ވަނީ ސުވާލު އުފައްދަވާފައެވެ.