ބޮޑު އަޣުލަބިއްޔަތަކުން ބަންގްލަދޭޝްގެ އިންތިޚާބު ބީއެންޕީން ކާމިޔާބުކޮށްފި

ބަންގްލަދޭޝްގެ ކުރީގެ ބޮޑުވަޒީރު ޝައިޚް ހަސީނާގެ ވެރިކަން ޒުވާނުންގެ ވަރުގަދަ އިހުތިޖާޖުތަކަކަށްފަހު ވެއްޓުނު ފަހުން ބޭއްވި ފުރަތަމަ އާންމު އިންތިޚާބު ބަންގްލަދޭޝް ނޭޝަނަލިސްޓް ޕާޓީ (ބީއެންޕީ) އިން ބޮޑު އަޣުލަބިއްޔަތަކުން ކާމިޔާބުކޮށްފިއެވެ.

މިދިޔަ ބުރާސްފަތި ދުވަހު ބޭއްވި މި އިންތިޚާބުގެ ނަތީޖާ ދައްކާގޮތުން، 300 ގޮނޑި ހިމެނޭ ގާނޫނު ހަދާ މަޖިލިސް ނުވަތަ 'ޖާތިޔާ ސަންގްސަދު' ގެ 209 ގޮނޑި ކާމިޔާބުކޮށްފައިވަނީ ބީއެންޕީ ހިމެނޭ އިއްތިހާދުންނެވެ. މިއީ މަޖިލީހުގެ ތިންބައިކުޅަ ދެބައި އަޣުލަބިއްޔަތެކެވެ.

މި އިންތިޚާބަކީ 175 މިލިއަން މީހުންގެ އާބާދީއެއް އޮންނަ، އިސްލާމީ އަޣުލަބިއްޔަތު އޮތް ބަންގްލަދޭޝްގެ ސިޔާސީ ހަމަޖެހުމަށްޓަކައި ނުހަނު މުހިންމު އިންތިޚާބެކެވެ. ޚާއްސަކޮށް، ހަސީނާގެ ސަރުކާރާ ދެކޮޅަށް ކުރި މުޒާހަރާތަކުގައި ގައުމުގެ އިގްތިސާދަށާއި މުހިންމު ސިނާޢަތްތަކަށް ލިބުނު ގެއްލުންތަކުން އަރައިގަތުމަށް މި އިންތިޚާބުގެ ނަތީޖާ މުހިންމު ދައުރެއް އަދާކުރާނެ ކަމަށް ބެލެވެއެވެ.

ބީއެންޕީގެ ކާމިޔާބީއާ ގުޅިގެން އެ ޕާޓީން ވަނީ ރައްޔިތުންނަށް ޝުކުރު އަދާކޮށްފައެވެ. ނަމަވެސް، އިންތިޚާބުގެ ކާމިޔާބީ ފާހަގަކުރުމަށް އެއްވެސް ހިނގާލުމެއް ނުވަތަ އެއްވުމެއް ނުބޭއްވުމަށް އެ ޕާޓީން ވަނީ އިލްތިމާސްކޮށްފައެވެ. އޭގެ ބަދަލުގައި، ގައުމުގެ ސަލާމަތާއި ކުރިއެރުމަށް އެދި ހުކުރު ދުވަހު މިސްކިތްތަކާއި އެހެނިހެން އަޅުކަންކުރާ ތަންތަނުގައި ޚާއްސަ ދުޢާއެއް ކުރުމަށް އެ ޕާޓީން ވަނީ އެދިފައެވެ.

ބީއެންޕީގެ ލީޑަރަކީ ކުރީގެ ބޮޑުވަޒީރު ޚާލިދާ ޒިޔާ އާއި ކުރީގެ ރައީސް ޒިޔާއުއްރަޙްމާންގެ ދަރިކަލުން ތާރިގް ރަޙްމާން (60 އަހަރު) އެވެ. ބީއެންޕީން ވެފައިވާ ވައުދުތަކުގެ ތެރޭގައި ފަގީރު އާއިލާތަކަށް މާލީ އެހީތެރިކަން ފޯރުކޮށްދިނުމާއި، އެކަކަށް ބޮޑުވަޒީރުކަން ކުރެވޭނީ ގިނަވެގެން 10 އަހަރު ކަމަށް ކަނޑައެޅުމާއި، ކޮރަޕްޝަނާ ދެކޮޅަށް ވަރުގަދަ ފިޔަވަޅުތަކެއް އެޅުން ހިމެނެއެވެ.

މި އިންތިޚާބުގައި ބީއެންޕީއާ އެންމެ ގާތުން ވާދަކުރި ޖަމާއަތޭ އިސްލާމީ ޕާޓީއަށް ލިބިފައިވަނީ 68 ގޮނޑިއެވެ. އެ ޕާޓީގެ ލީޑަރު ޝަފީގުއްރަޙްމާން ވަނީ ބަލި ގަބޫލުކުރައްވައި، އިދިކޮޅު ޕާޓީއެއްގެ ގޮތުގައި އޮވެ ގައުމަށް ފައިދާހުރި މަސައްކަތްތަކެއް ކުރައްވާނެ ކަމަށް ވިދާޅުވެފައެވެ.

މިއީ ދެކުނު އޭޝިއާ ސަރަހައްދުގައި ފަހަކަށް އައިސް ޒުވާނުން އިސްވެ ތިބެ ގެނައި އިންގިލާބުތަކަށްފަހު ބޭއްވުނު ފުރަތަމަ އިންތިޚާބެވެ.