ދާރުލްއާސާރު ކޮންމެ ހޮނިހިރު ދުވަހަކު ވެސް އާންމުންނަށް ހުޅުވަނީ
ލިޔުންތެރިޔާ
އަޙްމަދު އާހިލް ސަޢީދު
މާލޭގައި ހުންނަ ދިވެހިރާއްޖޭގެ ގައުމީ ދާރުލްއާސާރު ކޮންމެ ހޮނިހިރު ދުވަހަކު ވެސް އާންމުންނަށް ހުޅުވަން ނިންމައިފި ކަމަށް ހެރިޓޭޖް މިނިސްޓަރ، ހީނާ ވަލީދު ވިދާޅުވެއްޖެއެވެ.
މިނިސްޓަރ ހީނާ މިކަން ހާމަކޮށްފައިވަނީ، މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.
އެގޮތުން، މިހާރު ދާރުލްއާސާރު ހުޅުވައިފައި ހުންނަނީ ހަމައެކަނި ރަސްމީ ދުވަސްތަކުގައެވެ. ނަމަވެސް، އެތަނުގެ ތަކެތި ބަލާލައި ދިރާސާކުރުމުގެ ފުރުސަތު ދިނުމުގެ ގޮތުން މިހާރު ކޮންމެ ހޮނިހިރު ދުވަހަކުވެސް އެތަން ހުޅުވަން ނިންމަވައިފާވާ ކަމަށް މިނިސްޓަރ ހީނާ ވަނީ ވިދާޅުވެފައެވެ.
މިހާރު ރަސްމީ ދުވަހު ހުޅުވައިފައި ހުރުމުގެ އިތުރުން އެކި ފަރާތްތަކުން އެދިވަޑައިގަންނަވާ ގޮތުގެ މަތިން ވީހާވެސް ގިނަ ބޭފުޅުންނަށް ގައުމީ ދާރުލްއާސާރަށް ވަދެ އެ ތަނުގައި ހުރި ބައެއް ކަހަލަ ކަންތައްތައް ބަލައި ދިރާސާކޮށް އަދި ކިޔަވާ ކުދިންނަށާއި އަދި ރައްޔިތުން ވެސް ބޭނުންވާ ގަޑިތަކުގަ ވަދެވޭނެ ގޮތް ހެދުމުގެ ގޮތުން، ކޮންމެ ހޮނިހިރު ދުވަހެއްގެ ވެސް ހެނދުނު 10:00 ހަވީރު 4:00 އެގޮތުން، 18 މެއި 2026 އިން ފެށިގެން އަޅުގަނޑުމެން ކޮންމެ ހޮނިހިރު ދުވަހެއްގަ ގައުމީ ދާރުލްއާސާރު ހުޅުވައި މީހުންނަށް ވަދެވޭ ގޮތަށް ބެހެއްޓުމަށް މިހާރު ވަނީ ނިންމާފަ.
މިނިސްޓަރ ހީނާ ވިދާޅުވިއެވެ.
މީގެ އިތުރުން މިނިސްޓަރ ވިދާޅުވީ، ރަސްމީ ދުވަސްތަކުގައި ވެސް ދާރުލްއާސާރަށް ވަދެވޭ ގަޑި ރޭގަނޑަށް އިތުރުކުރުމުގެ މަސައްކަތް އެ މިނިސްޓްރީން ކުރަމުންދާނެ ކަމަށެވެ. އެގޮތުން މިނިސްޓަރ ވިދާޅުވީ، ދާރުލްއާސާރު ރޭގަނޑު 9 ނޫނީ 10 ޖަހަންދެން ހުޅުވައިފައި ބެހެއްޓުމުގެ މަސައްކަތް ކުރަމުންދާ ކަމަށެވެ.
ދިވެހިރާއްޖޭގެ ގައުމީ ދާރުލްއާސާރަކީ، ދިވެހިރާއްޖޭގެ ސަގާފީ އެތަކެއް މައުލޫމާތެއް އެއް ތަނަކުން ލިބެން ހުންނަ ތަނަކެވެ. އެގޮތުން، އެ ތަނަކީ ސްކޫލަތަކުން ވެސް ދަރިވަރުންނަށް މައުލޫމާތު ފޯރުކޮށްދިނުމުގެ ގޮތުން ވަރަށް ގިނައިން ދަރިވަރުން ވެސް ގެންދާ ތަނެއްކަން ފާހަގަކޮށްލެވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
