ބޯހިޔާވަހިކަމުގެ މައުލޫމާތު ފޯރުކޮށްދިނުމަށް ވައިބާ ކޮމިއުނިޓީތަކެއް

ސަރުކާރުން ހިންގާ ބޯހިޔާވަހިކަމުގެ މަޝްރޫއުތަކާ ގުޅޭ މައުލޫމާތު ރައްޔިތުންނަށް ފޯރުކޮށްދިނުމުގެ މަގްސަދުގައި ވައިބާ ކޮމިއުނިޓީތަކެއް އުފައްދައިފި އެވެ.

ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ބުނީ އެކަމަށް ހާއްސަކޮށް ހަތަރު, ވައިބާ ކޮމިއުނިޓީއެއް އުފައްދާފައިވާ ކަމަށެވެ.

ވައިބާ ކޮމިއުނިޓީތައް އުފައްދާފައިވަނީ ބޯހިޔާވަހިކަމުގެ އެކި މަޝްރޫއުތަކަށް ހާއްސަކޮށްގެން ކަމަށާ އެގޮތުން ބިންވެރިޔާ ސްކީމްގެ ދަށުން ގޯތި ލިބިފައިވާ ފަރާތްތަކަށް ހާއްސަ ތިން, ވައިބާ ކޮމިއުނިޓީއެއް ވަނީ އުފައްދާފަ އެވެ.

އެއީ ބިންވެރިޔާ ސްކީމްގެ ދަށުން ހުޅުމާލެއިން ގޯތި ލިބިފައިވާ ފަރާތްތަކަށް ހާއްސަ "ބިންވެރިޔާ ހުޅުމާލެ" ވައިބާ ކޮމިއުނިޓީ އާއި ބިންވެރިޔާ ސްކީމްގެ ދަށުން ގުޅީފަޅުން ގޯތި ލިބިފައިވާ ފަރާތްތަކަށް ހާއްސަ "ބިންވެރިޔާ ގުޅިފަޅު" ވައިބާ ކޮމިއުނިޓީ އާއި ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ހައްސަ "ބިންވެރިޔާ ގިރާވަރުފަޅު" ވައިބާ ކޮމިއުނިޓީ އެވެ.

ދެން ހިމެނެނީ "ބޯހިޔާވަހިކަން އެންމެންނަށް" ސިޔާސަތާއި ގުޅޭ މައުލޫމާތު ހިއްސާކުރުމަށް ހާއްސަ "ބޯހިޔާވަހިކަން އެންމެންނަށް" ވައިބާ ކޮމިއުނިޓީ ގުރޫޕެވެ.

މި ވައިބާ ކޮމިއުނިޓީތައް މެދުވެރިކޮށް ބޯހިޔާވަހިކަމުގެ މަޝްރޫއުތަކާ ގުޅޭ އެންމެ ފަހުގެ އިއުލާނުތަކާއި އަދާހަމަތައް ލިބިގެންދާނެ ކަމަށް ގެދޮރުވެރިކަމާއި އުމްރާނީ ތަރައްޤީއާ ބެހޭ ވުޒާރާއިން ބުނެ އެވެ.

މި ސަރުކާރުން ބޯހިޔާވަހިކަމާއި ބިމަށް ހުޅުވާލި ފުރުސަތުގައި 50,000 ވުރެ ގިނަ އެޕްލިކޭޝަން ވަނީ ލިބިފަ އެވެ.