ފުޅަދޫގައި މިންގަނޑާ ހިލާފަށް ހެދުން އަޅާ ފަތުރުވެރިން ނިސްބަތްވާ ގެސްޓްހައުސްތައް ޖޫރިމަނާ ކުރަނީ

ބ. ފުޅަދޫގެ އާންމު ސަރަހައްދުތަކުގައި އިސްލާމް ދީނާއި ރާއްޖޭގެ އިޖުތިމާއީ މިންގަނޑުތަކާ ހިލާފަށް، ބިކިނީ ފަދަ ކުރު ހެދުން އަޅައިގެން އުޅޭ ފަތުރުވެރިން ނިސްބަތްވާ ގެސްޓްހައުސްތައް ޖޫރިމަނާކުރުމަށް އެ ރަށު ކައުންސިލުން ނިންމައިފިއެވެ.

ފުޅަދޫ ކައުންސިލުން ނެރުނު އިއުލާނެއްގައި ބުނެފައިވަނީ، ރަށުގެ އާންމު ސަރަހައްދުތަކުގައި ފަތުރުވެރިން މިންގަނޑާ ހިލާފަށް ހެދުން އަޅައިގެން އުޅޭ ކަމުގެ ޝަކުވާ ރައްޔިތުންގެ ފަރާތުން ތަކުރާރުކޮށް ލިބެމުންދާ ކަމަށެވެ.

މި މައްސަލަ ހައްލުކުރުމަށް ކައުންސިލުން މީގެ ކުރިން މަސައްކަތްތަކެއް ކޮށްފައިވީ ނަމަވެސް، މިއަދާ ހަމައަށްވެސް މިކަން ތަކުރާރުވަމުންދާތީ ރައްޔިތުންގެ ކަންބޮޑުވުން އިންތިހާއަށް ބޮޑުވެފައިވާ ކަމަށް ބުނެފައިވެއެވެ.

މިކަމާ ގުޅޭގޮތުން ކައުންސިލްގެ 4 ވަނަ ދައުރުގެ 142 ވަނަ ޖަލްސާގައި މަޝްވަރާކުރުމަށްފަހު، ދީނީ އަދި އިޖުތިމާއީ މިންގަނޑާ ހިލާފަށް ހެދުން އަޅައިގެން އުޅޭ ފަތުރުވެރިން ތިބޭ ގެސްޓްހައުސްތައް ބަލައި، އެ ތަންތަން 750 (ހަތްސަތޭކަ ފަންސާސް) ރުފިޔާއިން ޖޫރިމަނާ ކުރުމަށް ނިންމާފައިވާ ކަމަށްވެސް އިއުލާނުގައިވެއެވެ.

ފުޅަދޫ ކައުންސިލުން ހާމަކުރި ގޮތުގައި، މި ނިންމުމަށް އަމަލުކުރަން ފަށާނީ އިއުލާން އާންމުކުރާ ވަގުތުން ފެށިގެންނެވެ.

ލޯކަލް ޓޫރިޒަމް ރަށްރަށަށް ތަޢާރަފްވެ، ފައްކާވާން ފެށިފަށުން ފަތުރުވެރިން އާއްމު ތަންތަނުގައި ބިކިނީގައި އުޅޭ މައްސަލަ އަކީ ވަރަށް ގިނައިން ފެންމަތިވަމުން އަންނަ ކަމެކެވެ. އެކަމާ ގުޅިގެން ރައްޔިތުން ކަންބޮޑުވުންފާޅުކުރި ނަމަވެސް އެދެވޭ ހައްލެއް މިހާތަނަށްވެސް ލިބިފައި ނުވެއެވެ.