ފީއަލީ ބަނދަރުގައި އޮތް ތެޔޮ ބޯޓެއްގައި ރޯވެ އަނދަނީ
ފ.ފީއަލީ ބަނދަރުގައި އޮތް ތެޔޮ ބޯޓެއްގައި ރޯވެ އަނދަމުންދާތީ އަލިފާން ނިއްވުމުގެ މަސައްކަތް ފުލުހުން ފަށައިފިއެވެ.
ފުލުހުން ބުނީ، މި ހާދިސާގެ ރިޕޯޓް ލިބުނީ މިއަދު 09:15 އެހައިކަންހާއިރުކަމަށެވެ.
އަލިފާންގަނޑު ނިއްވާލުމަށް އެސަރަހައްދުގައި ފުލުހުންނާއި ކަމާގުޅުން ހުރި އިދާރާތަކުން މިހާރު ދަނީ ހަރަކާތްތެރިވަމުންނެވެ.
ފީއަލީގައި ހުރި މީހަކު ”ވޮއިސް“ އަށް މައުލޫމާތު ދީފައިވާގޮތުން، މި ހާދިސާ ހިނގި އިރު ބޯޓުގައި ދެމީހުން ތިއްބެވެ. އެތަނުން އެކަކު ފިހިފައިވާއިރު، ބޯޓުގައި އަލިފާން ރޯވުމާއެކު ދެމީހުންވެސް މޫދަށް ފުންމާލީއެވެ.
”ފިހުނު މީހާ ފުދޭ ވަރަކަށް ފިހިފައި އޮތީ. އޭނާވެސް މޫދަށް ފުންމާލީ. މިހާރު އޭނާއަށް ދަނީ ހޮސްޕިޓަލުގައި ފަރުވާ ދެމުން. އޭނާގެ ހާލު ސީރިއަށް ކަމަށް މައުލޫމާތު ލިބެނީ“ ފީއަލިން ވޮއިސް އަށް މައުލޫމާތު ދިން މީހާ ބުންޏެވެ.
އެމީހާ އިތުރަށް ބުނި ގޮތުގައި ތެޔޮ ބޯޓުގައި އަލިފާނުގެ ހާދިސާ ހިނގުމުގެ ކުރީން ބާރުގަދަ އަޑެއް އިވުނެވެ. އެއާއެކު ބޯޓުގައި އަލިފާންރޯވެފައިވާއިރު، ބޯޓާއި ޖެހިގެންހުރި ދެ ދޯންޏެއްގެ އިތުރުން ދެ ޑިންގީއެއްގައިވެސް ވަނީ ރޯވެފައެވެ.
އަދި އެތަނުގެ ކައިރީގައި ހުރި އައިސްޕްލާންޓްގައިވެސް ވަރަށްބޮޑަށް ރޯވެފައިވާއިރު، އެތަނާ ޖެހިގެންހުރި ޕެޓްރޯލް ޝެޑާ ހަމައަށްވެސް އަލިފާންގަނޑު ވަނީ ފެތުރިފައި ކަމަށް ބުނެފައިވެއެވެ.
”އަލިފާންގަނޑު އަދިވެސް ކޮންޓްރޯލް ނުވޭ. ތެޔޮ ބޯޓުގައި ހުރި އެއްޗެހި ގޮވަމުންދާތީ އެތަނާ ކައިރިވެސް ނުވެވޭ. އެހެންވެ ނިއްވަންވެސް ދަތިތަކާ ކުރިމަތިވަމުންދަނީ. ބަނދަރު ކައިރީ ސަރަހައްދުގައި އުޅޭ މީހުން މިހާރު ދުރު ހިސާބަށް ވަނީ ގެންގޮސްފައި.“ އެމީހާ ބުންޏެވެ.
އަލިފާން ނިއްވުމަށް އެމްއެންޑީއެފުންވެސް އެރަށަށް ދާ ކަމަށް އެ މީހާ މައުލޫމާތު ދީފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
