ވެންޓިލޭޓަރުގެ މައްސަލަ: ދިވެހި ސަރުކާރަށް 37 މިލިއަން ރުފިޔާ ދައްކަން ކޯޓުން އަމުރުކޮށްފި

މިދިޔަ ސަރުކާރުން ކޮވިޑުގެ ތެރޭގައި ވެންޓިލޭޓަރު ގަންނަން ދުބާއީގެ ކުންފުންޏަކާއި ހަވާލުކުރި ފައިސާއަށްވާ ވެންޓިލޭޓަރުތައް ނުލިބުނު މައްސަލައިގައި ދުބާއީގެ ކޯޓުން އިއްޔެ ޙުކުމްކޮށްފިއެވެ.

2020 ވަނަ އަހަރުގެ ތެރޭގައި 75 ވެންޓިލޭޓަރުތަކެއް ގަންނަން އޭރުގެ ސިއްޚީ ވުޒާރާއިން ހަވާލުކުރީ ދުބާއީގެ އެގްޒެކިއުޓާސް ޖެނެރަލް ޓްރޭޑިންއަށް، 8.9 މިލިއަން ދިރުހަމް ނުވަތަ 37 މިލިއަން ރުފިޔާއަށެވެ. އެ ފައިސާގެ ތެރެއިން 34 މިލިއަން ރުފިޔާ ސަރުކާރުން އެއްފަހަރާ ދޫކުރިއިރު އެކުންފުނީގެ ފަރާތުން ރާއްޖެއަށް ފޮނުވާފައިވަނީ ވަަރަށް މަދު ވެންޓިލޭޓަރުތަކެކެވެ.

އެ ވެންޓިލޭޓަރުތަކުގެ ވެސް ބޭނުން ހިފިފައިނުވުމުން، މި ސަރުކާރުގައި ސިއްޚީ ވުޒާރާއިން ވަނީ އޭގެ ކުރީ ސަރުކާރުން ދެއްކި ފައިސާގެ ތެރެއިން 31 މިލިއަން ރުފިޔާ އަނބުރާ ދެއްކުމަށް އެކުންފުނީގައި އެދިފައެވެ. އެހެން ނަމަވެސް އެ ފައިސާ ވެސް ދީފައިނުވެއެވެ.

އެ މައްސަލައިގައި ރާއްޖެއިން ދުބާއީގެ ކޯޓަށް ހުށަހެޅި މައްސަލައާއި ގުޅިގެން ބަންޑާރަ ނައިބު އަޙްމަދު އުޝާމު ރާއްޖޭގެ ނޫހަކަށް ވަނީ، އެ މައްސަލައިގައި ދިވެހި ސަރުކާރަށް ފައިސާ ދައްކަން ދުބާއީގެ ކުންފުންޏަށް އަންގާފައިވާކަން ހާމަކުރައްވާފައެވެ.

އަދި އެ ފައިސާތައް ވެސް ނުލިބިއްޖެ ނަމަވެސް ދައުލަތަށް ލިބެންޖެހޭ ފައިސާތައް ހޯދުމުގެ މަސައްކަތް ކުރައްވާނެ ކަމުގައި ބަންޑާރަ ނައިބު ވިދާޅުވެފައިވެއެވެ.

އެ މައްސަލަ ދުބާއީގެ ކޯޓަށް ދިވެހި ސަރުކާރުން ހުށަހެޅީ އާބިޓްރޭޝަނުން އަމުރު ކުރުމުން ވެސް ފައިސާ ނުދެއްކުމުންނެވެ. އެހެންކަމުން އެ މައްސަލައިގައި ރާއްޖެ އިން އެދުނީ އެގްޒެކިއުޓާސް އިން ފޯރުކޮށްނުދޭ ވެންޓިލޭޓަރުތަކުގެ އަގަށް ވާ ފައިސާ އާއި ވެންޓިލޭޓަރުތައް ގެނެސް ދީފައި ނުވާތީ ދިވެހި ސަރުކާރަށް ލިބުނު ގެއްލުމުގެ ބަދަލު ހޯދުމަށެވެ.