ދިވެހިންގެ އުއްމީދާ އެއްގޮތަށް މަސައްކަތްކުރާނެ ކަމުގެ ޔަޤީންކަން ދެން: އީގަލް ހިލްސްގެ ޗެއާ
ރަސްމާލޭގައި ހިންގުމަށް ހަމަޖެހިފައިވާ ބިޔަ މަޝްރޫޢާ ގުޅޭ ގޮތުން ދިވެހިންގެ އިތުބާރު ލިބިފައިވާ ކަމަށް ވިދާޅުވެ އީގަލް ހިލްސްގެ ޗެއާމަން މުޙައްމަދު އަލައްބާރު އެ ކުންފުނިން ރައްޔިތުން އެދޭ ގޮތަށް މަސައްކަތްކޮށްދެއްވާނެ ކަމުގެ ޔަޤީންކަން ދެއްވައިފިއެވެ.
އަލައްބާރު މި ޔަޤީންކަން ދެއްވީ ރަސްމާލޭގެ މަޝްރޫޢު ނިމުމުން އެ ތަން އޮންނާނެ ގޮތް ތަޞައްވުރުކޮށް އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ތައްޔާރުކޮށްފައިވާ ވީޑިއޯއެއް އިންސްޓަގްރާމްގައި ޢާއްމުކުރައްވައި ދެއްވި މެސެޖެއްގައެވެ.
އެ މެސެޖްގައި ވިދާޅުވީ ރާއްޖޭގެ ތާރީޚުގައި އެންމެ ބޮޑު އިންވެސްޓްމެންޓް ގެންނަ ކުންފުނީގެ ހައިސިއްޔަތުން އީގަލް ހިލްސްއާ މެދު ދިވެހިން ކުރާ އިތުބާރު ޤަބޫލުކުރައްވާ ކަމަށާއި މި ފުރުޞަތު ލިބުމަކީ ކުންފުންޏަށް ފަޚުރެއް ކަމަށެވެ.
ތާރީހުގައި އަންނަ އެންމެ ބޮޑު އިންވެސްޓްމެންޓާ އެކު ދިވެހިން އަޅުގަނޑުމެންނަށް އިތުބާރުކުރޭ. މިއީ އަޅުގަނޑުމެންނަށް ލިބޭ ޝަރަފެއް
އަލައްބާރު
މަޝްރޫޢާ ގުޅޭ ތަފުޞީލު ދެއްވަމުން އަލައްބާރު ވިދާޅުވެފައިވަނީ ރަސްމާލޭގައި އުފައްދަނީ ހަމައެކަނި ޢިމާރާތްތަކެއް ނޫން ކަމަށާއި ދިރިއުޅުމުގެ ވައްޓަފާޅިއެއް ކަމަށެވެ. އެ ތަނުން ޕްރޮޕަޓީއެއް ގަންނަ ފަރާތްތަކަށް ދުނިޔޭގައި ވެސް އެފަދަ ވިޔަފާރިއަކުން ލިބޭނެ އެންމެ ރަނގަޅު ފައިދާ ލިބޭނެ ކަމަށް ވެސް ވިދާޅުވެފައިވެއެވެ.
މި އުފައްދަނީ ދިރިއުޅޭނެ ތަނެއް. އެތަނުގައި މީހުންނަށް މަހެއް ވަންދެން ނޫނީ ހަފުތާއެއް ވަންދެން ތިބެވޭނެ. އެ ތަނުގައި ރީތި ގޮނޑުދޮށްތައް ހުންނާނެ. އަދި ރެސްޓޯރެންޓްތަކާއި ހޮޓާތަކާއި ކުޅިވަރުކުޅޭނެ ތަންތަނާއި ކުޑަކުދިންނަށް ހާއްސަ ތަންތަން ހުންނާނެ
އަލައްބާރު
ރަސްމާލެ ތަރައްޤީކުރުމުގެ މި މަޝްރޫޢަށް ފޮރިން ޑައިރެކްޓް އިންވަސްޓްމެންޓްގެ ގޮތުގައި 20 ބިލިއަން ޑޮލަރަށް ވުރެ ގިނަ ފަންޑިންގ ލިބިގެންދާނެކަމަށް މަޝްރޫޢު ހިންގާ ފަރާތުން ވަނީ ބުނެފައެވެ. "މޯލްޑިވްސް ވޯޓާފްރޮންޓް އެންޑް މެރީނާ" ގެ ނަމުގައި ހިންގާ މި ބިޔަ މަޝްރޫޢަށް ރަސްމާލޭގެ 500 ހެކްޓަރު ދޫކުރުމަށް ސަރުކާރުން ވަނީ ނިންމާފައެވެ.
މި މަޝްރޫޢުއަށް އިދިކޮޅު ބައެއް ސިޔާސީފަރާތްތަކުން ފާޑުކިޔަމުންދާއިރު، މި މަޝްރޫޢު ނިމޭއިރު ރަސްމާލެ ވެގެންދާނީ، ހުރިހާ ޚިދުމަތެއް ލިބޭ ޒަމާނީ އިންޓަގްރޭޓެޑް ސިޓީއަކަށް ކަމަށް ފިނޭންސް މިނިސްޓަރު ޙަސަން ޒަރީރު ވަނީ ވިދާޅުވެފައެވެ. މި އެއްބަސްވުމުގައި ސޮއިކުރީ ކުންފުނީގެ މަސައްކަތުގެ ފެންވަރު ސީދާ ބެލުމަށް ފަހުގައި ކަމަށް ޒަރީރު ވަނީ ވިދާޅުވެފައެވެ. އެ ގޮތުން މިސްރުގެ އިސްކަންދަރިއްޔާގައި "މަރާސީ" ގެ ނަމުގައި އީގަލް ހިލްސް އާއި އިމާރު ގުޅިގެން ހިންގާ މަޝްރޫޢުގެ އިތުރުން އެތަނުގައި ވެސް ޔޮޓް މެރީނާއަކާއި އެކި ފެންވަރުގެ ތިން ހޮޓަލާއި ތިން ޓައުނެއްގެ ގޮތުގައި ޕްރޮޕަޓީ ތަރައްޤީކޮށް ސްމާޓް ސިޓީއެއްގެ ގޮތުގައި ޚިދުމަތް ދެމުން ގެންދާ ކަމަށް މިނިސްޓަރު ޒަރީރު ވަނީ ވިދާޅުވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
