ފާސްކުރީ މީޑިއާ ކޮންޓްރޯލްކުރާ ޤާނޫނެއް، ތަސްދީގު ނުކުރަން އެދިއްޖެ

މޯލްޑިވްސް މީޑިއާ އެންޑް ބްރޯޑްކާސްޓިންގ ރެގިއުލޭޝަން ބިލް މިހާރު އޮތްގޮތަށް ރައީސުލްޖުމްހޫރިއްޔާ ތަސްދީގުކުރައްވައިފިނަމަ އެ ބިލް ވެގެންދާނީ މީޑިއާ ކޮންޓްރޯލްކުރާ ޤާނޫނަކަށް ކަމަށް ނޫސްތަކުގެ ބަލަދުވެރިފަރާތުން ބުނެފިއެވެ.

ރައްޔިތުން މަޖިލީހުން އިއްޔެ މީޑިއާ ރެގިއުލޭޝަން ބިލް ފާސްކުރުމާ ގުޅިގެން ނޫސްތަކުގެ ބަލަދުވެރިފަރާތް، މޯލްޑިވްސް މީޑިއާ ކައުންސިލު (އެމްއެމްސީ) އިން ނެރުނު ބަޔާނެއްގައި ބުނެފައިވަނީ، ގިނަ އަދަދެއްގެ ނޫސްވެރިންނާއި، މީޑިއާ މުއައްސަސާތަކާއި، މަދަނީ ޖަމްޢިއްޔާތަކުން މީޑިއާ ބިލާގުޅޭގޮތުން ކަންބޮޑުވުން ފާޅުކުރަމުންދަނިކޮށް އެ ބިލް މަޖިލީހުން ފާސްކުރުމަކީ އެ ކައުންސިލުން ނުހަނު ކަންބޮޑުވާ ކަމެއްކަމަށެވެ.

އެމްއެމްސީން ބުނީ މި ބިލު މަޖިލީހަށް ހުށަހެޅުނީއްސުރެ، އެ ކައުންސިލުގެ އިތުރުން މޯލްޑިވްސް ބްރޯޑްކާސްޓިން ކޮމިޝަނާއި، ހިއުމަން ރައިޓްސް ކޮމިޝަނާއި، ބާ ކައުންސިލާއި، ނޫސްވެރިންނާއި، މޯލްޑިވްސް ޖަރނަލިސްޓް އެސޯސިއޭޝަނާއި، އަދި ނޫސްވެރިކަމުގެ މިނިވަންކަމަށް ވަކާލާތު ކުރާ ބައިނަލްއަޤްވާމީ އެކި ޖަމިއްޔާތަކުން، މި ބިލަށް ކަންބޮޑުވުން ފާޅުކޮށްފައިވާކަމަށެވެ. އެހެނެއްކަމަކު އެ ކަންބޮޑުވުންތަކަށް އެކަށީގެންވާ ގޮތެއްގައި ރިޢާޔަތްކުރެއްވުމެއް ނެތި ބިލު ފާސްކުރައްވާފައިވާތީ، ބިލު ތަޞްދީޤު ނުކުރެއްވުމަށް އެދި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ވަނީ ސިޓީފުޅެއް ފޮނުއްވާފައިވާކަމަށްވެސް އެމްއެމްސީން ބުންޏެވެ.

އެމްއެމްސީން ބުނީ، މީޑިއާއާ ގުޅުންހުރި މައްސަލަތަކާއި ގޮންޖެހުންތަކަށް ދާއިމީ ޙައްލެއް ހޯދައި ދިނުމަށް ހެޔޮ ނިޔަތެއްގައި އެދޭ ނަމަ، ފުޅާ ދާއިރާއެއްގައި މަޝްވަރާކުރުމަށާއި، ޤައުމީ ފެންވަރުގައި ގިނަ ފަރާތްތަކުގެ ބައިވެރިވުމާ އެކު ދިރާސާކުރުމުގެ މަރުޙަލާއެއް ކުރިއަށް ގެންދިއުމަށް ކައުންސިލުން ތަކުރާރުކޮށް އެދެމުން އައިކަމަށެވެ.

ނަމަވެސް، ރައްޔިތުންގެ މަޖިލިސް ޗުއްޓީގައި އޮއްވައި ދައުރުން ބޭރުން އަވަސް ދުވެއްޔެއްގައި ހާމަކަން ކުޑަވާ ގޮތައް ކުރިއަށް ގެންދިޔަކަމީ، ބައެއް މަރުހަލާތައް ނަމަކަށް ފުރިހަމަ ކޮށްލުމުގެ ނިޔަތުގައި ކުރެވުނު ކަމެއް ކަމުގައި ދެކޭކަމަށާއި، މިހާރު އޮތްގޮތުން ބިލް ތަސްދީގު ކޮށްފިނަމަ ބިލް ވެގެންދާނީ މީޑިއާ ކޮންޓްރޯލްކުރާ ޤާނޫނަކަމަށްވެސް މީޑިއާ ކައުންސިލުގެ ބަޔާނުގައި ބުންޏެވެ.

އަދިއެއާއެކު ނޫސްވެރިކަމުގެ މިނިވަންކަން ހަނިވެ، ފާޑުކިޔާ އަޑުތައް މަޑުކުރުމަށް ބޭނުންކުރެވިދާނެ ވަސީލަތްތަކެއް ތަޢާރަފްކުރުމުގެ ފުރުޞަތު ފަހިވެގެން ދާނޭކަމަށެވެ. އަދި ކޮންމެ ޑިމޮކްރަސީއެއްގެ ވެސް އަސާސީ ތަނބެއްކަމުގައިވާ މިނިވަން ނޫސްވެރިކަމުގެ ތެރެއިން، ކޮރަޕްޝަނާއި ނަހަމަ ގޮތުގައި ބާރުގެ ބޭނުންކުރުމާ ދެކޮޅަށް ފާރަވެރިވުމުގެ ގޮތުން ކުރެވޭ ތަޙްޤީޤީ އަދި ޖަވާބުދާރީކުރުވުމުގެ ނޫސްވެރިކަން، ހުއްޓުވުމަށް ބާރު ލިބިގެން ދާނޭކަމަށްވެސް އެމްއެމްސީން ބުންޏެވެ.

އެމްއެމްސީން ބުނީ މި ބިލު ތަސްދީޤުކުރުމާ އެކު، މުއައްސަސާއެއްގެ ގޮތުގައި އެ ކައުންސިލް އުވިގެންދިޔަ ނަމަވެސް، މިނިވަން ނޫސްވެރިކަމުގެ ރޫހު ދެމި އޮންނާނޭ ކަމަށެވެ.