ކްރިމިނަލް ކޯޓުގެ އިމާރާތުގެ ހާލަތުގެ ސަބަބުން ޖިނާއީ ހުރިހާ މައްސަލަތައް ވަނީ ހުއްޓިފައި: އުއްތަމަ ފަނޑިޔާރު

ކްރިމިނަލް ކޯޓުގެ އިމާރާތް ހުރި ހާލަތުގެ ސަބަބުން ޖިނާއީ ހުރިހާ މައްސަލަތައް ވަނީ ހުއްޓިފައި ކަމަށް އުއްތަމަ ފަނޑިޔާރު އަހުމަދު މުއުތަސިމް އަދުނާނު މިރޭ ވިދާޅުވެއްޖެއެވެ.

އުއްތަމަ ފަނޑިޔާރު މިފަދައިން ވިދާޅުވީ ރޭ ބޭއްވި ޝަރުއީ ނިޒާމުގެ އާ އަހަރު ފެށުމުގެ ރަސްމިއްޔާތުގައި ވާހަކަ ދައްކަވަމުންނެވެ.

ފާއިތުވެ ދިޔަ އަހަރު ކްރިމިނަލް ކޯޓަށް 854 މައްސަލައެއް ހުށައެޅިފައިވާކަން ފާހަގަކުރައްވާ މުއުތަސިމް ވިދާޅުވީ އެ ކޯޓުގެ އިމާރާތް ބާވެ، މައްސަލަތައް ކުރިއަށް ގެންދަން ދަތިވުމުން މައްސަލަތައް އޮތީ ހުއްޓިފައިކަމަށެވެ.

"ފާއިތުވި އަހަރު ކްރިމިނަލް ކޯޓަށް 854 މައްސަލައެއް ހުށައެޅިފައިވޭ. ނަމަވެސް ހިތާމަ އާއި އެކު ފާހަގަ ކުރާ ކަމަކީ އެ ކޯޓް ހިންގަމުން އަންނަ އިމާރާތް ބާވެ މީހުން ހާޒިރުކޮށް މަސައްކަތް ކުރުމަށް އެކަށީގެންވާ އިމާރާތަކަށް ނުވާތީ."

އުއްތަމަ ފަނޑިޔާރު ވިދާޅުވިއެވެ.

މިކަމުގެ ސަބަބުން އޭގެ ނޭދެވޭ އަސަރު މުޖުތަމައުއަށް ކުރާނެ ކަމަށާއި މިހާރު ވެސް ކްރިމިނަލް ކޯޓުން ކޮންމެހެން ނެރެންޖެހޭ އިއުލާނުތައް ނެރި، މީހުން ހާޒިރުކޮށް، ފަނޑިޔާރުން އިށީންދެވަޑައިގަންނަވާނެ އަދި މުވައްޒަފުން ތިބޭނެ ތަނެއް ވެސް ނެތުމުގެ ސަބަބުން  ޖިނާއީ މައްސަލަތައް އޮތީ މާލޭގައި ހުއްޓިފައިކަމަށް ވެސް ވިދާޅުވިއެވެ.

ދާދި ފަހުން ރާއްޖޭގެ އެކި ހިސާބުތަކަށް ކުރި ވިއްސާރައިގައި ކްރިމިނަލް ކޯޓުގެ އިމާރާތަށް ފެންވަދެ ސާވާއަށް ލިބުނު ގެއްލުން ތަކާއި އެކު އިންޓަނެޓްގެ ޚިދުމަތް މެދުކެނޑި، އިދާރީ ގޮތުން ކުރަން ހުރި ކޯޓުގެ އެއްވެސް މަސައްކަތް ނުކުރެވި އަދި އެދުވަހު ބާއްވަން ޝެޑިއުލްކޮށްފައިވާ ހުރިހާ ޝަރީއަތްތައް ވެސް ކްރިމިނަލް ކޯޓުން ވަނީ ކެންސަލް ކޮށްފައެވެ.

ކްރިމިނަލް ކޯޓު ހިންގާ އިމާރާތް ބާވެ، އިމާރާތް ބަދަލުކުރުމަށް ޖުޑީޝަލް އެޑްމިނިސްޓްރޭޝަން ޑިޕާޓްމެންޓު (ޑީޖޭއޭ)އިން ވަނީ ކްރިމިނަލް ކޯޓު ހިންގުމަށް އިމާރާތެއް ކުއްޔަށް ހޯދުމަށް ޓެންޑާކޮށްދިނުމަށް އެދި ޓެންޑާ ބޯޑަށް ވެސް މީގެ ކުރިން ފޮނުވާފައެވެ.

ކްރިމިނަލް ކޯޓު އެންމެ ފުރަތަމަ ހިންގީ ޖަސްޓިސް ބިލްޑިން ގައި ނަމަވެސް ތަނުގެ ޖާގައިގެ ދަތިކަން ބޮޑުވުމުން މިހާރު އެ ކޯޓު ހިންގަމުން އަންނަނީ ތީމުގެއާ ޖެހިގެން ހުންނަ އިމާރާތުގައެވެ.