ކުލަބް ވޯލްޑްކަަޕްގައި ބްރެޒިލްގެ ޓީމުތައް ތަފާތު

މިހާރު އެމެރިކާގައި ކުރިއަށްދާ ފީފާ ކުލަބު ވޯލްޑްކަޕް ފުޓްބޯޅަ މުބާރާތަކީ 32 ޓީމުގެ މެދުގައި މިމުބާރާތް ބާއްވާ އެންމެ ފުރަތަމަ ފަހަރެވެ. އަދި މިމުބާރާތުގައި މިހާތަނަށް ފެނުނު ކުމުޅުމަށް ބަލާއިރު ބްރެޒިލްގެ ޓީމުތަކުން އަންނަނީ މުބާރާތް ޑޮމިނޭޓް ކުރަމުންނެވެ.

މުބާރާތުގައި ބްރެޒިލްގެ ޕަލްމެއިރަސް، ފްލެމެންގޯ، ފްލޫމިނެންސް އަދި ބޮޓަފޯގޯ ވާދަކުރަމުން އަންނައިރު، މިހާތަނަށް މި ހަތަރު ޓީމު ކުޅުނު ހަތް މެޗުގެ ތެރެއިން ފަސް މެޗުން މޮޅުވެފައިވާއިރު، އަނެއް ދެމެޗު ނިމިފައިވަނީ އެއްވަރުވެގެންނެވެ.

ގުރޫޕް އޭގައި ޕޯޗުގަލްގެ ޗެންޕިއަން ޕޯޓޯ، އަދި މިސްރުގެ އަލް އަހްލީގެ އިތުރުން އެމެރިކާގެ އިންޓަ މިއާމީ އާއެކު ޕަލްމެއިރަސް ހިމެނޭއިރު، ކުޅުނު ދެމެޗުން ހޯދި ހަތަރު ޕޮއިންޓާއެކު ގުރޫޕްގެ އެއްވަނައިގައި މިވަގުތު އޮތީ ޕަލްމެއިރަސް އެވެ. އެޓީމުގެ ފުރަތަމަ މެޗުގައި ޕޯޓޯއާއި ވާދަކޮށް އެއްވަރުވި ނަމަވެސް ދެވަނަ މެޗުގައި އެޓީމުން ވަނީ އަލް އަހްލީ 2-0 ގެ ނަތީޖާއަކުން ބަލިކޮށްފައެވެ.

ގުރޫޕް ބީގައި ޔޫރަޕްގެ ޗެންޕިއަން ޕީއެސްޖީ އަދި ސްޕެއިންގެ އެތްލެޓިކޯ މެޑްރިޑްގެ އިތުރުން އެމެރިކާގެ ސިއެޓަލް ސައުންޑާސް އާއެކު ބްރެޒިލްގެ ބޮޓަފޯގޯ ހިމެނޭއިރު، ކުޅުނު ދެމެޗުން ވެސް މޮޅުވެ ގުރޫޕްގެ އެއްވަނައިގައި މިވަގުތު އޮތީ ބޮޓަފޯގޯ އެވެ. އެޓީމުން ފުރަތަމަ މެޗުގައި ސިއެޓަލް ސައުންޑާސް އަތުން 2-1 ގެ ނަތީޖާއަކުން މޮޅުވިއިރު، ދެވަނަ މެޗުގައި މުބާރާތުގެ ފޭވަރެޓް ޕީއެސްޖީ އަތުން މޮޅުވީ 1-0 ގެ ނަތީޖާއަކުންނެވެ.

ގުރޫޕް އެފްގައި ޖަރުމަނުގެ ބޮރޫޝިއާ ޑޮޓްމަންޑް އަދި ސައުތު އެފްރިކާގެ މަމެލޯޑީ ސަންޑައުންގެ އިތުރުން ސައުތު ކޮރެއާގެ އުލްސާން އެޗްޑީ އާއެކު ބްރެޒިލްގެ ފްލޫމިނެންސް ހިމެނޭއިރު، އެޓީމުގެ ފުރަތަމަ މެޗުގައި ޑޮޓްމަންޑް އާއި ވާދަކޮށް 0-0 ގެ ނަތީޖާއަކުން ދެޓީމު ވަނީ އެއްވަރުވެފައެވެ.

މީގެ އިތުރުން ގުރޫޕް ޑީގައި ޕްރެމިއާ ލީގުގެ ޗެލްސީ އަދި އެމެރިކާގެ ލޮސް އެންޖެލެސް އެފްސީގެ އިތުރުން ޓިއުނީޝިއާގެ ސްޕެރެންސް ޓޫނިސް އާއެކު ބްރެޒިލްގެ ފްލެމެންގީ ހިމެނޭއިރު، ކުޅުނު ދެމެޗުން ވެސް މޮޅުވެ ގުރޫޕްގެ އެއްވަނައިގައި މިވަގުތު އޮތީ ފްލެމެންގޯ އެވެ. އެޓީމުން ވަނީ ފުރަތަމަ މެޗުގައި 2-0 ގެ ނަތީޖާއަކުން ޕެރެންސް ޓޫނިސް ބަލިކޮށްފައެވެ. އަދި ދެވަނަ މެޗުގައި 3-1 ގެ ނަތީޖާއަކުން ޗެލްސީ ބަލިކޮށް ބާކީ އެއްމެޗު އޮއްވައި އެޓީމުން ވަނީ މުބާރާތުގެ ދެވަނަ ބުރުގެ ޖާގައެއް ކަށަވަރުކޮށްފައެވެ