ސިޔާދަތަށް ހެލިކޮޕްޓަރުން ގެއްލުންވާނަމަ ދިވެހި ސިފައިން އަތް އުރާލައިގެން ނުތިބޭނެ: ބްރިގޭޑިއަރ ޒުހައިރު

އިންޑިޔާ ސަރުކާރުން ހަދިޔާކޮށްފައިވާ ހެލިކޮޕްޓަރުތައް ދުއްވައިގެން ރާއްޖޭގެ ސިޔާދަތަށް ގެއްލުންވާނެނަމަ ދިވެހި ސިފައިން އަތް އުރާލައިގެން ނުތިބޭނެކަމަށް ކޯސްޓްގާޑްގެ ކޮމާންޑަރު ބްރިގޭޑިއަރ އަލީ ޒުހައިރު ވިދާޅުވެއްޖެއެވެ.

ބްރިގޭޑިއަރ އަލީ ޒުހައިރު މިހެން ވިދާޅުވީ އެމްއެންޑީއެފްގެ ކޯސްޓްގާޑުން ކުރަމުންދާ މަސައްކަތްތަކާއި ބެހޭގޮތުން މައުލޫމާތު ދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުންނެވެ.

އެބޭފުޅާ ވިދާޅުވީ އެ ހެލިކޮޕްޓަރުތައް އުދުހުމުގައި އިންޑިޔާގެ ސިފައިން ހަރަކާތްތެރިވިކަމުގައިވިޔަސް، އެ ހެލިކޮޕްޓަރުތައް އޮޕަޜޭޓްކުރަނީ ދިވެހި ސިފައިންގެ ބެލުމުގެ ދަށުންކަމުގައެވެ. އަދި އެފަރާތްތަކުން ރާއްޖޭގެ ސިޔާދަތަށް ގެއްލުންވާނެފަދަ މައުލޫމާތެއްއެއްކުރުމަކަށް ފުރުސަތެއް ނުލިބޭނެކަމަށާއި އެފަދަ ކަމެއް ކުރާނަމަ ދިވެހި ސިފައިން އަތް އުރާލައިގެން ނުތިބޭނެކަމަށް ޒުހައިރު ވަނީ ފާހަގަކުރައްވާފައެވެ.

ހެލިކޮޕްޓަރު ބޭނުން ކުރާނީ އެއްތަނުން އަނެއްތަނަށް ބަލި މީހުން އުފުލުމާއި އިމަޖެންސީ ހާލަތްތަކުގައިކަމަށްވެސް ޒުހޫރުވަނީ ފާހަގަކުރައްވާފައެވެ. އަދި މިސަރުކާރުން ހެލިކޮޮޕްޓަރުތައް އަނބުރާ ފޮނުވާލުމުގެ ވިސްނުމެއް ނުގެންގުޅޭކަމަށްވެސް ވަނީ ވިދާޅުވެފައެވެ.