ރާއްޖޭގެ ކަނޑުގެ ސަލާމަތާއި ދިފާޢީ ދާއިރާއިން ޤާބިލުކަން އިތުރުކުރަން އެހީވާނެ ކަމުގެ ޔަގީންކަން އިނގިރޭސިވިލާތުންދީފި

ދިވެހިރާއްޖެއާއި އިނގިރޭސިވިލާތާ ދެމެދު ބޭއްވި ތިންވަނަ "ސްޓްރެޓީޖިކް ޑައިލޮގް" ގައި، އިންޑިއާ ކަނޑުގެ ސަލާމަތާއި ރައްކާތެރިކަން ދެމެހެއްޓުމަށާއި، ދިފާޢީ ދާއިރާއިން ދެޤައުމުގެ ގުޅުން އިތުރަށް ބަދަހިކުރުމަށް މުހިންމު މަޝްވަރާތަކެއް ކޮށްފިއެވެ.

މި މަޝްވަރާ ބައްދަލުވުމުގެ ރިޔާސަތު ބަލަހައްޓަވާފައިވަނީ ރާއްޖޭގެ ފޮރިން މިނިސްޓްރީގެ ސެކްރެޓަރީ ޑރ. ހާލާ ޙަމީދާއި، އިނގިރޭސިވިލާތުގެ ފޮރިން، ކޮމަންވެލްތު އެންޑް ޑިވެލޮޕްމަންޓް އޮފީހުގެ ޑިރެކްޓަރ ފޮރ ސައުތު އޭޝިއާ އެންޑް އަފްޣާނިސްތާން، ލޯރާ ބޯފިލްސް އެވެ. މި ބައްދަލުވުމުގައި ދެ ޤައުމުގެ އިސް ވެރިން ވަނީ ބައިވެރިވެވަޑައިގެންފައެވެ.

މި ބައްދަލުވުމުގައި މައިގަނޑު ގޮތެއްގައި އަލިއަޅުވާލާފައިވަނީ ކަނޑުގެ ސަލާމަތާއި ރައްކާތެރިކަން، ޓެރަރިޒަމާ ދެކޮޅަށް ކުރެވޭ މަސައްކަތްތައް އަދި ޤައުމީ ސަލާމަތާ ގުޅުންހުރި ކަންކަމަށެވެ. އެގޮތުން، ރާއްޖޭގެ ދިފާޢީ ބާރުތަކާއި ފުލުހުންގެ ޤާބިލުކަން އިތުރުކުރުމަށް ފަންނީ އެހީތެރިކަމާއި ތަމްރީނު ދިނުމުގައި އިނގިރޭސިވިލާތުގެ އެއްބާރުލުން ކުރިއަށް އޮތް ތަނުގައިވެސް ލިބިގެންދާނެ ކަމުގެ ޔަޤީންކަން އެ ޤައުމުން ވަނީ ދީފައެވެ.

މީގެއިތުރުން، އިޤްތިޞާދީ އަދި ވިޔަފާރީގެ ދާއިރާއިން ދެޤައުމުގެ ގުޅުން ވަރުގަދަކުރުމަށް މަޝްވަރާކުރެވުނެވެ. ޚާއްޞަކޮށް، 20 މޭ 2026 އިން ފެށިގެން 31 ޑިސެމްބަރ 2028 ގެ ނިޔަލަށް ރާއްޖެއިން އިނގިރޭސިވިލާތަށް ބޭރުކުރާ ކަނޑުމަހުގެ ބާވަތްތަކުން ޓެރިފް ކަނޑާލުމަށް ނިންމާފައިވާ ނިންމުމަށް ދިވެހި ސަރުކާރުން ވަނީ މަރުޙަބާ ކިޔާފައެވެ. އަދި ފަތުރުވެރިކަމާއި، އިއާދަކުރަނިވި ހަކަތައާއި، މާލީ ޚިދުމަތްތައް ފުޅާކުރުމާ ގުޅޭގޮތުންވެސް މަޝްވަރާކުރެވުނެވެ. އެގޮތުން 2025 ވަނަ އަހަރު އިނގިރޭސިވިލާތުން 200،000 އަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވާކަން ފާހަގަކުރެވުނެވެ.

މޫސުމަށް އަންނަ ބަދަލުތަކާއި ތިމާވެށި ޙިމާޔަތްކުރުމުގެ ދާއިރާއިން، ކޮޕް31 ބައްދަލުވުމުގެ ކުރިން ދެޤައުމު ގުޅިގެން މަސައްކަތްކުރުމަށާއި، ތަޢުލީމީ ދާއިރާއިން ޗީވްނިންގ އަދި ކޮމަންވެލްތު ސްކޮލަރޝިޕް މެދުވެރިކޮށް ދިވެހިންނަށް ފުރުޞަތުތައް ފަހިކޮށްދިނުމާ ގުޅޭގޮތުންވެސް މި ބައްދަލުވުމުގައި ޚިޔާލު ބަދަލުކުރެވުނެވެ. ހަމައެއާއެކު ޝަރުޢީ ދާއިރާ އިޞްލާޙުކުރުމާއި، އިންސާނީ ޙައްޤުތައް ޙިމާޔަތްކުރުމުގެ ދާއިރާއިންވެސް ދެޤައުމުން އެކުގައި މަސައްކަތްކުރުމަށް ވަނީ އެއްބަސްވެފައެވެ.

މި މަޝްވަރާތައް ނިންމާލާފައިވަނީ، ދެޤައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިކުރުމަށްޓަކައި އަހަރަކު އެއްފަހަރު މިފަދަ ސްޓްރެޓީޖިކް ޑައިލޮގްތައް ކުރިއަށް ގެންދިއުމުގެ އަޒުމު އައުކުރަމުންނެވެ.