ލަމީން ޔަމާލްއަށް އަނިޔާ ބާސެލޯނާއަށް އިތުރު ނުތަނަވަސްކަމެއް

ސްޕެނިޝް ލަލީގާގެ އެއްވަނައިގައި މިވަގުތު އޮތް ބާސެލޯނާގެ އިތުރުބާ ފޯވާޑް ލަމީން ޔަމާލަށް އަނިޔާވެ ތިނެއް ނޫނީ ހަތަރު ހަފްތާއަށް ކުޅުމާއި ދުރަށްދާން ޖެހިފައިވާކަމަށް ސްޕެއިންގެ މީޑިއާތަކުން ވަނީ ރިޕޯޓްކޮށްފައެވެ.

އުމުރުން 17 އަހަރުގެ ފޯވާޑްގެ ކަކުލުގެ ލިގަމެންޓަށް އަނިޔާވެފައި ވަނީ ލީގުގައި ބާސެލޯނާ އެންމެ ފަހުން ލެގަނޭސް އާއި ދެކޮޅަށް ކުޅެ 1-0 ގެ ނަތީޖާއަކުން ބަލިވި މެޗުގައެވެ.

މިދިޔަ ސީޒަނުގައި ބާސެލޯނާ ޓީމުން ވިދާލުމަށްފަހު، މިއަހަރު ޖަރުމަނުގައި އޮތް ޔޫރޯ ފުޓްބޯޅަ މުބާރާތް ސްޕެއިން ޤައުމީ ޓީމާއެކު  ކާމިޔާބުކުރި ލަމީން ޔަމާލް އަކީ މިސީޒަނުގައި ބާސެލޯނާގެ އިތުރުން ލަލީގާގައި ވެސް އެންމެ ފާހަގަކޮށްލެވޭ އެއްކުޅުންތެރިއާ އެވެ.

އޭނާ ވަނީ މިސީޒަނުގައި ލީގުގައި ކުޅުނު 16 މެޗުގައި ބާސެލޯނާއަށް ފަސް ލަނޑު ކާމިޔާބުކޮށްދިނުމުގެ އިތުރުން އިތުރު ނުވަ ލަނޑު ޖެހުމަށް އެހީތެރިވެދީފައެވެ. އަދި ސީޒަނުގެ ކުރީކޮޅު ބާސެލޯނާއިން ލީގުގެ ކުރީގައި ބޮޑު ލީޑެއް ނެގި ނަމަވެސް މިވަގުތު އެޓީމު އެއްވަނައިގައި އޮތީ އިތުރަށް އެއްމެޗު ކުޅެ ލަނޑުގެ ތަފާތުންނެވެ.

ލީގުގައި ކުޅުނު 18 މެޗުން ބާސެލޯނާއަށް 38 ޕޮއިންޓް ލިބިފައިވާއިރު، ދެވަނައިގައި އޮތް އެތްލެޓިކޯ މެޑްރިޑަށް 17 މެޗުން ވަނީ 38 ޕޮއިންޓް ލިބިފައެވެ. އަދި 17 މެޗުން ލިބުނު 37 ޕޮއިންޓާއެކު ތިންވަނައިގައި ރެއާލް މެޑްރިޑް އޮތްއިރު، ލީގުގައި މިމަހުގެ 22 ވަނަ ދުވަހު ބާސެލޯނާ އިން ނުކުންނާނީ ދެވަނައިގައި އޮތް އެތްލެޓިކޯ މެޑްރިޑާއި ދެކޮޅަށެވެ.