ދެވަނަ ކުއާޓަރުގައި މީރާއަށް ޓެކުހުން އެކަނި 6.05 ބިލިއަން ރުފިޔާ

މި އަހަރުގެ ދެވަނަ ކުއާޓަރުގައި ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ޓެކުހުގެ ގޮތުގައި އެކަނިވެސް 6.05 ބިލިއަން ރުފިޔާ ލިބިއްޖެއެވެ.

މީރާއިން އާންމުކޮށްފައިވާ ދެވަނަ ކުއާޓަރުގެ މާލީ ހިސާބުތަކަށް ބަލާއިރު، ޓެކުހުން 6.05 ބިލިއަން ރުފިޔާ ލިބުނުއިރު، ޓެކްސް ނޫން އާމްދަނީގެ ގޮތުގައި ވަނީ 1.55 ބިލިއަން ރުފިޔާ ދައުލަތަށް ލިބިފައެވެ.

މި މުއްދަތުގައި ޓެކްސްގެ ގޮތުގައި އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ދާއިރާގެ ޖީއެސްޓީ (ޓީޖީއެސްޓީ)، އާންމު ޖީއެސްޓީ، އާމްދަނީން ނަގާ ޓެކްސް (އިންކަމް ޓެކްސް)، ގްރީން ޓެކްސް އަދި ޑިޕާޗާ ޓެކުހުންނެވެ. އަދި ޓެކްސް ނޫން ދާއިރާތަކުން އެންމެ ގިނައިން އާމްދަނީ ލިބިފައިވަނީ ރިސޯޓް ކުލި، އެއާޕޯޓް ޑިވެލޮޕްމަންޓް ފީ، ވަރކް ޕާމިޓް ފީ، ކޯޓާ ފީގެ އިތުރުން ރިސޯޓް ކުލީގެ މުއްދަތު އިތުރުކޮށްދީގެން ލިބުނު ފައިސާއިންނެވެ.

މިދިޔަ ކުއާޓަރުގައި މީރާއަށް ޑޮލަރުން ލިބުނު އާމްދަނީ ވަނީ 328.23 މިލިއަން ޑޮލަރަށް އަރާފައެވެ. މިއީ ވޭތުވެދިޔަ އަހަރުގެ މި މުއްދަތާ އަޅާބަލާއިރު 6.1 އިންސައްތައިގެ ދަށްވުމެކެވެ.

ޑޮލަރުން ލިބުނު އާމްދަނީ ދަށްވި މައިގަނޑު ސަބަބަކީ މިދިޔަ އަހަރުގެ ދެވަނަ ކުއާޓަރާ އަޅާބަލާއިރު ރާއްޖެއަށް ފަތުރުވެރިން ޒިޔާރަތްކުރި މިންވަރު 16 އިންސައްތަ ދަށްވުމާ ގުޅިގެން ޓީޖީއެސްޓީގެ ގޮތުގައި ލިބުނު އަދަދު މަދުވުމެވެ. އެގޮތުން މި މުއްދަތުގައި ޓީޖީއެސްޓީގެ ގޮތުގައި ލިބުނު އާމްދަނީ ވަނީ 8.3 އިންސައްތަ ދަށަށް ގޮސްފައެވެ. މީގެ އިތުރުން، ޓެކްސް ނެގޭ ބެޑްނައިޓްސް 14.4 އިންސައްތަ ދަށްވުމުގެ ސަބަބުން، ގްރީން ޓެކުހުގެ ގޮތުގައި ޑޮލަރުން ލިބުނު އާމްދަނީ ވެސް ވަނީ 19.2 އިންސައްތަ ދަށަށް ގޮސްފައެވެ.