އިންސާނީ ވަގުފާރިއަށް އިނގިރޭސިވިލާތުގެ އަސްކަރީ މަރުކަޒުތައް އެޕްސްޓީން ބޭނުންކުރިތޯ ބަލަން ތަހުގީގެއް

ކުޑަކުދިންނަށް ޖިންސީ ގޯނާކުރުމާއި ކުޑަކުދިންގެ ބަރަހަނާ މަންޒަރު ވީޑިއޯކޮށް، އެ ކުދިންނާއި އެތައް ބަޔަކަށް ބްލެކްމެއިލްކުރި ޖެފްރީ އެޕްސްޓީން، އިނގިރޭސިވިލާތުގެ ރޯޔަލް އެއާފޯސް (އާރް.އޭ.އެފް) ގެ އަސްކަރީ މަރުކަޒުތައް ބޭނުންކޮށްގެން، އިންސާނީ ވަގުފާރީގެ އަމަލުތައް ހިންގާފައިވޭތޯ ބެލުމަށް އެ ގައުމުގެ ދިފާއީ ވަޒީރު ޖޯން ހީލީ ހާއްސަ ތަހުގީގެއް ފަށްޓަވައިފިއެވެ.

އިނގިރޭސިވިލާތުގެ ނޫހެއް ކަމަށްވާ "ދަ ޓެލެގްރާފް" އިން ބުރާސްފަތި ދުވަހު ރިޕޯޓްކޮށްފައިވާ ގޮތުގައި، ދިފާއީ ވަޒީރު ހީލީ ވަނީ ފާއިތުވި 20 އަހަރުގެ ދިފާއީ ވުޒާރާގެ ފައިލްތައް ބަލައި، އެޕްސްޓީންގެ އަމިއްލަ ޖެޓްތައް އަސްކަރީ މަރުކަޒުތަކަށް ޖެއްސުމުގައި އެއްވެސް ގުޅުމެއް އޮތްތޯ ކަށަވަރު ކުރުމަށް އޮފިޝަލުންނަށް އަންގަވާފައެވެ.

މި ތަހުގީގު ފެށުމަށް ނިންމާފައި މިވަނީ، އިނގިރޭސި ކުރީގެ ބޮޑުވަޒީރު ގޯޑަން ބްރައުން، އެ ގައުމުގެ ކުރީގެ އަމީރު އެންޑްރޫ މައުންޓްބެޓަން-ވިންޑްސާ، އެޕްސްޓީންއާ ބައްދަލުކުރުމަށް އާންމު ރައްޔިތުންގެ ޓެކްސް ފައިސާއިން ހަރަދުކޮށްގެން އަސްކަރީ މަރުކަޒުތަކާއި ފްލައިޓްތައް ބޭނުންކޮށްފައިވޭތޯ ބެލުމަށް ފުލުހުންނަށް ގޮވާލެއްވިތާ ދުވަސްކޮޅެއް ފަހުންނެވެ.

ބްރައުން ބޮޑަށް ކަންބޮޑުވުން ފާޅުކުރައްވާފައިވަނީ ޑިސެމްބަރު 2000 ގައި އެޕްސްޓީން ދަތުރުކުރި ގަލްފްސްޓްރީމް ޖެޓެއް ނޯފޯކްގެ އަސްކަރީ މަރުކަޒަކަށް ޖެއްސި މައްސަލައާ ގުޅިގެންނެވެ. އެ ދަތުރަށްފަހު އެޕްސްޓީން ވަނީ އެންޑްރޫއާއެކު ސޭންޑްރިންގހަމްގައި ހުންނަ ޝާހީ ގަނޑުވަރަށް ޒިޔާރަތްކޮށްފައެވެ.

އެންޑްރޫ މައުންޓްބެޓަން-ވިންޑްސާ މިދިޔަ ހަފުތާގައި ވަނީ ހައްޔަރުކޮށްފައެވެ. އޭނާ ހައްޔަރުކުރީ އިނގިރޭސިވިލާތުގެ ޓްރޭޑް އެންވޯއީގެ މަގާމުގައި ހުންނެވި ދުވަސްވަރު، ސަރުކާރުގެ ސިއްރު ލިޔެކިޔުންތަކެއް އެޕްސްޓީންއަށް ފޮނުއްވި ކަމަށް ތުހުމަތު ކުރެވޭ މައްސަލައިގައެވެ.

މީގެ އިތުރުން، އިނގިރޭސިވިލާތުގެ އިންޓެލިޖެންސް އެންޑް ސެކިއުރިޓީ ކޮމިޓީން ބުރާސްފަތި ދުވަހު ބުނީ، ސިޔާސީ ގޮތުން ނުފޫޒުގަދަ ޕީޓާ މެންޑެލްސަން، އެމެރިކާއަށް ކަނޑައަޅާ އިނގިރޭސި ސަފީރުގެ މަގާމަށް ބޮޑުވަޒީރު ކިއަރ ސްޓާމާ އައްޔަންކުރެއްވި ގޮތާ ބެހޭ ލިޔެކިޔުންތައް އަންނަ މާރިޗު މަހު އާންމުކުރާނެ ކަމަށެވެ. މެންޑެލްސަން އަކީ އެޕްސްޓީންއާ ގާތް ގުޅުމެއް އޮތް މީހެއްގެ ގޮތުގައި މަޝްހޫރުވެފައިވާ މީހެކެވެ.

މެންޑެލްސަން ވެސް މި މައްސަލައިގެ ތަހުގީގަށް ލަންޑަން ފުލުހުން ހައްޔަރުކުރުމަށްފަހު މިހާރު ވަނީ ދޫކޮށްލާފައެވެ. އޭނާ ސަފީރުކަމުގެ މަގާމުން ވަކިކޮށްފައިވީ ނަމަވެސް، އެފަދަ މީހަކު އެ މަގާމަށް އައްޔަންކުރަން ނިންމި ނިންމުމާ ގުޅިގެން ބޮޑުވަޒީރު ސްޓާމާއަށް ވަނީ ސިޔާސީ ގޮތުން ބޮޑެތި ފާޑުކިޔުންތަކެއް އަމާޒުވެފައެވެ.

ހަމައެއާއެކު، ޔޫރަޕިއަން ޔޫނިއަން (އީޔޫ) ގެ އެންޓި-ފްރޯޑް އޮފީސް "އޯލާފް" އިން ވެސް ދަނީ 2004 އާއި 2008 އާ ދެމެދު މެންޑެލްސަން ބްރަސަލްސްގައި އީޔޫގެ ޓްރޭޑް ކޮމިޝަނަރުގެ މަގާމުގައި ހުރި އިރު ހިންގާފައިވާ އަމަލުތައް ތަހުގީގު ކުރަމުންނެވެ.