ހޮރްމުޒް ކަނޑުއޮޅި ހުޅުވުމާއި ހަނގުރާމައާ ގުޅޭ މަޝްވަރާތަކަށް އިރާނުގެ ޚާރިޖީ ވަޒީރު ޗައިނާއަށް

އިރާނާއި އެމެރިކާއާ ދެމެދު ހިނގަމުންދާ ހަނގުރާމަ ފެށުނު ފަހުން، އިރާނުގެ ޚާރިޖީ ވަޒީރު އައްބާސް އަރަގްޗީ ފުރަތަމަ ފަހަރަށް ޗައިނާގެ ބެއިޖިންއަށް ވަޑައިގެންފިއެވެ.

މި ދަތުރުފުޅަކީ ހަނގުރާމަ ފެށުނު ފަހުން ދެ ގައުމުގެ ދެމެދުގައި ފޯނުން ގިނަ މަޝްވަރާތަކެއް ކުރުމަށްފަހު އީރާނުން ޗައިނާއަށް ކުރައްވާ ފުރަތަމަ ރަސްމީ ދަތުރުފުޅެވެ. އެގޮތުން، އީރާނުގެ ޚާރިޖީ ވަޒީރު ޗައިނާއަށް ވަޑައިގެންނެވީ މިއަދުގެ ވަގުތެއްގައެވެ.

މި ބައްދަލުވުންތަކުގައި މައިގަނޑު ގޮތެއްގައި ދެ ކަމަކަށް ބޮޑު އިސްކަމެއް ދޭނެއެވެ. އެއީ މިހާރު ގާއިމުކޮށްފައިވާ ހަނގުރާމަ ހުއްޓާލުމުގެ އެއްބަސްވުން ދެމެހެއްޓުމާއި، ބަންދުކޮށްފައިވާ ހޮރްމުޒް ކަނޑުއޮޅި އަލުން ހުޅުވުމެވެ. ބެއިޖިންއިން ދަނީ މި ދެ ކަމަކީ ސަރަހައްދީ ހަމަޖެހުމަށް ކޮންމެހެން ބޭނުންތެރި ދެ ކަންތައް ކަމަށް ތަކުރާރުކޮށް ބުނަމުންނެވެ.

ހޮރްމުޒް ކަނޑުއޮޅިއާ ގުޅޭގޮތުން ޗައިނާގެ ސިޔާސަތު އޮތީ ދެ ފަރާތަށްވެސް ފާޑުކިޔުން އަމާޒުވާ ގޮތަށެވެ. އެގޮތުން އިރާނުގެ ބަނދަރުތަކަށް އެމެރިކާއިން ކުރަމުންދާ ބްލޮކޭޑަށް ޗައިނާއިން ފާޑުކިޔާފައިވާއިރު، އިރާނުން އެ ކަނޑުއޮޅި ބަންދުކުރުމުގައި އަދާކުރާ ދައުރަށްވެސް ޗައިނާއިން ދަނީ ފާޑުކިޔަމުންނެވެ.

ތެހެރާނުން މި ދަތުރުގައި ބަލާނީ، ހޮރްމުޒް ކަނޑުއޮޅި އަލުން ހުޅުވުމަށް އެއްބަސްވެއްޖެ ނަމަ، ބެއިޖިންގެ ފަރާތުން ލިބޭނެ އެހީތެރިކަމަކީ ކޮބައިތޯއެވެ. މީގެ ތެރޭގައި އިރާނާ ދެކޮޅަށް އިތުރު ދަތިކުރުމުގެ ފިޔަވަޅުތަކެއް އެޅުމަށް އދ. އިން މަސައްކަތްކޮށްފި ނަމަ، ޗައިނާއިން އިރާނަށް އެއްބާރުލުން ދޭނެތޯ ކަށަވަރުކުރުން ހިމެނެއެވެ.

އިރާނުގެ ޚާރިޖީ ވަޒީރުގެ މި ދަތުރުފުޅަކީ، އެމެރިކާގެ ރައީސް ޑޮނަލްޑް ޓްރަމްޕް ޗައިނާއަށް ކުރައްވަން ހަމަޖެހިފައިވާ ދަތުރުފުޅުގެ ކުރިން ކުރައްވާ މުހިންމު ދަތުރުފުޅެކެވެ. މީގެ މަގްސަދަކީ އެމެރިކާއާއެކު އޮތް ނުތަނަވަސްކަމުގެ ތެރެއިން، ޗައިނާއަކީ އިރާނުގެ ސިޔާސީ އަދި އިގްތިސާދީ ބައިވެރިއެއްގެ ގޮތުގައި ދެމިއޮންނާނެކަން ކަށަވަރުކުރުމެވެ.