އެމްޓީސީސީގެ 'މާލެ ޓެކްސީ ލައިން' އަށް ޑްރައިވަރުން ހޯދުމަށް ވޯކް-އިން އިންޓަވިއުތަކެއް ބާއްވަނީ
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން އަލަށް ފެށުމަށް ތައްޔާރުވަމުންދާ "މާލެ ޓެކްސީ ލައިން" ޚިދުމަތަށް ބޭނުންވާ ޑްރައިވަރުން ހޯދުމަށް ވޯކް-އިން އިންޓަވިއުތަކެއް ބޭއްވުމަށް ނިންމައިފިއެވެ.
މި ވަޒީފާއަށް ޝައުގުވެރިވާ ފަރާތްތަކަށް ބާއްވާ ވޯކް-އިން އިންޓަވިއުތައް އޮންނާނީ މާދަމާ، 23 މާރިޗު 2026 ވާ ހޯމަ ދުވަހުއެވެ. އިންޓަވިއުތައް ކުރިއަށް ދާނީ އެ ދުވަހުގެ ހެނދުނު 10:00 އިން ފެށިގެން ހަވީރު 4:00 އާ ހަމައަށެވެ. އިންޓަވިއުތައް ބޭއްވުމަށް ހަމަޖެހިފައިވަނީ މާފަންނު ބަސް ޓާމިނަލްގައެވެ.
މި ޚިދުމަތަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ މައިގަނޑު ޝަރުތުތަކުގެ ތެރޭގައި ސައްހަ ޑްރައިވިންގ ލައިސަންސެއް އޮތުމާއި، މުއާމަލާތްކުރުމުގެ ހުނަރު ހުރުން ހިމެނެއެވެ. އިންޓަވިއުއަށް އަންނައިރު އައިޑީ ކާޑާއި، ލައިސަންސްގެ އިތުރުން ތައުލީމީ ސެޓްފިކެޓްތަކާއި ވަޒީފާގެ ތަޖުރިބާ އަންގައިދޭ ލިޔުންތައް ގެންދިއުމަށް އެމްޓީސީސީން އިލްތިމާސްކުރެއެވެ.
އެމްޓީސީސީގެ މާލެ ޓެކްސީ ލައިން ފެށުމަށް ހަމަޖެހިފައިވަނީ ތިމާވެއްޓާ ރައްޓެހި އިލެކްޓްރިކް އުޅަނދުތައް ބޭނުންކޮށްގެންނެވެ. މި ޚިދުމަތުގެ ސަބަބުން މާލެއާއި ހުޅުމާލެ ސަރަހައްދުގައި ޓެކްސީ ހޯދުމަށް އާންމުން އުފުލަމުންދާ ތަކުލީފުތަކަށް ބޮޑު ލުޔެއް ލިބިގެންދާނެ ކަމަށް އުއްމީދުކުރާކަމަށް އެ ކުންފުނިން ވަނީ ބުނެފައެވެ.
އެމްޓިސީސީން މީގެ ކުރިންވެސް ވަނީ މި ޚިދުމަތަށް ޑްރައިވަރުން ހޯދުމަށް އިންޓަވިއުތަކެއް ބާއްވާފައެވެ. އެގޮތުން ގިނަ އަދަދެއްގެ މީހުން ވަނީ އެ ފުރުސަތުގެ ބޭނުން ހިފާފައެވެ. އެމްޓީސީސީން ބުނީ އެކުންފުނިން މަސައްކަތް ކުރަމުންދަނީ އެންމެ ޒަމާނީ އެޕްލިކޭޝަނެއް މެދުވެރިކޮށް، 24 ގަޑިއިރު ހިދުމަތް ލިބޭނެ އިންތިޒާމެއް ހަމަޖެއްސުމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
