ވެންޓިލޭޓަރު މައްސަލަ: 34 މިލިއަން ރުފިޔާ ރާއްޖެއަށް ދެއްކުމަށް ކުންފުންޏަށް އަންގައިފި

ނިމިދިޔަ ސަރުކާރުން ކޮވިޑް 19 ގެ އާލަމީ ވަބާގެ ތެރޭގައި ހިންގިކަމަށް ބުނާ ވެންޓިލޭޓަރުގެ ބޮޑު ހިޔާނާތާއި ގުޅިގެން ދުބާއީގެ އެގްޒެކިއުޓާސް ޖެނެރަލް ޓްރޭޑިންގެ މައްޗަށް 34.5 މިލިއަން ރުފިޔާ ދައްކަން މޯލްޑިވިސް އިންޓަނޭޝަނަލް އާބިޓްރޭޝަން ސެންޓަރުން އަންގައިފިއެވެ.

މިކަން ހާމަކޮށްފައިވަނީ އެޓާނީ ޖެނެރަލް (އޭޖީ) އޮފީހުން މިކަމާއި ގުޅޭގޮތުން ނެރުނު ބަޔާނެއްގައެވެ.

އޭޖީ އޮފީހުގެ ބަޔާނުގައިވާ ގޮތުން ރާއްޖެއަށް ވެންޓިލޭޓަރުތައް ގެނައުމަށް ކުރީ ސަރުކާރުން އެގްޒެކިއުޓާސްއާއި އެކީ އެއްބަސްވުމެއްގައި ސޮއިކޮށްފައިވަނީ 2020 ވަނަ އަހަރުގެ އޭޕްރިލް މަހުގެ 2 ވަނަ ދުވަހުއެވެ. އަދި އެއްބަސްވުމާއި ހިލާފުވުމުން ސަރުކާރުގެ ފަރާތުން އެމައްސަލަ އާބިޓްރޭޝަނަށް ހުށަހަޅާފައިވަނީ މިދިޔަ އަހަރުގެ ފެބްރުއަރީ މަހުގެ 19 ވަނަ ދުވަހުއެވެ.

އެޓާނީ ޖެނެރަލްގެ އޮފީހުން މިއަދު ނެރުނު ބަޔާނެއްގައި ބުނީ، އާބިޓްރޭޝަންގެ ފަހު ބަސް މިދިޔަ ހަފުތާގެ ބުދަ ދުވަހު ނެރެފައިވާ ކަމަށާއި ވެންޓިލޭޓަރުތަކުގެ އަގަށް ޖެހޭ 1,888,750 އެމެރިކާ ޑޮލަރު ދިވެހި ސަރުކާރަށް ދެއްކުމަށް އާބިޓްރޭޝަނުން އެންގި ކަމަށެވެ. އަދި މޭ، 2 2021 އިން ފެށިގެން އެ ފައިސާ އެގްޒެކިއުޓާސް ޖެނެރަލް ޓްރޭޑިންގެ ފަރާތުން ދިވެހި ސަރުކާރަށް ދެއްކުމާއި ހަމައަށް އިންޓަރެސްޓްގެ ގޮތުގައި އަހަރަކު ދެ ޕަސެންޓު ވެސް އެ ކުންފުނިން ދިވެހި ސަރުކާރަށް ދައްކަން ޖެހޭނެ ކަމަށް އާބިޓްރޭޝަނުން ނިންމި ކަމަށް ބަންޑާރަ ނައިބުގެ އޮފީހުން ބުންޏެވެ.

މީގެ އިތުރުން ލިކުއިޑޭޓެޑް ޑެމޭޖަސްގެ ގޮތުގައި ޖުމްލަ 223،750 ޑޮލަރާއި އެވޯޑް ނެރޭ ތާރީޚުން ފެށިގެން ލިކުއިޑޭޓެޑް ޑެމޭޖަސްގެ ފައިސާ ސަރުކާރަށް ދެއްކުމާ ހަމައަށް އިންޓްރެސްޓުގެ ގޮތުގައި އަހަރަކު ދެ ޕަސެންޓް ދައްކަން ޖެހޭ ކަމަށް ވެސް ކަނޑައަޅާފައިވެއެވެ.

އޭޖީ އޮފީހުން ވިދާޅުވީ، މިމައްސަލަ ރައްދުވާ ކުންފުނިން އެ މައްސަލައިގެ އެއްވެސް އަޑުއެހުމަކަށް ހާޒިރުވެފައި ނުވާތީ، އެފަރާތުން ދައްކަން ޖެހޭ ފައިސާ ވެސް ދެއްކީ ދިވެހި ސަރުކާރުން ކަމަށެވެ. އެގޮތުން އެ ހަރަދަށް 132،865.56 އެމެރިކާ ޑޮލަރު ދައްކާފައިވާތީ، އެއަދަދު ވެސް ހޯދަން އެދިފައިވާތީ، އާބިޓްރޭޝަންގެ ހަރަދުގެ ގޮތުގައި އެއަދަދު ދެއްކުމަށާއި އެފައިސާ ދެއްކުމާއި ހަމައަށް އަހަރަކު 2 އިންސައްތައިގެ ރޭޓޫން އިންޓަރެސްޓެގެ ފައިސާ ދެއްކުމަށް އެކުންފުންނަށް އަންގާފައިވާ ކަމަށެވެ.

އެހެންވެ، އެ ކުންފުނިން ދައްކަން ޖެހޭ ޖުމްލަ ފައިސާގެ އަދަދު 34.5 މިލިއަނަށް އަރާނެއެވެ.

އޭޖިގެ ބަޔާން ނިންމާލަމުން ބުނެފައިވަނީ އެ ނިންމުމަކީ ގާނޫނީ ގޮތުން ތަންފީޒުކުރަން ޖެހޭނެ ނިންމުމަކަށް ވާތީ އެ އެވޯޑުގައި ކަނޑަޅާފައިވާ ފައިސާ ހޯދުމުގެ މަސައްކަތް ސަރުކާރުން ކުރިއަށްގެންދާނެ ކަމަށެވެ.

މީގެ އިތުރުން އެ މައްސަލައާ ގުޅިގެން ދައުލަތަށް ބޮޑެތި ގެއްލުންތަކެއް ވެފައިވާތީ، އެ މައްސަލައިގައި އިތުރަށް ބަލަން ޖެހޭ ކަންތައްތައް ދައުލަތުގެ ކަމާ ގުޅުންހުރި މުއައްސަސާތަކަށް ހުށަހަޅައިގެން ބަލަމުންދާ ކަމަށް ވެސް އޭޖީ އޮފީހުގެ ބަޔާނުގައި ބުނެފައިވެއެވެ.