ބަންގްލަދޭޝްގެ ކޮލެޖަކަށް އަސްކަރީ ޖެޓެއް ވެއްޓި 19 މީހަކު މަރުވެއްޖެ
ބަންގްލަދޭޝްގެ ކޮލެޖަކަށް އަސްކަރީ ޖެޓެއް ވެއްޓި 19 މީހަކު މަރުވެއްޖެ އެވެ.
ބަންގާޅުގެ މީޑިއާތަކުން ބުނެފައިވަނީ ބޯޓު ވެއްޓިފައިވަނީ، މިއަދުގެ މެންދުރުގެ ވަގުތެއްގައި ބަންގްލަދޭޝްގެ ވެރިރަށް ޑާކާގެ އުއްތަރާ އަވަށުގައި ހުންނަ މައިލްސްޓޯން ސްކޫލް އެންޑް ކޮލެޖުގެ ކެމްޕަހަކަށެވެ. މިހާދިސާގައި މަރުވެފައިވަނީ 16 ދަރިވަރުންނާއި، 2 މުދައްރިސެއްގެ އިތުރުން ޖެޓްގެ ޕައިލެޓެވެ.
މި ހާދިސާގައި 19 މީހަކު މަރުވެފައިވާއިރު 100 އަށްވުރެ ގިނަ މީހުން ވަނީ ޒަހަމްވެފަ އެވެ. ވެއްޓުނު ޖެޓަކީ ޗައިނާގެ ޖޭ-7 ފައިޓަރުގެ އެޑްވާންސް ވާޝަން ކަމަށްވާ އެފް-7ބީޖީއައިގެ ޖެޓެކެވެ.
ބަންގްލަދޭޝްގެ ވަގުތީ ލީޑަރު މުޙައްމަދު ޔޫނުސް އެކްސްގައި ހިއްސާކުރެއްވި ޕޯސްޓެއްގައި ވަނީ ހާދިސާއާ ގުޅިގެން ހިތާމަ ފާޅުކުރެއްވައި މަރުވިމީހުންގެ އާއިލާތަކަށް ތައުޒިޔާ ވިދާޅުވެފައެވެ.
ޓީވީ ފޫޓޭޖާއި ސޯޝަލް މީޑީޔާގައި އެކިފަރާތްތަކުން ހިއްސާކޮށްފައިފާ ވީޑިއޯތަކުން ފެންނަ ގޮތުގައި ބޯޓު ވެއްޓުނު ތަން ވަނީ އަލިފާނާއި ދުމުން ފުރިފަ އެވެ. އެވަގުތު އެމަޖެންސީ ހާލަތުގައި މަސައްކަތްކުރާ މުވައްޒަފުން އަލިފާންގަނޑު ނިއްވުމުގެ މަސައްކަތްކުރާ ތަން ވީޑިއޯތަކުން ފެނެ އެވެ. މިހާދިސާ ހިނގަން މެދުވެރިވި ސަބަބެއް އެޤައުމުގެ ކަމާބެހޭ އެއްވެސް އިދާރާއަކުން އަދި ހާމަކޮށްފައެއް ނުވެ އެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
