ވިލިމާލެ ދާޢިރާއަށް ސަރުކާރުގެ ޓިކެޓް މުހައްމަދު އިސްމާޢިލް ކަށަވަރު ކުރައްވައިފި

މި އަހަރު ބާއްވާ 20 ވަނަ ރައްޔިތުންގެ މަޖިލީހުގެ އިންތިހާބުގައި ވިލިމާލެ ދާއިރާއަށް ވާދަކުރެއްވުމަށް ސަރުކާރުގެ ޓިކެޓް ހޯރަފުށީ ދާއިރާގެ ކުރީގެ މެންބަރު މުޙައްމަދު އިސްމާޢީލް ކަށަވަރު ކުރައްވައިފިއެވެ.

ސަރުކާރު ކޯލިޝަން، ޕީޕީއެމް/ޕީއެންސީންގެ ފަރާތުން 20 ވަނަ ރައްޔިތުންގެ މަޖިލިހުގައި ވާދަކުރައްވާނެ ކެންޑިޑޭޓެއް ކަނޑައެޅުމަށް  އެކޯލިޝަނުން ކުރިއަށް ގެންދިޔަ ޕްރައިމަރީގައި ވިލިގިލި ދާޢިރާއަށް ވޯޓްލެވޭ ޖުމުލަ 857 މީހަކު ތިބިއިރު ވޯޓްލައިފައި ވަނީ 459 މީހެކެވެ.

އޭގެތެރެއިން ޕީޕީއެމް/ޕީއެންސީން ކޯލިޝަންގެ ހަރަކާތްތަކުގައި، ވަކިން ހާއްސަކޮށް އެކޯލިޝަންގެ މަގުމަތި ހަރަކާތްތަކުގައި އެންމެ އިސްކޮށް އުޅުއްވާ މުޙައްމަދު އިސްމާއިލް ވަނީ 300 ވޯޓް ކާމިޔާބު ކުރައްވާފައެވެ.

އެއީ ވޯޓްލީ މީހުންގެ %65 އިންސައްތައެވެ. މި ޕްރައިމަރީގައި ދެވަނަ ދިޔަ ފަޒްލާއަށް 81 ވޯޓް ލިބިވަޑައި ގެންނެވިއިރު އަޝްވާންއަށް 74 ވޯޓް ލިބިފައިވެއެވެ.

18 ވަނަ ރައްޔިތުން މަޖިލިހުގައި ހޯރަފުށި ދާޢިރާ ތަމްސީލް ކުރެއްވި މުޙައްމަދު އިސްމާޢިލް މިފަހަކަށް އައިސް އެންމެ ބޮޑަށް ފާހަގަކުރެވިގެން ގޮސްފައިވަނީ ޕީޕީއެމް/ޕީއެންސީން ކޯލިޝަނުން ކުރިއަށް ގެންދިޔަ "އިންޑިއާއައުޓް" ކެންޕެއިންގައި މަގުމަތީގެ ހަރަކާތްތަކުގައި އެންމެ އިސްދަޢުރެއް އަދާކުރެއްވި ފަރާތުގެ ގޮތުގައެވެ. އެ ހަރަކާތުގެ ތެރެއިން އޭރުގެ ސަރުކާރުން މުހައްމަދު އިސްމާޢިލް ވަނީ އެތައް ފަހަރަކު ބަންދުކޮށް ޖަލަށްވެސް ލައިފައެވެ.

މީގެ އިތުރުން އެންމެ ފަހުން މުހައްމަދު އިސްމާޢިލް ފާހަގަ ކުރެވިގެން ދިޔައީ ރައީސް އިބުރާޙިމް މުހައްމަދު ޞާލިޙްގެ ސަރުކާރުން އިނޑިޔާ އެންބަސީ އާއި ގުޅިގެން ކުރިއަށް ގެންދިޔަ ޔޯގާ ބޮޑު ހަރަކާތް ހުއްޓުވުމަށް ނިކުތް މީހުންނަށް ހިތްވަރުދީ އެކަމަށް މަގުފަހިކޮށްދިން ކަމުގެ ތުހުމަތުގައި ޖަލުގައި ބަންދުކޮށް ، އެ މައްސަލާގައި ޓެރަރިޒަމުގެ ދަޢުވާ އުފުލި ފަރާތެއްގެ ގޮތުގައެވެ.