ހުޅުމާލެ އިމާރާތެއްމަތިން މީހަކު ވެއްޓި ޒަހަމްވެއްޖެ

ހުޅުމާލޭގައި އިމާރާތެއް މަތިން މީހަކު ވެއްޓި ވަރަށް ބޮޑަށް ޒަހަމްވެއްޖެއެވެ.

މި ހާދިޝާ ހިނގާފައިވަނީ މިއަދު މެންދުރުގެ ވަގުތެއްގައި ހުޅުމާލެ ފުޑްއޮޑާއާއި ޖެހިގެން އިން އިމާރާތުންނެވެ. މިއީ ސަލާމަތީ ފިޔަވަޅު އަޅާފައިނުވާ ކޮންސްޓަރަކްޝަން ސައިޓެއްކަން ފާހަގަކޮށްލަންޖެހެއެވެ.

"ވޮއިސް" އަށް މައުލޫމާތު ދެމުން ހޮސްޕިޓަލުގައި ހަރަކާތްތެރިވަމުން އަންނަ ފަރާތަކުން ބުނި ގޮތުގައި އޭނާގެ އަތުގެ ކުޑަ ހުޅު ބިނދި ކަށި ގަނޑު ބޭރަށް ނިކުތުމުގެ އިތުރުން އޭނާގެ ބޯ ވަނީ ފަޅައިގެން ގޮސްފައެވެ. އޭނާއަށް ދަނީ ހުޅުމާލެ ހޮސްޕިޓަލުން ފަރުވާ ދެމުންނެވެ.

ހުޅުމާލެ އިމާރާތް މަތިން މިއަދު ވެއްޓިފައިވަނީ ބަންގްލަދޭޝްގެ ރައްޔިތެކެވެ. އޭނާ އިމާރާތްމަތިން ވެއްޓިފައިވަނީ ޕޭމަންޓް ކުރިމަތީ ގަސް އިންދުމަށް ހެދިފައިވާ ސަރަހައްދަށެވެ. އެ ސަރަހައްދުގައި ލޭގެ އަސަރު ފެންނަން ހުރިކަން ފާހަގަކޮށްލެވެއެވެ.

މި ހާދިސާ ހިނގާފައި މިވަނީ މާލެގައި ކުޑަ ކުއްޖެއް ބޮލަށް ސިމެންތި ކޮތަޅެއްވެއްޓި ނިޔާވި ހާދިސާއާއި ގުޅިގެން ދިވެހި ސަރުކާރުން ކޮންސްޓްރަކްޝަން ސައިޓްތަކުގެ ސަލާމަތީ ކަންކަން ބަލައި ފިޔަވަޅު އަޅަމުން ގެންދާ ދަނޑިވަޅެއްގައެވެ.

މިއަދު ހާދިސާ ހިނދި ސައިޓްގައި ސަލާމަތީ ގޮތުން އެއްވެސް ފިޔަވަޅެއް އަޅާފައި ނުވާކަން ފާހަގަކުރެވެއެވެ.

ހުޅުމާލެއަކީ ސަލާމަތީ ގޮތުން ބަލަން ޖެހޭ ވަރަށް ނުބަލައި މަސައްކަތް ކުރާ ސައިޓްތައް ގިނަ ރަށެއްކަން ފާހަގަކޮށްލެވެއެވެ. އަދި މިފަދަ ހާދިސާތައް ގިނަ އަދަދަކަށް ހިނގާފައިވާ ހުޅުމާލެއިން މިކަން ބެލުމަށް ހަރުދަނާ ފިޔަވަޅެއް އެޅިފައި ނުވާކަން ފާހަގަކޮށްލަންޖެހެއެވެ.

މި މައްސަލާގައި ސިޓީ ކައުންސިލްގެ ބަހެއް ވަނީ ލިބޭގޮތް ނުވެފައެވެ.