އަބްދުއްރަހުމާންގެ މަރުގެ މައްސަލަ: އާޝިދުގެ ބަންދަށް 30 ދުވަސް ޖަހައިފި

ޖުލައިމަހުގެ 13 ވަނަ ދުވަހުގެ ރޭ ދަންވަރު އއ. މާޅޮހުގައި ރަހުމްކުޑަ ގޮތަކަށް ޒަޚަމްކޮށްލުމުގެ ސަބަބުން މަރުވި، އެރަށު އޯކިޑްމާގެ، ޢަބްދުއްރަޙްމާން އާދަމް (65 އަހަރު) މަރުގެ މައްސަލާގައި ހައްޔަރުކުރި ތިން މީހުންގެ ތެރޭގައި ހިމެނޭ އަހުމަދު އާޝިދުގެ ބަންދުގެމުއްދަތު އިތުރުކޮށްފިއެވެ.

މި މައްސަލައާ ގުޅޭގޮތުން ފުލުހުން ބުނީ، މައްސަލާގައި ހައްޔަރުކޮށްފައިވާ އާޝިދުގެ ބަންދަށް އިތުރު 30 ދުވަސް ކޯޓުން ޖަހައިދީފައިވާކަމަށެވެ. އަދި މި މައްސަލަ ބަލަމުންދާކަމަށްވެސް ފުލުހުން ބުންޏެވެ.

ޢަބްދުއްރަޙްމާން އާދަމް މަރުގެ މައްސަލާގައި ފުލުހުން ހައްޔަރުކޮށްފައިވާ އަނެއް ދެމީހުންނަކީ، މާޅޮހު ލިލީފެހިގޭ އުމުރުން 22 އަހަރުގެ މުހައްމަދު ވިސާމްގެ އިތުރުން ހަމަ އެރަށު ފިނިވާގޭ އުމުރުން 27 އަހަރުގެ އަހްމަދު ފާރިސް އެވެ. މި ދެމީހުން އަދިވެސް ތިބީ ފުލުހުންގެ ބެލުމުގެ ދަށުގައެވެ.

އަބްދުއްރަހްމާންގެ މަރުގެ މައްސަލައިގެ ތަހްގީގަށް ފުލުހުން ވަނީ އަބްދުއްރަހްމާނުގެ ހަށިގަނޑު ބޭރަށް ފޮނުވައިގެން ޕޯޓްސްމޯޓަމް ހެދިއެވެ. ޕޯސްޓް މޯޓަމް ރިޕޯޓުގެ ނަތީޖާއިން ދައްކާފައިވަނީ އޭނާ މަރުވީ ބޮލަށް ލިބުނު އަނިޔާތަކުގެ ސަބަބުން ކަމަށް ފުލުހުން ވަނީ ބުނެފައެވެ.

ޕޯސްޓްމޯޓަމް ހެދުމަށްފަހު ޢަބްދުއްރަހްމާނުގެ ހަށިގަނޑު މާލެ ގެނެސްފައިވަނީ ޖުލައިމަހުގެ 24 ވަނަ ދުވަހުއެވެ. ޕޯސްޓްމޯޓަމް ހަދަން އަބްދުއްރަޙްމާންގެ ހަށިގަނޑު ފޮނުވީ އިންޑިޔާގެ ތްރިވަނަންތަޕޫރަމް އަށެވެ. ޕޯސްޓް މޯޓަމް ހެދުމަށްފަހު ރާއްޖެގެނެސް އޭނާ ވަޅުލާފައިވަނީ މިދިޔަ ބްރާސްފަތިދުވަހުއެވެ.