އަންދާޒާކުރި އަދަދަށްވުރެ ގިނައިން ޖޫރިމަނާގެ ގޮތުގައި ލިބުނު އާމްދަނީ އިތުރުވެއްޖެ

މިއަހަރުގެ ދެވަނަ ކުއާޓަރުގައި ޖޫރިމަނާގެ ފައިސާގެ ގޮތުގައި ލިބޭނޭކަމަށް އަންދާޒާކުރި އާމްދަނީއަށް ވުރެ ބޮޑު އަދަދެއް ދައުލަތުގެ ބައިތުލްމާލަށް ލިބިއްޖެއެވެ.

ދައުލަތުގެ ޓެކްސް އިދާރާ، މޯލްޑިވްސް އިންލަންޑް ރެވެނިއު އޮތޯރިޓީން ނެރެފައިވާ މިއަހަރުގެ ދެވަނަ ކުއާޓަރުގެ އާމްދަނީ ރިޕޯޓަށް ބަލާއިރު، މި ކުއާޓަރުގެ ނިޔަލަށް ޖޫރިމަނާ ފައިސާގެ ގޮތުގައި ވަނީ 66.2 މިލިއަން ރުފިޔާ ލިބިފައެވެ. ކުރިން އަންދާޒާ ކޮށްފައިވަނީ ޖޫރިމަނާގެ ގޮތުގައި 20.8 މިލިއަން ރުފިޔާ ލިބޭނެ ކަމަށެވެ. އެހެންކަމުން މިއީ އަންދާޒާ ކުރި އަދަދަށްވުރެ 45.4 މިލިއަން ރުފިޔާގެ އިތުރުވުމެކެވެ.

އާއްމުގޮތެއްގައި ޖޫރިމަނާގެ ގޮތުގައި ދައުލަތަށް އާމްދަނީ ލިބެނީ ދައްކަންޖެހޭ ޓެކްސް ނުދެއްކުމުންނާއި، އެކިއެކި މައްސަލަތަކުގައި ކުރެވޭ ޖޫރިމަނާއިންނެވެ. މީގެ ކުރިން ޓްރެފިކް ގަވާއިދުތަކާ ހިލާފްވެގެން ކުރެވޭ ޖޫރިމަނާ މީރާއަށް ބަލައިގަންނަމުން އައިނަމަވެސް، 2023 ވަނަ އަހަރުން ފެށިގެން އެ ފައިސާ ބަލައި ގަންނަމުން އަންނަނީ ސަވާރީ ޕޭ މެދުވެރިކޮށެވެ.

ދައުލަތުގެ ބަޖެޓަށް އާމްދަނީ ލިބޭނޭ ދާއިރާތައް ކަނޑައަޅާއިރު ޖޫރިމަނާ ފައިސާ ލިބޭނޭކަމަށް ޖަހާފައި އޮވެއެވެ.  ޖޫރިމަނާ އަކީ ކުށްތައް މަދުކުރުމަށް އަޅާ ފިޔަވަޅަކަށް ވާއިރު، ބަޖެޓު ފޫބެއްދުމަށް ޖޫރިމަނާއިން ބޮޑު އާމްދަނީއެއް ހޯދަން އަމާޒު ހިފުމަކީ ސިޔާސީ އަދި އިޤްތިޞާދީ ގޮތުން ގިނަ ފާޑުކިޔުންތަކެއް އަމާޒުވާ ކަމެއްކަން ފާހަގަކޮށްލެވެއެވެ.