އެމްޖޭއެސް ރާބަދި ޗެލެންޖުގެ ފޯރިގަދަ ފައިނަލްމެޗް މިރޭ

ރިސޯޓްތަކުގެ މުއައްޒަފުންގެ މެދުގައި ބޭއްވިގެންދާ އެންމެ ފޯރިގަދަ އެއް މުބާރާތްކަމަށްވާ ރާބަދި ޗެލެންޖުގެ ފައިނަލްމެޗް، ރ.މީދޫ ފުޓްސަލް ދަނޑުގައި މިރޭ އޮންނާނެއެވެ.

މުބާރާތުގެ ފައިނަލްމެޗްގައި ބައްދަލުކުރާނީ، ކޯރާ ކޯރާ މޯލްޑިވްސް އާއި އަލިއާ ކޮތައިފަރެވެ. މުބާރާތުގެ މިހާތަނަށް ދެޓީމް ކުޅުނު މެޗްތަކުން ފެނިގެންގޮސްފައިވާ ނަތީޖާތަކަށް ބަލާއިރު، މިރޭގެ މެޗް ވެގެންދާނީ ވަރަށް ވާދަވެރި ފައިނަލަކަށް ކަމަށް ދެޓީމުންވެސް ވަނީ ފާހަގަކޮށްފައެވެ.

ކޯރާ ކޯރާ މޯލްޑިވްސް ފައިނަލްމެޗާ ހަމައަށް އާއިރު ފެނިގެންގޮސްފައިވަނީ އެންމެ ވަރުގަދަ ޓީމްގެ ގޮތުގައެވެ. މުބާރާތުގައި އެންމެ ފުރަތަމަ ކޯރާ ކޯރާ މޯލްޑިވްސް، ކުޑަފުއްޓާ ދެކޮޅަށް ކުޅުނު މެޗް 1-1 ގެ ނަތީޖާއަކުން އެއްވަރުވިނަމަވެސް އެޓީމް ވަނީ ދެންހުރި މެޗްތަކުން ތަފާތު ބޮޑު ނަތީޖާތަކުން މޮޅުވެފައެވެ. އެގޮތުން ރީތިފަރާ ދެކޮޅަށް ކުޅުނުމެޗް 10-1 ގެ ނަތީޖާއަކުން ކާމިޔާބުކުރިއިރު، ހެރިތަންސް އާރަށް އަދި ފާރުފުއްޓާ ދެކޮޅަށް ކުޅުނު މެޗްތައް ވަނީ ތަފާތުބޮޑު ނަތީޖާއަކުން މޮޅުވެފައެވެ.

މުބާރާތުގެ ތަފާސްހިސާބުތަކަށް ބަލާއިރު، އެންމެގިނަ ލަނޑު އަދި އެސިސްޓް ކުރި ކުޅުންތެރިންނަކީވެސް ކޯރާ ކޯރާގެ ކުޅުންތެރިންނެވެ. މުބާރާތުގައި މިހާތަނަށް އެންމެގިނަ ލަނޑު ޖަހާފައިވަނީ ކޯރާ ކޯރާގެ ރައުލް އެވެ. އޭނާ ވަނީ 10 ލަނޑު ޖަހާފައެވެ. މުބާރާތުގައި ކޯރާ ކޯރާ މޯލްޑިވްސްއާ ދެކޮޅަށް ނިކުންނަ އަލިއާ ކޮތައިފަރު މުބާރާތުގެ ފައިނަލާ ހަމައަށް ދަތުރުކޮށްފައިވަނީ ކުޅުނު އެއްވެސް މެޗަކުން ބަލިނުވެއެވެ.

މުބާރާތުގެ ފައިނަލްމެޗް މިރޭ ކުޅެވިގެންދާއިރު، ފައިނަލްގައި އެއްކޮޅުން ވާދަކުރާ ކޯރާ ކޯރާ ވަނީ މިދިޔަ މުބާރާތުގެ ފައިނަލްގައިވެސް ކުޅެފައެވެ. މިދިޔަ އަހަރުގެ މުބާރާތުގެ ތަށި ކޯރާ ކޯރާއަށް ގެއްލުނީ ޖޯއްޔާ ދެކޮޅަށް ކުޅުނުމެޗް ޕެނަލްޓީ ޖަހައިގެން ބަލިވުމުންނެވެ. މިރޭ ކުޅޭ ފައިނަލް މެޗް ފެށުމަށް ހަމަޖެހިފައިވަނީ 21:00 ގައެވެ. މިމެޗް އެމްޖޭއެސް ރާބަދި ޗެލެންޖް ފޭސްބުކް ޕޭޖުން ލައިވްކުރާނެއެވެ.